ކޮމިޓީތަކުގައި 19 ބިލެއްގެ މަސައްކަތް ނުނިމި
7 ފެބުރުއަރީ 2023 | އަންގާރަ 07:12އައު ސުންގަޑިއެއް އަންގައިދިނުމަށް ރިޔާސަތުން ވަނީ ކޮމިޓީތަކުގައި އެދިލައްވާފައި
ޖުޑިޝަރީ ކޮމިޓީގެ ބައްދަލުވުމެއް
ރައްޔިތުންގެ މަޖިލީހަށް ހުށަހަޅާފައިވާ 19 ބިލެއް ކޮމިޓީތަކުގައި އެބައޮތް ކަމަށް ރައްޔިތުންގެ މަޖިލީހުގެ ރައީސް، މުހައްމަދު ނަޝީދު ވިދާޅުވެއްޖެއެވެ.
ބިލުތަކުގެ ތަފްސީލު ހިއްސާކުރައްވަމުން ރައީސް ނަޝީދު ވިދާޅުވީ އިގްތިސާދީ ކޮމިޓީގައި 2 ބިލެއް، ޖުޑިޝަރީ ކޮމިޓީގައި 7 ބިލެއް، އިޖްތިމާއީ ކޮމިޓީގައި 2 ބިލެއް، ލާމަރުކަޒީ ކޮމިޓީގައި 1 ބިލު އެބައޮތް ކަމަށެވެ. މީގެ އިތުރުން މާލިއްޔަތު ކޮމިޓީގައި 2 ބިލު، ސަލާމަތީ ހިދުމަތްތަކާއި ގުޅޭ ކޮމިޓީ އަދި އެންވަޔަރމަންޓް އެންޑް ކްލައިމެޓް ޗޭންޖް ކޮމިޓީގައި ބިލެއް އަދި ގައުމީ ތަރައްގީއާއި ތަރިކައިގެ ކޮމިޓީ، އެންވަޔަރމަންޓް އެންޑް ކްލައިމެޓް ޗޭންޖް ކޮމިޓީ އަދި ލާމަރުކަޒީ ކޮމިޓީގެ ގުޅިފައިވާ ކޮމިޓީގެ ބިލެއް އެބަ އޮތް ކަމަށެވެ.
މީގެ އިތުރުން ގައުމީ ތަރައްގީއާއި ތަރިކައިގެ ކޮމިޓީ އަދި ލާމަރުކަޒީ ކޮމިޓީގެ ގުޅިފައިވާ ކޮމިޓީގައި އިތުރު ދެ ބިލެއް އެބައޮތް ކަމަށެވެ.
ރައީސް ނަޝީދު ވިދާޅުވީ ބައެއް ކޮމިޓީތަކުން ސުންގަޑި އިއްވުމަށްފަހުގައި ވެސް އެ ކޮމިޓީއަށް މަސައްކަތް ނިންމުމަށް އަމާޒު ހިފިފައި ނުވާ ކަމަށެވެ.
އެހެންކަމުން ކޮމިޓީތަކުން ބައްލަވާލެއްވުމަށްފަހުގައި ބިލުތަކުގެ މަސައްކަތް ނިންމެވޭނެ އަންދާޒާއެއް އެކުލަވާލާ އެ އަންދާޒާއަކީ ސުންގަޑީގެ ގޮތުގައި ކަނޑައަޅައިދެއްވުމަށް ރައީސް ނަޝީދު ވަނީ އެދިވަޑައިގަންނަވާފައެވެ.
