ފަހު މެޗުގައި މަޖީދިއްޔާގެ މައްޗަށް އިމާދުއްދީނުން ބޮޑު މޮޅެއް
31 ޖެނުއަރީ 2023 | އަންގާރަ 02:28ގަލޮޅު ރަސްމީ ދަނޑުގައި ކުޅުނު މެޗު އިމާދުއްދީނުން ކާމިޔާބު ކުރީ 5-0 ގެ ބޮޑު ތަފާތަކުން
އިންޓަ ސްކޫލް މުބާރާތުގެ ތެރެއިން
އިންޓަ ސްކޫލް 17 އަހަރުން ދަށުގެ ފުޓުބޯޅަ މުބާރާތުގެ ގްރޫޕް އޭގެ ފަހު މެޗުގައި އިމާދުއްދީން ސްކޫލް އިން މަޖީދިއްޔާ ސްކޫލް ބަލިކޮށްފި އެވެ.
ހޯމަ ދުވަހުގެ ހަވީރު ގަލޮޅު ރަސްމީ ދަނޑުގައި ކުޅުނު މެޗު އިމާދުއްދީނުން ކާމިޔާބު ކުރީ 5-0 ގެ ބޮޑު ތަފާތަކުންނެވެ. މެޗުގެ ފުރަތަމަ ހާފުގައި އިމާދުއްދީނުން ވަނީ ތިން ލަނޑު ޖަހައިފަ އެވެ. އެ ޓީމުގެ އަނެއް ދެ ލަނޑު ޖެހީ ދެ ވަނަ ހާފުގަ އެވެ. މެޗު ފަށައިގެން އަށް ވަނަ މިނެޓުގައި އިމާދުއްދީނަށް ލީޑު ނަގައިދިނީ އަޙުމަދު އަނަސް ޙަސަން އެވެ. އޭގެ އަށް މިނެޓު ފަހުން އެ ޓީމަށް ލީޑު ފުޅާކޮށްދިނީ ޙަސަން އަމަން ޒާހިރު އެވެ. އިމާދުއްދީނުގެ ތިން ވަނަ ލަނޑާއި، ހަތަރު ވަނަ ލަނޑު ޖަހައިދިނީ މުޙައްމަދު އައިކު ވަޖީޙު އެވެ. އެއީ ފުރަތަމަ ހާފުގެ އިތުރު ވަގުތުގައި އޭނާ ޖެހި ލަނޑާއި، ދެ ވަނަ ހާފުގެ 53 ވަނަ މިނެޓުގައި އޭނާ ޖެހި ލަނޑެވެ. އިމާދުއްދީނުގެ ފަހު ލަނޑު 63 ވަނަ މިނެޓުގައި ޖެހީ މުޙައްމަދު މިކްޔާލް މުއީން އެވެ.
މިއީ މުބާރާތުގައި އިމާދުއްދީނުގެ ދެ ވަނަ މޮޅެވެ. އެ ޓީމު ކުޅުނު ހަތަރު މެޗުގެ ތެރެއިން ވަނީ އެއް މެޗުން ބަލިވެ، އަނެއް މެޗުން އެއްވަރުވެފަ އެވެ. މަޖީދިއްޔާ އިން ކުޅުނު އެއްވެސް މެޗަކުން މޮޅުވެފައެއް ނުވެ އެވެ. އެގޮތުން ހަތަރު މެޗުގެ ތެރެއިން އެންމެ މެޗަކުން އެއްވަރުވިއިރު، ތިން މެޗުން މަޖީދިއްޔާ ވަނީ ބަލިވެފައެވެ.
