ވޭތުވެދިޔަ 20 އަހަރު ކެލާ ދާއިރާއަށް ނުކުރާވަރުގެ އިންވެސްޓްމަންޓްތައް މި ސަރުކާރުން ކުރި: ރައީސް ސާލިހު

ވޭތުވެދިޔަ 20 އަހަރު އެއްވެސް ސަރުކާރަކުން ކެލާ ދާއިރާއަށް ނުކުރާވަރުގެ އިންވެސްޓްމަންޓްތައް މި ސަރުކާރުން ކުރި ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.

އެމަނިކުފާނު މިހެން ވިދާޅުވި އެމްޑީޕީ ޕްރައިމަރީގެ ކެމްޕެއިނަށް އަންގާރަ ދުވަހުގެ ހަވީރު ހއ. ކެލާއަށް ވަޑައިގެން ރައްޔިތުންނާއި ބައްދަލުކުރައްވާ ވާހަކަފުޅުދައްކަވަމުންނެވެ.

Advertisement

ރައީސް ވިދާޅުވީ ވޭތުވެދިޔަ ހަތަރު އަހަރުގެ ތެރޭގައި ކެލާ ދާއިރާގެ އެކި އެކި މަޝްރޫއުތަކަށް 118 މިލިއަން ރުފިޔާ ޚަރަދުކޮށްފައިވާ ކަމަށެވެ.

ރައީސް ވިދާޅުވީ މި ވެރިކަމުގައި ކެލާގެ ބަނދަރު ތަރައްޤީކޮށް ނިމިފައިވާ ކަމަށެވެ. އެހެންނަމަވެސް ބަނދަރުގެ ނެރު ފުން ކުރުމާއި ބޭރު ތޮށި ހެދުމުގެ މަސައްކަތް ކުރަން ޖެހިފައިވާ ކަމަށް ރައްޔިތުންގެ ފަރާތުން ހިއްސާކޮށްފައިވާ ކަމަށެވެ. އަދި ރަނގަޅު ސަރވޭއެއް ހެދުމަށްފަހު ބަނދަރަށް ދިމާވެފައިވާ ދަތިކަން ހައްލު ކުރުމުގެ މަސައްކަތް ވަރަށް އަވަހަށް ފައްޓަވާނެ ކަމަށް ރައީސް ވިދާޅުވިއެވެ.

ނިމިގެންދިޔަ ހަފްތާގައި ރަށްތަކަށް ކުރި ދަތުރުތަކުން ސާފުވީ ވައުދުތައް ފުއްދުމުގައި ގިނަ މަސައްކަތްތައް ފެށި، ނިމި އަނެއްބައި ރަށްތަކުގައި މަސައްކަތް ކުރިއަށްދާކަން ކަމަށް ރައީސް ވިދާޅުވިއެވެ. އަދި ކޮންމެ ރަށަކުން ވެސް ރައްޔިތުން އެކަންތައްތައް ބަލައިގަންނަ ކަމަށް ވެސް ވިދާޅުވިއެވެ.

އެމްޑީޕީގެ ވިސްނުމަކީ އަބަދުވެސް ރައްޔިތުންނަށް ރަނގަޅު ގޮތްތައް ހޯދައިދިނުންކަން ފާހަގަކުރައްވާ ރައީސް ވިދާޅުވީ ރަށްތައް ތަރައްޤީ ކުރުމަށް ކުރާ މަސައްކަތް ކުރިއަށް ގެންދިޔުމަށް ރިޔާސީ އިންތިޚާބު ކާމިޔާބު ކުރަން ޖެހޭ ކަމަށެވެ.

ރައީސް އިތުރަށް ވިދާޅުވީ ރިޔާސީ އިންތިޚާބެއް އެކަނި އެއްވެސް ޕާޓީއަކަށް ކާމިޔާބު ކުރުމަކީ ނާރިދުކަމެއް ކަމަށާއި ރާއްޖޭގެ ޕާޓީތަކުން ބާއްވާ އެތެރޭގެ އިންތިޚާބުތަކާއި މި އިންތިޚާބު ތަފާތު  ކަމަށެވެ.

ރާއްޖޭގެ ވެރިކަމަށް އެމްޑީޕީ ގެންނަން ބޭނުންވާ މިންވަރާއި އަލުން އަނިޔާވެރިކަމުގެ ތެރެއަށް ރައްޔިތުން ދާން ބޭނުންނުވާ މިންވަރު ސާފުކޮށް ފެނިވަޑައިގަންނަވާ ކަމަށް ވެސް ރައީސް ވިދާޅުވިއެވެ.