މިމަހުގެ 28 ވަނަ ދުވަހު ބާއްވާ އެމްޑީޕީގެ ރިޔާސީ ޕްރައިމަރީ ކާމިޔާބުވެއްޖެނަމަ، ރިޔާސީ އިންތިހާބުގައި ދެވަނަ ބުރަކަށް ދިއުމުގެ ސަބަބެއް ނޯންނާނެކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހް ވިދާޅުވެއްޖެއެވެ.

އައްޑޫސިޓީގެ ހުޅުމީދޫގައި ސަޕޯޓަރުންނާއި ބައްދަލުކުރައްވާ ވާހަކަފުޅުދައްކަވަމުން ރައީސް ވިދާޅުވީ ސަރުކާރެއް އެއްބުރުން އެކުލަވާލެވޭވަރުގެ ނަތީޖާއެއް ނެރެވޭ ފޯމިއުލާއެއް އެބައޮތް ކަމަށެވެ. އަދި އެމަނިކުފާނަށް އެމްޑީޕީގެ ރިޔާސީ ޕްރައިމަރީ ކާމިޔާބުވެއްޖެއްޔާ ދެވަނަ ބުރަކަށް ރިޔާސީ އިންތިހާބުގައި ދާންޖެހޭ ސަބަބެއް ނެތް ކަމަށާއި، އެއްބުރުން މިކަން ނިންމާލެވޭނެކަމަށް ރައީސް ވިދާޅުވިއެވެ.

ރައީސް ވިދާޅުވީ އެމްޑީޕީއަށް ވެރިކަން ގެއްލިއްޖެނަމަ އެނބުރި ވެރިކަމަށް އައުމަށް ދެން ނަގާނީ ކިހާ ދުވަހެއްކަމެއް އެނގިވަޑައިނުގަންނަވާ ކަމަށެވެ. އެހެންވީމާ ކުރިއަށް އޮތް ރިޔާސީ އިންތިހާބު ކާމިޔާބު ކުރެވޭނެ ފޯމިއުލާއަކީ އެމްޑީޕީއާއި އަދި އެމްޑީޕީއަށް ތާއިދުކުރާ ބަޔަކާއެކީގައި އުފެެދޭ ސަރުކާރެއް އުފެދޭގޮތަށް އެކަން ކޮށްގެން ކަމަށް ރައީސް ވިދާޅުވިއެވެ.

ވެރިކަމަށް އާދެވެން އޮތް ގޮތަކީ ކޮބައިތޯ މިއީ މިއަދު އަޅުގަނޑުމެން ވިސްނަންވި ކަންތައް ކަމަށް ރައީސް ވިދާޅުވިއެވެ. ރައީސް ވިދާޅުވީ މިއީ ޕާޓީ އެތެރޭގެ ޕްރައިމަރީއެއް ނަމަވެސް މި ޕްރައިމަރީގައި ނިންމާ ނިންމުން ގޮސް ގުޅެނީ އަޅުގަނޑުމެން މި ފަށާފައި ހުރި މަސައްކަތްތައް ހުއްޓުމަކަށް ގެންނަންވީތޯ ނޫނިއްޔާ ނޫންތޯ ކަމަށް ރައީސް ވިދާޅުވިއެވެ.

ރައީސް ވިދާޅުވީ ކަނޑައެޅިގެން އެނގޭ އެއް ކަމަކީ، އެމްޑީޕީ އަށް ވެރިކަން ނުލިބިއްޖެ ނަމަ ސަރުކާރުން ފަށާފައި ހުރި ކަންތައްތައް ދިމާ އިދިކޮޅަށް ދެން އަންނަ ޕީޕީއެމްގެ ސަރުކާރެއް އަތުވެއްޖިއްޔާ އެކަން އެގޮތަށް ވެގެން ދާނެކަމަށެވެ. އެފުރުސަތު ދިއުމާއި ނުދިއުން އޮތީ މި ޕްރައިމަރީގައި ނިންމާ ނިންމުގެ މައްޗަށް ކަމަށް ރައީސް ވިދާޅުވިއެވެ. ރައީސް ވަނީ ޕްރައިމަރީއާއެކު ކުރިއަށް އޮތް ރިޔާސީ އިންތިހާބާދޭތެރޭގައި ވެސް ވިސްނުމަށް ވެސް އެދިވަޑައިގަންނަވާފައެވެ.

ރައީސް ވިދާޅުވީ ހުޅުމީދޫ ރައްޔިތުންގެ ކިބައިންވެސް އެމަނިކުފާނު އެދިވަޑައިގަންނަވަނީ ވަރަށް ފުންކޮށް ވިސްނުމަށްފަހުގައި މި ޕްރައިމަރީގައި އެމަނިކުފާނާއެކު ތިބުމަށް ކަމަށެވެ. އަދި އިރާދަކުރެއްވިއްޔާ ޕްރައިމަރީ ބޮޑުތަނުން ކާމިޔާބުކުރައްވާނެ ކަމަށާއި، މި ކާމީޔާބީގައި އައްޑޫސިޓީ އެކަހެރިވެ ބާކީވެފައި އޮތުމަކީ އެދިވަޑައިގަންނަވާ ގޮތެއް ނޫން ކަމަށް ރައީސް ވިދާޅުވިއެވެ.

މުޅި ރާއްޖެއިން މި ކާމިޔާބު ހޯދާއިރުގައި އޭގެ ބޮޑު ހިއްސާއެއް އައްޑޫ ސިޓީގައި އޮތުމަކީ އެމަނިކުފާނު ވަރަށް ބޮޑަށް އެދިވަޑައިގަންނަވާ ކަމެއް ކަމަށާއި، 2023 ވަނަ އަހަރު ރިޔާސީ އިންތިހާބު ކާމިޔާބުކޮށް އެކުލަވާލާ ސަރުކާރުގައި އައްޑޫ ސިޓީއަކީ ބޮޑު ދައުރެއް އަދާކުރާނެތަނެއްކަމުގައި ރައީސް ވިދާޅުވިއެވެ.