ދައުރު ނިންމާފައި ގޭގައި ހުންނަން ފަސޭހަ، މިނުކުތީ ޕާޓީއަށްޓަކައި ވައުދުތައް ފުއްދަން - ރައީސް
16 ޖެނުއަރީ 2023 | ހޯމަ 03:51ޕާޓީއަށްޓަކައި އަޅުގަނޑުމެންވި ވައުދުތައް ފުއްދުމަށްޓަކައި މިކަން ކުރަން އެބަޖެހޭ
ރައީސް އައްޑޫ ސިޓީގެ ރައްޔިތުންނާއި ބައްދަލުކުރެއްވުން
ރިޔާސީ ދައުރެއް ނިންމާ، ގޭގައި ހުންނަވަން ފަސޭހަފުޅުވާނެ ކަމަށާއި، ނަމަވެސް އިތުރު ދައުރަކަށް ކުރިމަތިލައްވަން ނުކުންނެވީ ޕާޓީއަށްޓަކައި އަދި ވެވަޑައިގެންނެވި ވައުދުފުޅުތައް ފުއްދެވުމަށް ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހް ވިދާޅުވެއްޖެއެވެ.
އެމްޑީޕީގެ ރިޔާސީ ޕްރައިމަރީގައި ވާދަކުރައްވަން ނިންމަވާ މިހާރުކުރައްވަމުން ގެންދަވާ ކެމްޕެއިންގެ ތެރެއިން އައްޑޫ ސިޓީގައި ސަޕޯޓަރުންނާއި ވާހަކަފުޅުއްދައްކަވަމުން ރައީސް ވިދާޅުވީ އެއް ދައުރު ނިންމަވާފައި ގޭގައި ހުންނަވަން ވަރަށް ފަސޭހަފުޅުވާނެ ކަމަށެވެ.
ރައީސް ވިދާޅުވީ އެހެން މަގެއް އެބައޮތް ކަމަށާއި، ވެރިކަމަށް އާދެވޭނެ ގޮތް އެބައޮތް ކަމަށާއި، ވެރިކަމަށް އައިސް ކަންތައް ކުރެވޭ ތަން ފެންނަން އެބަހުރި ކަމަށެވެ. ރައީސް ވަނީ އެހެން ގޮތެއް ހިޔާރުކުރަންވީ ކީއްވެގެންތޯ ސުވާލު އުފައްދަވާފައެވެ.
ރައީސް ވިދާޅުވީ ވެރިކަން އެހެން ބަޔަކަށް ލިބިއްޖެއްޔާ ވެގެންދާނެގޮތް ވަރަށް ސާފުކަމަށެވެ. ދެވަނަ ފަހަރަށް މަގުމައްޗަށް ނުކުމެ، 6 އަހަރު 7 އަހަރު މަގުމަތީގައި އެހެން ތިބުމަކީ ސިޔާސީ ޕާޓީއަކަށް އަބަދު ކުރަން ހެޔޮވާވަރު ކަމެއް ނޫން ކަމަށް ރައީސް ވިދާޅުވިއެވެ. އަދި ރާއްޖޭގައި ސުލްހަޔާއި ހަމަޖެހުން ބޭނުންވަނީ ތަރައްގީއަށްޓަކައި ކުރަން ހުރި މަސައްކަތްތައް ކުރުމަށް ކަމަށް ރައީސް ވިދާޅުވިއެވެ.
ރައީސް ވިދާޅުވީ މަރަދޫ ފޭދޫ އޮތީ އެމްޑީޕީގެ ޕްރައިމަރީއަށް ފައްކާވެފައި ކަމަށެވެ. އަދި ޕްރައިމަރީގައި އެ ދާއިރާއިން ބޮޑު އަގުލަބިއްޔަތު ލިބޭނެކަމަށް ރައީސް ވިދާޅުވިއެވެ.
