ޓެލެތޯން ފެށުމާ ހަމައަށްވެސް، 2020 ވަނަ އަހަރު މާލޭ ސިޓީކައުންސިލަށް ދިން އެއް މިލިއަން ރުފިޔާ ބޭނުމެއް ނުކުރޭ: މިނިސްޓްރީ
މިނިސްޓްރީން ސިޓީ ކައުންސިލަށް ދޭ ފައިސާ ޚަރަދުވާގޮތުގެ ތަފްސީލް ހުށަހަޅަމުން ނުދާކަމަށް މިނިސްޓްރީން ބުނޭ
މާލޭގެ މިސްކިތެއް
މާލޭގެ މިސްކިތްތައް މަރާމާތުކުރުމަށް ފަންޑު ހޯދުމުގެ ޓެލެތޯން، ޗާލު މިސްކިތުގެ ނަމުގައި މާލޭ ސިޓީ ކައުންސިލުން ފެށުމާ ހަމައަށް، 2020 ވަނަ އަހަރު މާލެސިޓީ ކައުންސިލަށް ދިން އެއް މިލިއަން ރުފިޔާ ބޭނުން ނުކުރާކަން ޔަގީންވެފައިވާ ކަމަށް އިސްލާމިކް މިނިސްޓްރީން ބުނެފިއެވެ.
"ރާއްޖެ އެމްވީ"އަށް މައުލޫމާތުދެއްވަމުން އިސްލާމިކް މިނިސްޓަރ ޑރ. އަހްމަދު ޒާހިރު އަލީ ވިދާޅުވީ، 2020ގައި ދިން ފައިސާ ބޭނުން ނުކުރާ ކަމަށާއި، އެ ފައިސާ ޚަރަދުކުރި ގޮތުގެ ތަފްސީލް މިނިސްޓްރީއާ ހިއްސާކޮށްފައި ނުވާކަމަށެވެ. މިނިސްޓަރ ވިދާޅުވީ، ސިޓީ ކައުންސިލުން މިސްކިތްތައް މަރާމާތުކުރަން ހޭދަވާ ފައިސާގެ އަންދާޒާ ރިޕޯޓެއް ހުށަހަޅާފައިވާ ކަމަށެވެ. އެހެންނަމަވެސް އެ ރިޕޯޓުގައި ހިމެނެނީ، ފައިސާ ޚަރަދުކުރި ގޮތުގެ ތަފްސީލް ނޫން ކަމަށްވެސް އިސްލާމިކް މިނިސްޓަރ ވަނީ ވިދާޅުވެފައެވެ. އަދި ސިޓީ ކައުންސިލަށް މިސްކިތްތައް މަރާމާތުކުރަން ދިން ފައިސާ، ސިޓީ ކައުންސިލުން މިސްކިތް މަރާމާތުކުރަން ފައިސާ ހޯދަން ހިންގި ޓެލެތޯން ފެށުމާ ހަމައަށްވެސް ބޭނުންކޮށްފައި ނުވާކަން އޭނާ ވަނީ ފާހަގަކުރައްވާފައެވެ. ސިޓީ ކައުންސިލްގެ ބަޖެޓް ސެކްޝަންގެ ފަރާތުން، އެ ފައިސާ ބޭނުންނުކުރާ ކަމަށާއި، އެ ފައިސާ ކައުންސިލްގެ އެކައުންޓްގައި ހުރިކަމަށް އަންގާފައިވާކަމަށް މިނިސްޓަރ ވިދާޅުވިއެވެ.
އެ މިނިސްޓްރީގެ މިސްކިތު ފަންޑުން 2020 ވަނަ އަހަރު މިސްކިތްތައް މަރާމާތުކުރުމަށް މާލޭ ސިޓީ ކައުންސިލަށް އެއްމިލިއަން ރުފިޔާ ދީފައިވާއިރު، 2022 ވަނަ އަހަރު ނިމުނުއިރުވެސް އެ ފައިސާ ޚަރަދުކުރިގޮތުގެ ތަފްސީލު މިނިސްޓްރީއަށް ހުށަހަޅާފައި ނުވާކަމަށް އިސްލާމިކް މިނިސްޓްރީން ބުނެއެވެ. އެހެންނަމަވެސް ސިޓީ ކައުންސިލުން އެކަން ދޮގުކުރެއެވެ.
މާލެ ސިޓީގެ މޭޔަރު ޑރ. މުހައްމަދު މުއިއްޒު "ރާއްޖެ އެމްވީ"އަށް ވިދާޅުވީ، އިސްލާމިކް މިނިސްޓްރީން ދިން ބަޖެޓް ބޭނުންކޮށްފައި ވާކަމަށާއި، އެކަމުގެ ތަފްސީލްތައް މިނިސްޓްރީއާ ހިއްސާކޮށްފައިވާ ކަމަށެވެ. މިސްކިތްތަކަށް ކުރި ޚަރަދުތައް ސިޓީ ކައުންސިލްގެ މީޑިއާ މެދުވެރިކޮށް ތަފްސީލްކޮށް ލިބެން ހުންނާނެ ކަމަށާއި، އެ މައުލޫމާތު ނުލިބޭކަމަށް ބުނެ މިނިސްޓްރީން ފަތުރަނީ ސައްހަ ނޫން މައުލޫމާތު ކަމަށްވެސް މުއިއްޒު ވިދާޅުވިއެވެ. އަދި އެކަމާ ގުޅިގެން މިނިސްޓްރީގެ ބޭފުޅުންނާ ތަކުރާރުކޮށް ބައްދަލުކޮށްފައިވާ ކަމަށް މުއިއްޒު ވިދާޅުވިއެވެ.
މުއިއްޒު ވިދާޅުވީ މިހާރު މިސްކިތްތައް މަރާމާތުކުރަމުން ދަނީ ސިޓީ ކައުންސިލްގެ އާމްދަނީއާއި މާލޭގެ މިސްކިތްތައް މަރާމާތުކުރުމަށް ފަންޑު ހޯދުމުގެ ގޮތުން ބޭއްވި "ޗާލު މިސްކިތް" ޓެލެތޯނުން ލިބުނު ފައިސާއިން ކަަމަށެވެ. އަދި އެ ފަންޑުގެ ބޭރުންވެސް މިސްކިތްތައް މަރާމާތުކުރަން އާއްމުންގެ އެހީ ލިބޭކަން މޭޔަރ ފާހަގަކުރެއްވިއެވެ.
މާލެގެ މިސްކިތްތައް މަރާމާތުކުރުމަށް ކުރާ ހޭދައާމެދު މިނިސްޓްރީ އާއި ސިޓީ ކައުންސިލްގެ ބަސް ވަރަސް ބޮޑަށް ތަފާތެވެ. ސިޓީ ކައުންސިލުން ވަނީ، މިނިސްޓްރީން އެކަމަށް ބޭނުންވާ ފައިސާ އެކަށީގެންވާ ގޮތެއްގައި ނުދޭކަަމަށް ތުހުމަތުކޮށްފައެވެ. ނަމަވެސް މިނިސްޓްރީން އެކަން ދޮގުކުރެއެވެ. އަދި މިނިސްޓްރީން ސިޓީ ކައުންސިލަށް ދޭ ފައިސާ ޚަރަދުވާގޮތުގެ ތަފްސީލް ހުށަހަޅަމުން ނުދާކަމަށްވެސް މިނިސްޓްރީން ދަނީ ތަކުރާރުކޮށް ބުނަމުންނެވެ.
