ވެރިކަމުގައި ތިބެގެން އަޅުގަނޑުމެން މުޒާހަރާ ކުރަން ޖެހޭ ސަބަބެއް ނުފެނޭ: ރައީސް
ވެރިކަމުގައި ތިބިއިރު ވެސް މުޒާހަރާ ކުރަނީ، އިދިކޮޅުގައި ތިބިއިރު ވެސް ކުރަނީ މުޒާހަރާ، ކޮންމެވެސް ހަމަޔަކާއި އުސޫލެއް އޮންނަން ޖެހޭނެ ނޫންތޯ
އެމްޑީޕީގެ ރިޔާސީ ޕްރައިމަރީ ކެމްޕެއިނަށް ދަރުބާރުގޭގައި މާލޭ ސިޓީގެ ރައްޔިތުންނާ ރައީސް ބައްދަލުކުރެއްވުން
ވެރިކަމުގައި ތިބެގެން މުޒާހަރާ ކުރަން ޖެހޭ ސަބަބު ފެނިވަޑައިނުގަންނަވާ ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވިދާޅުވެއްޖެއެވެ.
އެމްޑީޕީގެ ރިޔާސީ ޕްރައިމަރީ ކެމްޕެއިނަށް ދަރުބާރުގޭގައި މާލޭސިޓީގެ ރައްޔިތުންނާއި ބައްދަލު ކުރައްވައި ރައީސް ވިދާޅުވީ މުޒާހަރާ ކުރަން ޖެހޭނެ، އިހުތިޖާޖު ކުރަން ޖެހޭނެ، ފެންނަ ގޮތް ހާމަކުރަން ޖެހޭނެ ކަމަށެވެ.
ރައީސް އިތުރަށް ވިދާޅުވީ ހުރިހާ އެންމެން ވެސް ވިސްނަން ޖެހޭ މުހިންމު ކަމެއް އެބައޮތް ކަމަށެވެ. އެއީ ވެރިކަމަށް ގޮސް މުޒާހަރާ ކުރާނީތޯ ނޫނީ މަގުމަތީގައި ތިބެގެން މުޒަހާރާ ކުރާނީތޯ ކަމަށެވެ.
މާލޭ ރައްޔިތުންނާއި ބައްދަލުކުރާއިރު އެ ރައްޔިތުންގެ އިހުސާސް އެނގިވަޑައިގަންނަވާ ކަމަށާއި އެ ރައްޔިތުން ބޭނުންވާ ބައެއް ކަންތައްތަކުގެ ތެރޭގައި ބޯހިޔާވަހިކަމާއި ޓްރެފިކަށް ހައްލު ހޯދައިދޭން އެދޭ ކަމަށާއި މާލޭގެ މަގުތަކަކީ އަމާންތަނަކަށް ހަދައިދިނުމަށް ވެސް އެ ރައްޔިތުން އެދޭ ކަމަށް ވިދާޅުވިއެވެ.
ރައީސް އިތުރަށް ވިދާޅުވީ ބޯހިޔާވަހިކަމުގެ މަޝްރޫއުތައް ކުރިއަށްދާއިރު އެ ވާހަކަތައް ދައްކަނީ އޮޅުވާލައިގެން ވޯޓް ހޯއްދަވަން ނޫން ކަމަށާއި އެމަނިކުފާނުގެ ވައުދުފުޅާ އެއްގޮތަށް މިއަހަރުގެ މެދެއްހާ ހިސާބުގައި މާލޭގެ ރައްޔިތުންނަށް ގޯތި ކަނޑާދެއްވާނެ ކަމަށެވެ.
މިހާރު ފަށައިގެން ކުރިއަށް ގެންދަނީ މުހިންމު ކެމްޕޭނެއް ކަމަށް ވެސް ރައީސް ވިދާޅުވިއެވެ.
