އާރަށް ޓޫރިޒަމްގެ ބޭނުމަށް ދޫކުރުމުގެ މާކުރިން އެރަށުގައި ރިސޯޓު ތަރައްޤީކުރަން ޝައުޤުވެރިކަން ފާޅުކުރަން ޓޫ.ޖީގެ ބޯޑުން އޮތީ ފާސްކޮށްފައިކަމަށް ކްރިމިނަލް ކޯޓުގެ ޙުކުމުގައި ވަނީ ބުނެފައެވެ.
ވ އާރަށް ޓޫރިސްޓު ރިސޯޓެއްގެ ގޮތުގައި ތަރައްޤީ ކުރުމަށްޓަކައި ޝައުޤުވެރިކަން ފާޅުކޮށް، ޔޫސުފް ނައީމްގެ ހިއްސާ އޮންނަ ޓޫޖީ ޕްރައިވެޓް ލިމިޓެޑުގެ ބޯޑުން ވަނީ އެކްސްޕްރެޝަން އޮފް އިންޓްރެސްޓް ސިޓީއެއް ހުށައެޅުމަށް ފާސްކޮށްފައެވެ.
ޓޫ.ޖީ ޕްރައިވެޓް ލިމިޓެޑުގެ ބޯޑުން އެގޮތަށް ފާސްކޮށްފައިވަނީ 22 އޯގަސްޓު 2015 ގައެވެ.
އެހެންނަމަވެސް އެއީ މިނިސްޓްރީ އޮފް ފިޝަރީޒް އެންޑް އެގްރިކަލްޗަރ އިން ވ އާރަށް ޓޫރިޒަމް މިނިސްޓްރީގެ ދަށަށް ބަދަލު ކުރުމުގެވެސް މާ ކުރީގެ ތާރީޚެކެވެ. އެގޮތުން ވ އާރަށް ޓޫރިޒަމް މިނިސްޓްރީގެ ދަށަށް ބަދަލުކޮށްފައިވަނީ 25 އޯގަސްޓު 2015 ގައެވެ.
އެކަން ފާހަގަކޮށް ޙުކުމުގައި ބުނެފައިވަނީ، އެ ތާރީޚުގައި ވ އާރަށުގައި ޓޫރިސްޓު ރިސޯޓެއް ތަރައްޤީ ކުރުމުގެ ޝައުޤުވެރިކަން ފާޅުކުރަން ޓޫޖީ ޕްރައިވެޓް ލިމިޓެޑަށް އެނގުނު ގޮތެއް މި މައްސަލައިގެ ލިއެކިއުންތަކުން ފެންނާކަށް ނެތް ކަމަށެވެ.
25 އޯގަސްޓު 2015 ގައި ވ އާރަށް ޓޫރިޒަމް މިނިސްޓްރީގެ ދަށަށް ބަދަލު ކުރުމުން، ޖެހިގެން އައި ސެޕްޓެމްބަރު މަހުގެ 9 ވަނަ ދުވަހު ޓޫރިޒަމް މިނިސްޓްރީން ވަނީ އެ ރަށް އެމްއެމްޕީއާރްސީއަށް ލީސްކޮށްފައެވެ.
އަދި ހަމަ އެ ދުވަހު ވ އާރަށުގެ ލީސް ހޯލްޑިންގ ރައިޓްސް ޓޫ.ޖީ ޕްރައިވެޓް ލިމިޓެޑަށް ބަދަލު ކުރުމުގެ ހުއްދައަށް އެމްއެމްޕީއާރްސީން ޓޫރިޒަމް މިނިސްޓްރީގައި އެދުނެވެ. މިނިސްޓްރީން އެކަމުގެ ހުއްދަވެސް ހަމަ އެ ދުވަހުން ދުވަހަށް ވަނީ ދީފައެވެ.
އެ ދުވަހު ހިނގާދިޔަ އިތުރު ކަންކަމަށް ބަލާއިރު، އާރަށުގެ ލީސް ހޯލްޑް ރައިޓްސް ދެމިލިއަން އެމެރިކާ ޑޮލަރަށް ވިއްކާލުމަށް އެމްއެމްޕީއާރްސީއާއި، ޓޫ.ޖީ ޕްރައިވެޓް ލިމިޓެޑާ ދެމެދު އެގްރީމަންޓެއް ވެފައިވެއެވެ. އެ އެގްރީމަންޓުގައި އެމްއެމްޕީއާރްސީގެ ފަރާތުން އަބްދުﷲ ޒިޔަތު ސޮއިކުރައްވާފައިވާއިރު، ޓޫ.ޖީ ޕްރައިވެޓް ލިމިޓެޑުގެ ފަރާތުން ސޮއި ކުރެއްވީ ޔޫސުފް ނައީމެވެ.
އޭގެ އިތުރުން، އާރަށް ތަރައްޤީ ކުރުމަށް އެމްއެމްޕީއާރްސީއަށް ލިބިފައިވާ ޙައްޤުތައްވެސް ޓޫ.ޖީ ޕްރައިވެޓް ލިމިޓެޑަށް ބަދަލުކޮށް ހަމަ އެ ދުވަހު "ޑީޑް އޮފް އެސައިންމަންޓް" އެއްގައިވެސް ހަމަ އެ ފަރާތްތަކުން ސޮއިކޮށްފައިވެއެވެ.
އެ ދުވަހު ވ އާރަށުގެ ލީސް ހޯލްޑިންގ ރައިޓްސް ޓޫ.ޖީއަށް ބަދަލު ކުރުމުގެ ކަންކަން ނިމުމާއެކު، ޓޫ.ޖީ ކުންފުނިން ވަނީ އެމްއެމްޕީއާރްސީއަށް 1 މިލިއަން ޑޮލަރުގެ ޗެކެއް ޙަވާލުކޮށްފައެވެ. އެއީ ޔޫސުފް ނައީމްގެ ހިއްސާ އޮންނަ އެލްއޭ ރިސޯޓްސްގެ ނަމުގައި ދޫކޮށްފައިވާ ޗެކެކެވެ.
އެ ޗެކް އެސްއޯއެފްގެ އެކައުންޓަށް ޖަމާކޮށްފައިވަނީ 10 ސެޕްޓެމްބަރުގައެވެ.
އަދި ހަމަ 9 ސެޕްޓެމްބަރުގައި ޔޫސުފް ނައީމަށްވެސް އެލްއޭ ރިސޯޓްސްއިން 1 މިލިއަން ޑޮލަރުގެ ޗެކެއް ދޫކޮށްފައިވެއެވެ. އެ ޗެކް ޔޫސުފް ނައީމްގެ އެކައުންޓަށް ޖަމާވީ 14 ސެޕްޓެމްބަރުގައެވެ.
ޖެހިގެން އައި ދުވަސް (15 ސެޕްޓެމްބަރު) ގައި ޔޫސުފް ނައީމް ވަނީ އެ ޗެކު ޖަމާވި އެކައުންޓުން، ޔާމީނަށް 1 މިލިއަން ޑޮލަރުގެ ޗެކެއް ދޫކުރައްވާފައެވެ. އެހިސާބުން ބޭންކުން ސުވާލު ކުރުމުން ޔޫސުފް ނައީމް ވިދާޅުވެފައިވަނީ އެއީ ވިޔަފާރީގެ މުއާމަލާތެއް ކަމަށެވެ.
މި މައްސަލައިގެ ތަހުގީގުގައި ޔާމީނާއި ޔޫސުފް ނައީމްވެސް ހެއްކެއް ހުށައަޅާފައެއް ނުވެއެވެ. ނަމަވެސް މައްސަލައިގެ ޝަރީއަތް ފެށުމުން، އެއް ހެކިތަކެއް ހުށައަޅާފައިވާއިރު، ހުރިހާ ހެކިވެރިންވެސް ވަނީ ޔާމީނާއި ޔޫސުފް ނައީމާ ދެމެދު ވެފައިވަނީ ޑޮލަރު މާރު ކުރުމުގެ ވިޔަފާރީގެ މުއާމަލާތެއްކަމަށް ހެކިބަސް ދީފައެވެ.
އެހެންނަމަވެސް، އެ ހެކިވެރިންނަކީ އޮޅުވާލައިގެން، ވަކި ކަމެއް ވަކި ގޮތަކަށް ހިނގިކަން ދެއްކުމަށް އުފައްދާފައިވާ ހެކިންކަން ސާބިތުވާކަމަށް ޙުކުމުގައި ބުނެއެވެ.
ވުމާއެކު، މަނީ ލޯންޑަރިންގ އަދި ރިޝްވަތު ޤަބޫލު ކުރުމުގެ ކުށުގެ ދައުވާ ސާބިތުވެ ޔާމީނަށް 11 އަހަރުގެ ޖަލު ޙުކުމެއް ވަނީ އިއްވާފައެވެ. އަދި 5 މިލިއަން ޑޮލަރުން ވަނީ ޖޫރިމަނާވެސް ކޮށްފައެވެ.
ރަށްތައް ދެވޭ އިންވެސްޓަރުންގެ އަތުން ރައީސް ޔާމީނު އެކި ގޮތްގޮތުން ފައިސާ އަތުލަމުން ދިޔަ ކަމަށާއި، އެމީހުންނަށް ރަށްތައް ދޫކުރަމުން ދިޔައީވެސް އެކިކަހަލަ މަންފާތަކާއި ފައިސާ ދިނުމަށް ޝަރުތުކޮށްގެންކަން އެނގެން އޮންކަމަށް ޙުކުމުގައިވެއެވެ.
މި މައްސަލައަކީވެސް ހަމައެގޮތަށް ޔާމީނުގެ ގާތް ރައްޓެއްސެއްކަމަށްވާ ޔޫސުފް ނައީމަށް ރަށް ދިނުމުގެ މުޤާބިލުގައި ރިޝްވަތު ދިނުމުން ކޮށްފައިވާ މުއާމަލާތެއްކަން ހެކި ޤަރީނާތަކުން އެނގޭކަމަށް ވަނީ ބަޔާންކޮށްފައެވެ.
