އާއިލީ މައްސަލައެއްގެ ތެރެއިން ހިނގި މާރާމާރީއަކާ ގުޅިގެން 25 އަހަރުގެ އަންހެނަކު ފުލުހުންގެ ބެލުމުގެ ދަށަށް ގެންގޮސްފިއެވެ.
ފުލުހުން ބުނީ، ހެންވޭރު ގެއެއްގެ ތެރޭގައި 2 މީހެއްގެ ދެމެދުގައި ހިނގި މި ހަމަނުޖެހުމުގައި ތޫނު އެއްޗަކުން ޙަމަލާ ދީފައިވާކަމުގެ މައުލޫމާތު ފުލުހުންނަށް ލިބިފައިވަނީ ބުދަ ދުވަހުގެ މެންދުރު 12:21 ހާއިރު ކަމަށެވެ.
މިހާތަނަށް ބެލި ބެލުމުން މިއީ އާއިލީ މައްސަލައެއްގެ ތެރެއިން ހިނގި މާރާމާރީއެއްކަން ފާހަގަކޮށް ފުލުހުން ބުނީ، މި މާރާމާރީގައި ޒަޚަމްވި މީހާ ސެނަހިޔާ ހޮސްޕިޓަލަށް ގެންގޮސް ފަރުވާ ދީފައިވާ ކަމަށެވެ.
މި މާރާމާރީގައި އަނިޔާވެފައިވަނީ 37 އަހަރުގެ ދިވެހި ފިރިހެނަކަށެވެ. އަދި މި މައްސަލައާ ގުޅިގެން ޙަމަލާ ދިން މީހާ ފުލުހުންގެ ބެލުމުގެ ދަށަށް ގެންގޮސްފައިވާއިރު، އެއީ 25 އަހަރުގެ ދިވެހި އަންހެނެއްކަމަށް ފުލުހުން ބުނެއެވެ.
މި މައްސަލައާ ގުޅިގެން އިތުރަށް ބަލަންޖެހޭ ކަންކަން ފުލުހުން ގެންދަނީ ބަލަމުންނެވެ.
