ދައުލަތުގެ ނަމުގައި ގެރެންޓީ ދޫކުރުމުގެ އުސޫލުގެ ދަށުން ގެރެންޓީއަށް އެދެވޭނީ 4 ދާއިރާއަކުން
މި އުސޫލުގެ ދަށުން އަމިއްލަ ފަރުދުންނަކަށް ގެރެންޓީ ދުލެއް ނުކުރެވޭނެ
ފިނޭންސް މިނިސްޓްރީ
ދައުލަތުގެ ނަމުގައި ގެރެންޓީ ދޫކުރުމުގެ އުސޫލު ދިވެހި ސަރުކާރުގެ ގެޒެޓުގައި ޝާއިއުކޮށް އަމަލުކުރަން ފަށައިފިއެވެ.
މިއީ، ދައުލަތުގެ ނަމުގައި ގެރެންޓީ ދޫކުރުމުގައި މިނިސްޓްރީން ބަލާނެ މިންގަނޑުތަކާއި، ދައުލަތުގެ ނަމުގައި ގެރެންޓީއެއް ދިނުމަށް އެދި ހުށަހަޅަންޖެހޭ ގޮތާއި، ގެރެންޓީ ދޫކުރެވޭނެ ފަރާތްތަކުގެ ކިބައިގައި ފުރިހަމަވާންޖެހޭ ޝަރުޠުތައް ބަޔާންކުރުމުގެ ގޮތުން، ދައުލަތުގެ މާލިއްޔަތުގެ ޤާނޫނާއި، ދައުލަތުގެ މާލިއްޔަތުގެ ގަވާއިދުގެ ދަށުން އެކުލަވާލާފައިވާ އުސޫލެކެވެ.
މި އުސޫލުގެ މައިގަނޑު މަޤްސަދުތަކުގެ ތެރޭގައި ދައުލަތުގެ މާލިއްޔަތުގެ ޤާނޫނާއި، ދައުލަތުގެ ޚަރަދަށް ޒިންމާވުމުގެ ޤާނޫނުގެ އިތުރުން، ދައުލަތުގެ މާލިއްޔަތުގެ ގަވާއިދުގައި ބަޔާންކޮށްފައިވާ ގޮތުގެ މަތީން ދިވެހި ދައުލަތުގެ ނަމުގައި ގެރެންޓީ ދޫކުރުމުގެ ނިޒާމު ކަނޑައެޅުން ހިމެނެއެވެ.
އޭގެ އިތުރުން، ޤައުމުގެ އިޤްތިޞާދީ ހާލަތަށާއި، ސަރުކާރުގެ މާލީ ސިޔާސަތުތަކަށާއި، ތަރައްޤީގެ ޕްލޭންތަކަށް ރިޢާޔަތްކުރެވިގެން، ދެފުށް ފެންނަ، ހަރުދަނާ އުސޫލެއްގެ ދަށުން، ދައުލަތުގެ ނަމުގައި ގެރެންޓީ ދޫކުރުމަށް މަގުފަހިކުރުންވެސް މި އުސޫލުގެ މަޤްސަދުތަކުގެ ތެރޭގައި ހިމެނެއެވެ.
އުސޫލުގައި ބުނެފައިވާ ގޮތުން ދައުލަތުގެ ނަމުގައި ގެރެންޓީ ދޫކުރެވޭނީ، ސަރުކާރުން އިސްކަންދޭ ބޮޑެތި މަޝްރޫޢުތައް ހިންގުމަށް ނުވަތަ މިނިސްޓަރު ހުއްދަދޭ މާލީ މުޢާމަލާތްތަކާ ގުޅިގެން ހުށަހަޅާ، އަދި ވަކި ޝަރުޠުތައް ފުރިހަމަވާ ފަރާތްތަކަށެވެ.
އޭގެ ތެރޭގައި ހިމެނެނީ ސަރުކާރު ހިއްސާވާ ކުންފުނިތަކާއި، ސަރުކާރު ހިއްސާވާ ކުންފުނިތަކުގެ ސަބްސިޑިއަރީތަކުގެ އިތުރުން، ދިވެހިރާއްޖޭގައި ވިޔަފާރިކުރަން ރަޖިސްޓަރީ ކޮށްފައިވާ ނުވަތަ ރީ -ރަޖިސްޓަރީ ކޮށްފައިވާ ކުންފުނިތަކާއި، ދައުލަތުގެ މުސްތަޤިއްލު މުއައްސަސާތަކާއި، ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނުން އުފައްދައިފައިވާ ކައުންސިލްތަކެވެ.
މި އުސޫލުގެ ދަށުން ގެރެންޓީއަށް އެދި ހުށަހެޅޭނީ 4 ދާއިރާއަކުންނެވެ. އެއީ ފަތުރުވެރިކަމުގެ ދާއިރާގެ ތަރައްޤީގެ މަޝްރޫޢުތައް ހިންގުމަށާއި، ސަރުކާރުން ހުށަހަޅާ ޝަރުޠުތަކާ އެއްގޮތަށް ސޯޝަލް ހައުސިންގ މަޝްރޫޢުތައް ހިންގުމަށާއި، ތަރައްޤީގެ މަޝްރޫޢެއްގެ ގޮތުގައި އިސްކަންދިނުމަށް ސަރުކާރުން ނިންމާ މަޝްރޫޢުތައް ހިންގުމުގެ އިތުރުން، ފިނޭންސް މިނިސްޓަރު ހުއްދަދޭ މާލީ މުޢާމަލާތްތައް ކުރުމަށެވެ.
މި އުސޫލުގެ ދަށުން އަމިއްލަ ފަރުދުންނަކަށް ގެރެންޓީ ދުލެއް ނުކުރެވޭނެއެވެ.
އޭގެ އިތުރުން، ގެރެންޓީއަށް އެދި ހުށަހަޅާ ފަރާތްތަކުން ސަރުކާރުގެ އެއްވެސް އިދާރާއަކަށް އަދި މާލީ އިދާރާއަކަށް ދައްކަންޖެހޭ ފައިސާއެއް ދައްކަންޖެހޭ އުސޫލުން ނުދައްކާ އޮވެފައި، އެ ފައިސާއެއް ދައްކާނެ ގޮތަކާމެދު އެއްބަސްވުމަކަށް އާދެވިފައިނުވާނަމަ، އެއީ ގެރެންޓީ ދޫ ނުކުރެވޭނެ ފަރާތެކެވެ.
އަދި ގެރެންޓީއަށް އެދި ހުށަހަޅާ ފަރާތްތަކުން އެއްވެސް ޝަރުޢީ ޙުކުމަކާ ނުވަތަ ދަރަންޏަކާ ގުޅިގެން ދައްކަން ޖެހޭ ފައިސާއެއް ނުދައްކައި އޮވެފައި، އެ ފައިސާއެއް ދައްކާނެ ގޮތަކާމެދު އެއްބަސްވުމަކަށް އާދެވިފައިނުވާނަމަވެސް ގެރެންޓީ ދުލެއް ނުކުރެވޭނެއެވެ.
ގެރެންޓީ ދޫކުރުމާބެހޭ އެންމެހައި އިދާރީ ކަންކަން ބަލަހައްޓާނީ ފިނޭންސް މިނިސްޓްރީންނެވެ.
އަދި ގެރެންޓީއަށް އެދި ހުށަހަޅާ ފަރާތުން ހުށަހަޅާ ހުރިހާ ލިޔެކިޔުންތަކާއި، ކަމާބެހޭ އެހެން ހުރިހާ ކަމެއް ބެލުމަށްފަހު، ގެރެންޓީ ދޫކުރުމަށް މިނިސްޓަރަށް ފެނިއްޖެނަމަ، ގެރެންޓީ ދޫކުރުމުގައި ރައީސުލްޖުމްހޫރިއްޔާގެ ހުއްދައަށް އެދި ފޮނުވަންވާނެކަމަށް އުސޫލުގައި ބުނެއެވެ.
އަދި ރައީސުލްޖުމްހޫރިއްޔާ ހުއްދަ ދެއްވައިފިނަމަ، ގެރެންޓީގެ ލިޔުން ދޫކުރަންވާނެކަމަށް ވަނީ ބަޔާންކޮށްފައެވެ.
