ބޮސްނިއާ އެންޑް ހަރޒަގޮވިނާގެ ފޮރިން މިނިސްޓަރު ރައީސްގެ އަރިހަށް އިހުތިރާމުގެ ޒިޔާރަތެއް ކުރައްވައިފި
މިއީ އެ ޤައުމުގެ މަތީ ފަންތީގެ މަންދޫބަކު ރާއްޖެއަށް ޒިޔާރަތްކުރެއްވި ފުރަތަމަ ފަހަރު
ރައީސް ސާލިހު ބޮސްނިއާ އެންޑް ހަރޒަގޮވިނާގެ މިނިސްޓަރާ ބައްދަލު ކުރައްވަނީ
ބޮސްނިއާ އެންޑް ހަރޒަގޮވިނާގެ މިނިސްޓަރ އޮފް ފޮރިން އެފެއާޒް ޑރ. ބިސޭރާ ޓުރްކޮވިޗް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ އަރިހަށް އިޙުތިރާމުގެ ޒިޔާރަތެއް ކުރައްވައިފިއެވެ.
ޑރ. ބިސޭރާއަށް މަރުހަބާ ވިދާޅުވެ ރައީސް ވަނީ މިއީ ބޮސްނިއާ އެންޑް ހަރޒަގޮވިނާގެ މަތީ ފަންތީގެ މަންދޫބަކު ރާއްޖެއަށް ޒިޔާރަތްކުރެއްވި ފުރަތަމަ ފަހަރުކަން ފާހަގަކުރައްވާފައެވެ.
ބޮސްނިއާގެ ޚާރިޖީ ވަޒީރު ވަނީ މިއަހަރަކީ ދެ ޤައުމުގެ ދެމެދުގައި ސިޔާސީ ގުޅުން ޤާއިމުކުރިތާ 25 އަހަރު ފުރޭ އަހަރުކަން ފާހަގަކުރައްވައި ރައީސްއަށް ހެޔޮއެދުންތައް އަރިސްކުރައްވާފައެވެ. އަދި މި ބައްދަލުކުރެއްވުމުގައި، ފަތުރުވެރިކަމުގެ ދާއިރާއާއި މަތީ ތައުލީމުގެ ދާއިރާއާއި ޒުވާނުންގެ ތަރައްގީއާއި ގިނަ ޤައުމުތައް އެކުވެގެން ބައިނަލްއަޤްވާމީ މައިދާނުގައި އެއްބާރުލުން އިތުރުކުރުން ފަދަ ދެ ޤައުމުން އިސްކަންދޭ މުހިންމު ކަންކަމާ ގުޅޭގޮތުން ދެ ބޭފުޅުން މަޝްވަރާކުރެއްވިއެވެ.
މި ބައްދަލުކުރެއްވުން ނިންމަވާލައްވާފައި ވަނީ ކުރިމަގުގައި ވެސް ދެ ޤައުމުން އިސްކަންދޭ މުހިންމު ކަންކަމުގައި ގުޅިގެން މަސައްކަތް ކުރެއްވުމުގެ ޔަޤީންކަން ދެއްވަމުންނެވެ.
ދިވެހިރާއްޖެއާ ބޮސްނިއާ އެންޑް ހަރޒަގޮވިނާއާ ދެމެދު ސިޔާސީ ގުޅުން ޤައިމުކޮށްފައި ވަނީ 27 ޖެނުއަރީ 1997ގައެވެ.
