މާމެންދޫ ރަށް ގިރުމުގެ މައްސަލަ ސަރުކާރުގެ ސަމާލުކަމަށް ގެނައުމަށް ކައުންސިލުގެ ޖަލްސާ ރަށް ގިރާ ސަރަޙައްދުގައި
ރަށް ގިރުމުގެ ސަބަބުން ބައެއް އާންމު ގެތަކަށްވެސް މިހާރު ވަނީ އެކަމުގެ ތަކުލީފު އުފުލަން ޖެހިފައި
މާމެންދޫ ކައުންސިލު ބައްދަލުވުން އެރަށު ގޮނޑުދޮށުގައި
މާމެންދޫ ރަށް ގިރުމުގެ މައްސަލަ ސަރުކާރުގެ ސަމާލުކަމަށް ގެނައުމަށް، ކައުންސިލް ޖަލްސާ ގޮނޑުދޮށުގައި ބާއްވައިފިއެވެ.
އަންގާރަ ދުވަހު މާމެންދޫ ކައުންސިލުގެ ބައްދަލުވުން އެރަށު ގޮނޑުދޮށުގައި ބާއްވާފައިވާއިރު، ބައްދަލުވުމުގައި އެޖެންޑާ ކޮށްފައިވާ ކަންކަމުގެ ތެރޭގައި ރަށް ގިރާ މައްސަލަ ރައީސުލްޖުމްހޫރިއްޔާގެ ސަމާލުކަމަށް ގެނައުން ހިމެނެއެވެ. އެ ސަރަޙައްދުގައިވެސް މި މައްސަލައާ ގުޅުންހުރި ބޯޑުތައް ބަހައްޓާފައި ހުއްޓެވެ.
މިއީ މާމެންދޫ ކައުންސިލުގެ 4 ވަނަ ދައުރުގެ 78 ވަނަ ޖަލްސާއެވެ.
ކައުންސިލުން މައުލޫމާތު ދޭ ގޮތުގައި ރަށް ގިރުމުގެ މައްސަލައަކީ އެރަށަށް ދިމާވެފައިވާ ބޮޑު މައްސަލައެކެވެ. އެގޮތުން ކައުންސިލުގެ ކުރީގެ ދައުރުގައިވެސް އެކަމަށްޓަކައި ގިނަ މަސައްކަތްތަކެއް ކުރެވިފައިވާކަމަށް ކައުންސިލުން މައުލޫމާތުދެއެވެ.
އޭގެ އިތުރުން، އެންވަޔަރމަންޓް މިނިސްޓްރީންވެސް އެރަށަށް ޒިޔާރަތްކޮށް، ރަށް ގިރުމުގެ މައްސަލަ އޮތް ޙާލަތު މީގެ ކުރިންވެސް ބަލާފައިވާ ކަމަށާއި، އެކަމަށް ޙައްލު ހޯދައިދިނުމަށް މަސައްކަތް ކުރާނެކަމަށް ބުނެފައިވާކަން ކައުންސިލުން ފާހަގަ ކުރެއެވެ. މި މައްސަލަ އެކި ފަހަރުމަތިން ކައުންސިލުން ވަނީ ސަރުކާރުގެ ކަމާ ގުޅުންހުރި މުއައްސަސާތަކުގެ ސަމާލުކަމަށް ގެނެސްފައެވެ.
ރަށުގެ އުތުރުކޮޅު ގިރާ ސަރަޙައްދުގައި ކުރިއަށް ދިޔަ މި ޖަލްސާގައި މެންބަރުން ފާހަގަކޮށްފައިވާ ގޮތުގައި ރަށް ގިރުމުގެ ސަބަބުން ބައެއް އާންމު ގެތަކަށްވެސް މިހާރު ވަނީ އެކަމުގެ ތަކުލީފު އުފުލަން ޖެހިފައެވެ. އެކަމާ ގުޅޭގޮތުން އަތޮޅު ކައުންސިލުންވެސް ކަމާ ގުޅުންހުރި އިދާރާތަކަށް މައްސަލަ ހުށަހަޅާފައިވާކަން ކައުންސިލުން ފާހަގަކުރެއެވެ.
މިއީ މިހާރުން މިހާރަށްވެސް ޙައްލު ހޯދަން ޖެހިފައިވާ މައްސަލައެއްކަމަށް ކައުންސިލުން ބުނެއެވެ. ވަކިން ޚާއްސަކޮށް މިއީ ރައްޔިތުންގެވެސް ނުހަނު ކަންބޮޑުވުމެއް އޮތް ކަމެކެވެ. އެގޮތުން ގެތައް ރިލޮކޭޓް ކުރުމުގެ ބިރު އޮތުމާއި، ފެނުގެ ނިޒާމަށް އަސަރު ކުރުން ފަދަ ކަންބޮޑުވުންތައް ހުރިކަމަށް ކައުންސިލް ޖަލްސާގައި މެންބަރުން ވަނީ ފާހަގަކޮށްފައެވެ.
ގއ މާމެންދޫއަކީ އެ އަތޮޅުގައި ރަށް ގިރުމުގެ މައްސަލަ އެންމެ ބޮޑަށް ދިމާވެފައިވާ ރަށްކަން ފާހަގަކޮށް ހުރިހާ މެންބަރުންވެސް ވަނީ ވީހާވެސް އަވަހަށް ސަރުކާރުން އެ މައްސަލައަށް ޙައްލެއް ގެނައުމަށް ގޮވާލާފައެވެ.
އަދި މި މައްސަލަ ރައީސްގެ ސަމާލުކަމަށް ގެނައުމުގެ އިތުރުން، އަމަލީ ގޮތުންވެސް މި މައްސަލަ ހައްލު ކުރުމަށް ކައުންސިލުން ކުރެވިދާނެ ކަންކަމާއި ގުޅޭގޮތުން ވަނީ މަޝްވަރާކޮށްފައެވެ.
