ސަހަރާ ކޮނުނީ ބަޔަކު ރުގްޔާކުރަން، ފުލުހުންނަށް ކައުންސިލުން ހުއްދައެއް ނުދެން - ނޮޅިވަރަންފަރު ކައުންސިލް
ކޮނެފައިވަނީ ކުޑަކުއްޖެއްގެ މަހާނަ
ނޮޅިވަރަންފަރު ސަހަރާގައި ކޮނުނު މަހާނަ
ސަރަހާ ކޮނުނީ ރުގްޔާކުރުމަށް ކަމަށާއި، ފުލުހުން އެކަމަށް އެދުނު ނަމަވެސް ކައުންސިލުން އެއްވެސް ސިފައެއްގައި އެކަމަށް ހުއްދަ ދީފައި ނުވާނެކަމަށް ބުނެ، ނޮޅިވަރަންފަރު ސަހަރާ ކޮނުނު މައްސަލައިގައި ފުލުހުން ދެއްކި ވާހަކަ އެ ރަށު ކައުންސިލުން ދޮގުކޮށްފިއެވެ.
މިކަމާއި ގުޅިގެން ފުލުހުން ބުނެފައިވަނީ ފުލުހުންނަށް ހުށަހަޅާފައިވާ މައްސަލައަކާއި ގުޅިގެން، ނޮޅިވަަރަންފަރު ސަހަރާ ހޯމަ ދުވަހުގެ ރޭގެ ވަގުތެއްގައި ރަށު ކައުންސިލްގެ އެހީތެރިކަމާއެކުގައި ބަލާފާސްކޮށްފައިވާ ކަމަށެވެ. އަދި މި މައްސަލަ ފުލުހުން ތަހުގީގުކުރަމުން އަންނަ ކަމަށް ވެސް ފުލުހުން ވަނީ ބުނެފައެވެ. މައްސަލައިގެ އިތުރު ތަފްސީލެއް ހާމައެއް ނުކުރެއެވެ.
މިކަމާއި ގުޅިގެން ނޮޅިވަރަންފަރު ކައުންސިލްގެ ރައީސް އަބްދުﷲ ނަދީމް ރާއްޖެއެމްވީއަށް މައުލޫމާތުދެއްވަމުން ވިދާޅުވީ ސަހަރާ ކޮންނަން ބޭނުންވާކަމަށް ބުނެ ފުލުހުން ކައުންސިލްގައި އެދުމުން، ކައުންސިލްގެ އިދާރީ މުވައްޒަފުންލައްވާ މިނިސްޓްރީއަށް ގުޅާއެކަމުގައި އަމަލުކުރަންވީ ގޮތެއް ސާފުކޮށްފައިވާ ކަމަށެވެ. އަދި އެކަން ނުކުރެވޭނެކަން މިނިސްޓްރީން އެންގުމުން، އެކަން ފުލުހުންނަށް އަންގާފައިވާ ކަމަށާއި، ނަމަވެސް ހޯމަ ދުވަހުގެ ރޭގަނޑު 11:30 ހާއިރު ސަހަރާ ކޮނެފައިވާ ކަމަށެވެ. އޭނާ ވިދާޅުވީ ފުލުހުންގެ ބޭނުމަކަށް އެތަން ކޮންނަ ކަމަށް ބުނި ނަމަވެސް، މަހާނަ ކޮނުނީ އާންމުންގެ މީހުން ކަމަށެވެ.
ކައުންސިލްގެ ރައީސް ވިދާޅުވީ މަހާނަ ކޮނުނު އިރު އެތަނުގައި ރުގްޔާ ކުރާ މީހަކާއި، ރުގްޔާ ކުރަން އެދުނު މީހާ ވެސް ހުރި ކަމަށެވެ. އަދި ކޮނެފައިވަނީ ވަރަށް ކުރީގެ މަހާނައެއް ކަމަށް ވެސް ކައުންސިލްގެ ރައީސް ވިދާޅުވިއެވެ. ކައުންސިލުން ހިއްސާކޮށްފައިވާ ފޮޓޯތަކުން ފެންނަނީ ކުޑަކުއްޖެއްގެ މަހާނައެވެ. އަދި މަހާނަ ކޮޅުގައި ހިރިގަލުން ހަދާފައި ހުރި މަހާނަގަލެއްވެސް ހުއްޓެވެ. މަހާނަ އެއްކޮށް ކޮނެފައި ނުވިނަމަވެސް މަހާނައިގެ ބޮލާ ދިމާލުން ތަންކޮޅެއް ކޮނެފައި ހުރިތަން ފޮޓޯތަކުން ފެނެއެވެ. އަދި ރުގްޔާކުރާ މީހާ އެތަނުން ނެގި ވެލިތައް ދަނޑިބުރިއަކުން ހާވާތަން ފެނެއެވެ.
