ފާއިތުވި 44 އަހަރުވަންދެން ޔޫއޭއީއާއި ރާއްޖެއިން ބާއްވާފައިވަނީ ނަމޫނާ ގުޅުމެއް: ޔޫއޭއީ
ޔުނައިޓެޑް އަރަބް އެމިރޭޓްސްގެ 51 ވަނަ ގައުމީ ދުވަސް ފާހަގަކުރުމުގެ ގޮތުން ރާއްޖޭގައި ވަނީ ހަފްލާއެއް ބާއްވާފައި
ޔޫއޭއީގެ ޗާޖްޑް އެފެއަރޒް، އަބްދުއްރަހްމާން މުހައްމަދު ހަމަދު ސައީދު އައްޝަމްސީ
ޔުނައިޓެޑް އަރަބް އެމިރޭޓްސް (ޔޫއޭއީ)އާ ރާއްޖެއާ ދެމެދު ފާއިތުވި 44 އަހަރުވަންދެން ބާއްވާފައިވަނީ ނަމޫނާ ގުޅުމެއް ކަަމަށް ޔޫއޭއީގެ ޗާޖްޑް އެފެއަރޒް، އަބްދުއްރަހްމާން މުހައްމަދު ހަމަދު ސައީދު އައްޝަމްސީ ވިދާޅުވެއްޖެއެވެ.
ޔުނައިޓެޑް އަރަބް އެމިރޭޓްސްގެ 51 ވަނަ ގައުމީ ދުވަސް ފާހަގަކުރުމުގެ ގޮތުން ރާއްޖޭގައި ބޭއްވި ހަފްލާގައި އޭނާ ވިދާޅުވީ، ދެ ގައުމުގެ ގުޅުމަކީ އިހުތިރާމާއި ރަހުމަތްތެރިކަމުގެ މައްޗަށް ބިނާވެފައިވާ ގުޅުމެއް ކަަމަށެވެ. ޔޫ.އޭ.އީގެ ކުރީގެ ރައީސް، އަބޫދާބީގެ އަމީރު އަދި ޔޫ.އޭ.އީގެ އާރމްޑް ފޯރސަސްގެ ސުޕްރީމް ކޮމާންޑަރ އައްޝައިޚު ޚަލީފާ ބިން ޒާއިދު އާލް ނަހްޔާންގެ ދައުރުން ފެށިގެން މިހާހިސާބަށް އައިއިރުވެސް ރާއްޖެއާ އެ ގައުމާ ދެމެދު އޮތީ ރަނގަޅު ގާތް ގުޅުމެއްކަަމަށް އޭނާ ވިދާޅުވިއެވެ. އިންސާނީ ހައްގުތައް ހިމާޔަތްކުރުމާއި، އިގްތިސާދީ ގޮތުންވެސް ދެ ގައުމުގެ ދެމެދުގައި ހަރުދަނާ ގުޅުމެއް ގާއިމްކޮށްފައިވާކަން އޭނާ ފާހަގަކުރެއްވިއެވެ. އެގޮތުން ފަގީރުކަން ނައްތާލުމާއި، ސިއްހީ ކާރިސާތަކާ ކުރިމަތިލުމުގެ އިތުރުން، މީހުން ބިނާކުރުމުގައިވެސް ޔޫއޭއީއާ ރާއްޖެއާ ދެމެދު އޮތީ ވަަރަށް ގާތް ގުޅުމެއްކަމަށް އޭނާ ވިދާޅުވިއެވެ. މީގެ އިތުރުން، ރާއްޖެއަކީ އެ ގައުމުގައި މަގްބޫލު މަންޒިލެއް ކަަމަށްވެސް ވިދާޅުވެފައިވެއެވެ.
އުނައިޓެޑް އަރަބް އެމިރޭޓްސްގެ 51 ވަނަ ގައުމީ ދުވަސް ފާހަގަކުރުމުގެ ގޮތުން ބޭއްވި ހަފްލާގައި ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދާއި ޑިފެންސް މިނިސްޓަރ މާރިޔާ އަހުމަދު ދީދީއާއި، ފޮރިން މިނިސްޓަރު އަބްދުﷲ ޝާހިދުގެ އިތުރުން މިނިސްޓަރ އޮފް އެންވަޔަރަމަންޓް ކްލައިމެޓް ޗޭންޖް އެންޑް ޓެކްނޮލޮޖީ އާމިނަތު ޝައުނާ ވަނީ ބައިވެރިވެވަޑައިގަންނަވާފައެވެ.
