ރާއްޖޭގެ ފޮރިން ކަރަންސީ މަދު، އަސާސީ ކަންކަމަށް ބޭނުންވާ ފައިސާއެއް ނެތް: ރައީސް ނަޝީދު

ރާއްޖޭގެ ފޮރިން ކަރަންސީ މަދު ކަމަށާއި ރާއްޖޭގައި އަސާސީ ކަންކަމަށް ބޭނުންވާ ފައިސާ ވެސް ނެތް ކަމަށް ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.

ރައީސް ނަޝީދު މިފަދައިން ވިދާޅުވީ ރައްޔިތުންގެ މަޖިލީހުގެ ރިޔާސަތުގައި ވާހަކަފުޅުދައްކަވަމުންނެވެ. ރައްޔިތުންގެ މަޖިލީހުގައި ބަޖެޓް ދިރާސާކުރިގޮތުގެ ރިޕޯޓަށް ބަހުސް ކުރުމަށް ފުރުސަތު ހުޅުވާލުމުގެ ކުރިން ރައީސް ނަޝީދު ވަނީ ރާއްޖޭގެ މާލީ ހާލަތު ގޯސްކަމަށް ސިފަކުރައްވާ ވާހަކަފުޅުދައްކަވާފައެވެ. ދިވެހި ދައުލަތުގެ ރިޒާވްގައި ފޮރިން ކަރެންސީ މަދުވުމުން ކުރިއަށް އޮތް ހަފްތާތަކުގައި ނުވަތަ ކުރިއަށް އޮތް މަސްތަކުގެ އަސާސީ ކަންކަމަށް ބޭނުންވާ ފައިސާ ނެތް ކަމަށް ވެސް ރައީސް ނަޝީދު ވަނީ ވިދާޅުވެފައެވެ. އެހެންނަމަވެސް އެ ވާހަކަތައް ބިނާކުރެއްވީ ކޮންކަމެއްގެ މައްޗަށް ކަމެއް ނުވަތަ ރިޒާވްގައި ހުރިި ފޮރިން ކަރެންސީއާ ގުޅޭ މައުލޫމާތެއް އެމަނިކުފާނު ހިއްސާއެއް ނުކުރައްވައެވެ. ރައީސް ނަޝީދު ވަނީ ރާއްޖޭގެ ރިޒަރވްގައި ފޮރިން ކަރަންސީ ނެތި، އެ ނޫން ގޮތަކަށް މަޖިލީހުގައި ވާހަކަދެއްކެވުމުން އެކަން ފާހަގަ ނުކުރައްވާ ދޫކޮށްލައްވަން ބޭނުންފުޅު ނުވާ ކަމަށް ރައީސް ނަޝީދު ވިދާޅުވިއެވެ. ރާއްޖޭގެ ރިޒަރވްގައި ފައިސާ ނެތް ވާހަކަ ނުދެއްކުމަކީ އޮޅުވާލުންކަމަށް ވެސް އެމަނިކުފާނު ވަނީ ސިފަކުރައްވާފައެވެ.

ރައީސް ނަޝީދު މިފަދައިން ވިދާޅުވި ނަމަވެސް ރާއްޖޭގެ ރިޒަރވް ދަށްވެ، އަސާސީ ކަންކަން ނުފުދޭ މިންވަރަށް ހާލަތު ދަށްވި ކަމަށް ކަމާ ބެހޭ އިދާރާއަކުން މިހާތަނަށް އައި އިރު ފާހަގަކޮށްފައެއް ނުވެއެވެ. އަދި ކުރިއަށް އޮތްތަނުގައި ރިޒަރވްގައި ހުރި ފޮރިން ކަރަންސީގެ އަދަދު ރަނގަޅުވާނެ ކަމަށް ވެސް ސަރުކާރުން އުންމީދުކުރެއެވެ. އަންނަ އަހަރު ރާއްޖޭގެ އިގްތިޞާދު ރަނގަޅުވާނެ ކަމަށް ކަމާއި ބެހޭ ފަރާތްތަކުން ލަފާކުރެއެވެ.