ބައެއް މީހުން ވާހަކަދައްކާއިރު ސަބްޓައިޓްލް އަރާނަމައޭ ހިތަށްއަރާތަ؟ އެހެންވިއްޔާ މިއޮތީ ހައްލު

ޒަމާނީ ކުރިއެރުމާއި ޓެކްނޮލޮޖީގެ ތެރެއިން އިންސާނީ ދަރިފަސްކޮޅާ ބައްދަލުކުރި އެންމެ އިންގިލާބީ އެއް އީޖާދަކީ، މަސްނޫއީ ތޫނުފިލިކަން ނުވަތަ އޭއައި ޓެކްނޮލޮޖީއެވެ. އޭއައި ޓެކްނޮލޮޖީގެ އެހީގައި ދިރިއުޅުމުގެ މައިދާނަށް ހީވެސްނުކުރާފަދަ އެތައް ބަދަލެއް އަންނަމުންދާއިރު، މިއީވެސް އެފަދަ ވާހަކައެކެވެ. މިއީ އޭއައި ޓެކްނޮޖީގެ ބާރު ހިނގާ އައިނެއްގެ ވާހަކައެވެ. މި އައިނު ޚާއްސަ ވަނީ، ބީރު މީހުންނަށެވެ.

އަޑު އިވުމުގެ ހިއްސަށް ދިމާވެފައިވާ މައްސަލައެއް ނުވަތަ މައްސަލަތަކެއްގެ ސަބަބުން އިތުރު އެހީއަކަށް ބޭނުންވާ މީހުންނަށް ޚާއްސަކޮށްގެން އީޖާދުކޮށްފައިވާ މި އައިނު ފަރުމާކޮށްފައިވަނީ، ކުރަމުންދާ މުއާމަލާތު، ލިޔުމުގެ ޒަރީއާއިން ފެންނަ ގޮތަށެވެ. އާންމު އުސޫލުން ކަން ހިނގާ ގޮތަށް ބަލާއިރު، ފިލްމެއްގައި ސަބްޓައިޓްލް އަރާ އުސޫލުންނެވެ. ދެކެވެމުންދާ ވާހަކަތައް، ލިޔުމުގެ ޒަރީއާއިން ވަގުތުން ފެންނަމުން ދާއިރު، އެ ވާހަކަތައް ރިވައިންކޮށް، އަލުން ބަލާލުމުގެ ފުރުސަތުވެސް މި އައިނުން ލިއްބައިދެއެވެ.

"އެކްސްރާއީ ގްލާސް"ގެ ނަމުން ނަން ދީފައިވާ މި އައިނު ފަރުމާކޮށްފައިވަނީ އޮގުމެންޓަޑް ރިއާލިޓީ (އޭއާރް) އައިނު ބޭނުންކޮށްގެންނެވެ. މި އައިނަކީ އޭއައި ޓެކްނޮލޮޖީގެ އެހީގައި އޮޕަރޭޓްކުރާ ސޮފްޓްވެއަރއެއް މެދުވެރިކޮށް، ސްމާރޓްފޯން އެޕްލިކޭޝަނަކާ ގުޅާލެވިފައިވާ އައިނެކެވެ. މި އައިނަކީ ބީރު މީހުންގެ ޕަރސަލަން އެސިސްޓަންޓެކޭވެސް ދެންނެވިދާނެއެވެ. ހަނދާންނެތިފައި ހުންނަ ކަންކަން ހަނދާންވެސްކޮށްދެއެވެ.

އާދަޔާ ޚިލާފު މި އައިނުގެ ކުރު ޚުލާސާއެއް ދެމުން، އެކްސްރާއީ ގްލާސްގެ ކޯ-ފައުންޑަރ އަދި ޗީފް މާރކެޓިންގ އޮފިސަރ، މިޗެލް ފެލްޑްމަން ބުނީ، މިއީ "ލޮލުގެ އެލެކްސާ" ކަމަށެވެ.  

ބީރު މީހުންނަށް ޚާއްސަކޮށްގެން އެކްސްރާއީ ގްލާސް އުފެއްދުމަށް ހިތްވަރު ލިބުނީ، ކޯ ފައުންޑަރ ޑެން ސްކާފީޒްގެ ކާފަގެ ސަބަބުންނެވެ. އުމުރުން މިހާރު 97 އަހަރު ފުރިފައިވާ ކާފައަކީ އަޑުއިވުމުގެ ނަސީބުން މަހުރޫމުވެފައިވާ މީހެކެވެ. ނަތީޖާއެއްގެގޮތުން، އާއިލީ ބައްދަލުވުންތަކުގައި ބައިވެރިވެ އުޅުންވެސް ކާފައަށް އޮތީ ދަތިވެފައެވެ. ނަމަވެސް، މިއަދު އީޖާދުކޮށްފައިވާ އެކްސްރާއީ ގްލާސްއާއެކު، ކާފަފަދަ އެތައް ބަޔަކަށް މި ވަނީ އުއްމީދު އާވެފައެވެ.

އެކްސްރާއީ ގްލާސްއާ ގުޅިފައިވާ އެޕްލިކޭޝަންގެ އެހީގައި، ތަފާތު 9 ބަހަކަށް، ސަބްޓައިޓްލްތައް ތަރުޖަމާވެސް ކުރެވެއެވެ. އެ ކަން ކުރިއަށް ދަނީ، ވާހަކަދައްކަމުންދާ ވަގުތާ މާ ބޮޑު ފަރަގެއްވެސް ނެތް ގޮތަށް ކަމަށް ވާއިރު، ތަރުޖަމާގެ ލިސްޓު އަދިވެސް އިތުރަށް ދިގުވެގެންދާނެ ކަމުގެ އުފާވެރި ޚަބަރު ވަނީ ލިބިފައެވެ.

ޑީޕް ލަރނިންގ ޓެކްނޮލޮޖީގެ އެހީގައި ކަންކަން އުނގެނެމުންދާ އޭއައި އެސިސްޓަންޓް ދަނީ އިންތިހާއަށް އުނދަގޫ ސުވާލުތަކަށް ޖަވާބު ދިނުމަށްވެސް އަހުލުވެރިވަމުންނެވެ.

އެކްސްރާއީއާއެކު އެންމެ ބޮޑު އުފަލެއް ލިބުނު އެކަކީ ޖަސްޓިން އޮޒްމަންޑްއެވެ. ޢުމުރުން އެންމެ 2 އަހަރުން ފެށިގެން އޮޒްމަންޑްގެ އަޑުއިވުމުގެ ހިއްސަށް ވަނީ ބޮޑެތި މައްސަލަތަކެއް ކުރިމަތިވެފައެވެ. މި އައިނުގެ އެހީގައި އޮޒްމަންޑް މުއާމަލާތުކޮށް ހަދާ ގޮތުން، އޭނާގެ އާއިލާ މެންބަރުންވެސް ތިބީ އިންތިހާއަށް އުފާވެފައެވެ.

ރިއާލިޓީ ޝޯ "ލަވް އައިލަންޑް"ގައި ބައިވެރިވި ފުރަތަމަ ބީރު ކޮންޓެސްޓަންޓް، ޓާޝާ ގޫރީއަށްވެސް އެކްސްރާއީ އައިނުގެ ތަޖުރިބާ ވީ ލޮލުން ކަރުނަ ފާއްދާލި ތަޖުރިބާއަކަށެވެ. ގޫރީ މި ދުނިޔެއަށް އުފަންވީވެސް ބީރު މީހެއްގެ ގޮތުގައެވެ. ކޮކްލިއަރ އިމްޕްލާންޓް ސަރޖަރީ ހެދީ އޭނާގެ އުމުރުން 5 އަހަރުގައެވެ.

އެކްސްރާއީ ބުނާގޮތުގައި އެ އައިނު މި ވަގުތު ބޭނުންކުރެވޭނީ އެންރިއަލް އެއަރ އޮގުމެންޓަޑް ރިއާލިޓީ އައިނުތަކާއެކުގައެވެ. އަދި ކުރިއަށް އޮތްތަނުގައި ހުރިހާ ބްރޭންޑެއްގެ އޭއާރް އަދި އެކްސްއާރް އައިނުތަކަށްވެސް އެ ފުރުސަތު ފަހި ކުރުމުގެ އުއްމީދު އެބަ އޮތް ކަމުގެ އިޝާރާތެއް ވަނީ ލިބިފައެވެ. ދައްކަމުންދާ ވާހަކަތައް ލައިވް ސަބްޓައިޓަލްއަށް ބަދަލުކުރާ އެޕްލިކޭޝަނަކީ އެއްވެސް ކަހަލަ ފީއަކާނުލައި ޑައުންލޯޑްކޮށްގެން ބޭނުން ކުރެވޭ އެޕްލިކޭޝަނަކަށް ވީނަމަވެސް، އެހެން ބަސްބަހަށް ތަރުޖަމާކުރުމަށް އިޝްތިރާކު ދައްކަން ޖެހެއެވެ.