މަރުހަބާ ކަޕްގެ ފައިނަލަށް ރަސްމާދޫ އާއި ގައްދޫ

މޯލްޑިވްސް ސަރފިންގ އެސޯސިއޭޝަނުން މިހާރު ކުރިއަށްގެންދާ "އެމްޓީސީސީ ދިވެހި ސަރފް ލީގު 1444ގެ ރަންނަމާރި ޗެލެންޖް"ގެ މަރުހަބާ ކަޕްގެ ފައިނަލަށް ރ.ރަސްމާދޫ އާއި ގދ.ގައްދޫ ޓީމު ދަތުރުކޮށްފިއެވެ.

މުބާރާތުގެ ސެމީ ފައިނަލުގައި ވާދަކުރީ ރ.ރަސްމާދޫ، ކ.ތުލުސްދޫ، ގދ.ގައްދޫ އަދި މާލެ ޓީމެވެ. ސެމީގެ މެޗުތައް ކުރިއަށް ދިޔައީ ހޮނިހިރު ދުވަހުއެވެ.

ރަސްމާދޫ ޓީމުން މުބާރާތުގެ ފައިނަލަށް ދަތުރުކުރީ ސެމީގެ ފުރަތަމަ ހީޓުގައި ތުލުސްދޫގެ މައްޗަށް ކުރިހޯދައިގެންނެވެ. ސެމީގައި ރަސްމާދޫން ވަނީ 17.24 ގެ ސްކޯއެއް ކޮށްފައެވެ. ތުލުސްދޫއަށް ހޯދުނީ 9.70ގެ ސްކޯއެކެވެ.

ދެވަނަ ހީޓުގައި ވާދަކުރީ މާލެ ޓީމާއި ގައްދޫ ޓީމެވެ. ގައްދޫ ޓީމުން މާލެ ޓީމުގެ މައްޗަށް ކުރިހޯދީ 18.29ގެ ސްކޯއަކުންނެވެ. މާލެ ޓީމަށް ސްކޯ ކުރެވުނީ 16.64އެވެ.

މަރުހަބާ ކަޕް ކުރިއަށް ގެންދަނީ ކޮންމެ ޓީމެއްގައި ހަތަރު ސަރފަރުން ވާދަކުރާ ގޮތަށެވެ. ކޮންމެ ހީޓެއްގައި ލިބޭނީ 60 މިނެޓެވެ. ފައިނަލް ޓީމް ސްކޯރއަށް ކޮންމެ ސަރފަރެއްގެވެސް ގުނާނީ ހީޓުގައި އެސަރފަރަކަށް ލިބޭ ތިން ފުރުސަތުގެ ތެރެއިން އެންމެ ރަނގަޅު ނަތީޖާ ލިބޭ ސްކޯރއެވެ. މިއީ ރާއްޖޭގައި ޓެގް ޓީމް އިވެންޓު ބޭއްވި ފުރަތަމަ ފަހަރެވެ.