ކުނަހަންދޫ ސްކޫލުގެ އާ އިމާރާތާއި ށ. އަތޮޅު މަދުރަސާގެ މަލްޓިޕަރޕަސް ހޯލު ހަދަން ބަޔަކާ ހަވާލުކޮށްފި

ލ. ކުނަހަންދޫ ސްކޫލްގެ އާ އިމާރާތާއި ށ. އަތޮޅު މަދުރަސާގެ މަލްޓިޕަރޕަސް ހޯލް އިމާރާތް ކުރަން ބަޔަކާ ހަވާލުކޮށްފިއެވެ.

އެޑިއުކޭޝަން މިނިސްޓްރީން ބުނެފައިވާ ގޮތުގައި ކުނަހަންދޫ ސްކޫލްގައި އަޅާ އިމާރާތުގައި ހަތަރު ކްލާސްރޫމާއި ލަބްރަރީ އަދި ލެބޯޓްރީއެއް ހަދާނެ ކަމަށެވެ. މި މަސައްކަތް އެ މިނިސްޓްރީން ހަވާލުކޮށްފައިވަނީ ނޯތު ކޯސްޓް ކޮންޓްރެކްޓަރސް ޕްރައިވެޓް ލިމިޓެޑާއެވެ.

އެޑިއުކޭޝަން މިނިސްޓްރީގައި ބޭއްވި ރަސްމިއްޔާތެއްގައި މި އެއްބަސްވުމުގައި އެ މިނިސްޓްރީގެ ފަރާތުން ސޮއިކުރެއްވީ ސީނިއަރ ޕޮލިސީ ޑިރެކްޓަރ މޫސާ ނައީމެވެ. އަދި ނޯތު ކޯސްޓް ކޮންޓްރެކްޓަރސްގެ ފަރާތުން ސޮއިކުރެއްވީ އެކުންފުނީގެ ޑިރެކްޓަރ އަލީ އިޔާނެވެ.

މި މަޝްރުއުގެ މަސައްކަތް ނޯތު ކޯސްޓް ކޮންޓްރެކްޓަރސްއާ ހަވާލު ކުރީ 10.59 މިލިއަން ރުފިޔާއަށެވެ. މި އިމާރާތުގެ މަސައްކަތް 365 ދުވަހުގ ތެރޭގައި ނިންމާ މިނިސްތްރީއާ ހަވާލުކުރުމަށް ވަނީ އެއްބަސްވެފައެވެ.

ށ. އަތޮޅު މަދުރަސާގެ މަލްޓިޕަރޕަސް ހޯލް އިމާރާތް ކުރުމުގެ މަސައްކަތް އެޑިއުކޭޝަން މިނިސްޓްރީން ހަވާލު ކުރީ އިވޯސަން މޯލްޑިވްސް ޕްރައިވެޓް ލިމިޓެޑާއެވެ. އެ ކުންފުންޏާ އެ މަސައްކަތް ހަވާލު ކުރީ 13.94 މިލިއަން ރުފިޔާއަށެވެ.

މިކަމުގެ އެއްބަސްވުމުގައި އެޑިއުކޭޝަން މިނިސްޓްރީގެ ފަރާތުން ސޮއިކުރެއްވީ، ސީނިއަރ ޕޮލިސީ ޑިރެކްޓަރ ނައުޝާދު އިބްރާހީމެވެ. އަދި އިވޯސަން މޯލްޑިވްސްގެ ފަރާތުން ސޮއިކުރެއްވީ އެކުންފުނީގެ ޑިރެކްޓަރ ހުސެއިން ވަހީދެވެ. މި މަސައްކަތް ވެސް ހަވާލު ކޮށްފައިވަނި 365 ދުވަހުގެ ތެރޭގައި ނިންމާ ހަވާލު ކުރަން ޖެހޭ ގޮތަށެވެ.

މި ދެ މަޝްރޫޢަކީވެސް 2021 ވަނަ އަހަރުގެ ޕީއެސްއައިޕީގެ ދަށުން ކުރިއަށްގެންދާ ދެ މަޝްރޫއެވެ.

މިހާރު ވެސް ސަރުކާރުން އަންނަނީ ރާއްޖޭގެ އެކި ސްކޫލްތަކުގެ ޖާގަ ބޮޑު ކުރުމަށް އާ އިމާރާތްތަކާއި ތަފާތު އެކި މަސައްކަތްތައް ކުރިއަށްގެންދަމުންނެވެ. އަދި އާ ސްކޫލްތައް އެޅުމުގެ މަސައްކަތް ވެސް ކުރިއަށް އެބަދެއެވެ.