ކުރާ ހުރިހާ މަސައްކަތެއް ލޮލުފިޔައެއް ވެސް ނުޖަހާ ކުރަނީ، ދިވެހިރާއްޖޭގެ ގާނޫނު އަސާސީ އާއި ދިވެހިރާއްޖޭގެ ގާނޫނުތަކާއި މިތަނުގެ ގަވާއިދުތަކާއި ޑިމޮކްރަސީގެ އުސޫލުތަކާއި އިސްލާމްދީނުގެ މަތިވެރި ރިވެތި އުސޫލުތަކާ އެއްގޮތްވާ ގޮތުގެ މަތިން ކަމަށް ރައްޔިތުންގެ މަޖިލީހުގެ ރައީސް ރައީސް މުހައްމަދު ނަޝީދު ވިދާޅުވެއްޖެއެވެ.

ޓެކްސް ބޮޑުކުރުމަށް ހުށަހަޅާފައިވާ މައްސަލައިގައި ރައްޔިތުންގެ މަޖިލީހުގެ މުޅި މަޖިލީހުގެ ކޮމިޓީގައި ވާހަކަފުޅުދައްކަވަމުން ނަޝީދު ވިދާޅުވީ ގަވާއިދާ ހިލާފަށް އެއްވެސް ކަމެއް ނުކުރައްވާނެ ކަމަށެވެ.

ބުދަ ދުވަހުގެ ކޮމިޓީއަށް ފިނޭންސް މިނިސްޓަރު އިބްރާހިމް އަމީރާއި ކަމާއި ގުޅުންހުރި ފަރާތްތައް ވަނީ ހާޒިރުކުރަން ފަށާފައެވެ.

މަޖިލީހުގެ ބުދަ ދުވަހުގެ ޖަލްސާގައި ކޮމިޓީ ފައްޓަވަމުން، ކޮމިޓީގެ މުގައްރިރު މުހައްމަދު ނަޝީދު ވިދާޅުވީ އަންގާރަ ދުވަހު ވާނީ ކޮމިޓީއަށް ކަމާއި ގުޅުންހުރި މާހިރުން ހާޒިރުވުމަށް ދަންނަވާފައި ކަމަށެވެ. އެގޮތުން ފިނޭންސް މިނިސްޓަރު އިބްރާހިމް އަމީރު ވަޑައިގަންނަވާނީ 9:40 ގައި ކަމަށާއި، ގެސްޓް ހައުސް އެސޯސިއޭޝަންގެ ފަރާތުން ބޭފުޅުން ވަޑައިގަންނަވާނެ ކަމަށެވެ.

މަޓީއަށް ދައުވަތު ދެއްވުމުން، މަޓީން ވަނީ ސިޓީއެއް ކޮމިޓީއަށް ފޮނުވާފައެވެ. ސިޓީގައި ބުނެފައިވަނީ ބޯޑަށް ހުށަހެޅުމަށްފަހު ބޭފުޅަކު ފޮނުވާނެ ކަމަށެވެ. އެހެންނަމަވެސް މަޓީ ދެކޭ ގޮތުގައި މިވަގުތަކީ ޓެކްސް ބޮޑުކުރުމަށް އެންމެ އެކަށީގެންވާ ވަގުތެއް ނޫންކަމަށް ބުނެފައިވެއެވެ. ސަބަބަކީ ރާއްޖޭގެ ފަތުރުވެރިކަމުގެ ސިނާއަތް މިހާރުވެސް އަންނަނީ އެކިއެކި ލޮޅުންތަކުން އަރައިގަތުމަށް މަސައްކަތް ކުރަމުން ކަމަށާއި، ޓެކްސް އަށް އަންނަ ބަދަލުތައް ތަންފީޒުކުރުމަށް އެންމެ ލަސްވެގެން 12 މަސް ދުވަސް ދިނުމަށް ވަނީ އެދިފައެވެ.

ކަމާއި ބެހޭ ފަރާތްތައް ކޮމިޓީއަށް ހާޒިރުކުރުމުގެ ކުރިން، މެންބަރުން މި މައްސަލައިގައި ވިސްނާވަޑައިގަތުމަށް ކޮމިޓީގެ މުގައްރިރު ނަޝީދު ވަނީ އެދިވަޑައިގެންފައެވެ. ނަޝީދު ވިދާޅުވީ މިކަމާ މެދު ފުންކޮށް ވިސްނާ ވަޑައިގެން އެއް ބޭފުޅަކު އަނެއް ބޭފުޅަކާ ޒުވާބު ނުކުރައްވާ، ކުރައްވަން މިއުޅުއްވަނީ ކޮންކަމެއްތޯ އަދި މިކަމުން ނުކުންނާނީ ކޮން ނަތީޖާއެއްތޯ، އަދި މެންބަރުންގެ ސިޔާސީ ހަޔާތާއި ސިޔާސީ ޕާޓީތަކަށް މިކަމުން ކުރަން ހުރި އަސަރަކީ ކޮބައިތޯ ވިސްނުމަށް މެންބަރުންގެ ކިބައިން އެދިވަޑައިގެންނެވިއެވެ.

ކޮމިޓީގައި ތިނަދޫ އުތުރު ދާއިރާގެ މެންބަރު އަބްދުލްމުޣްނީ ވަނީ ކޮމިޓީ ހިންގުމުގެ ގަވާއިދުގެ 7 ވަނަ ނަންބަރުގެ (ށ) ގައި ވާގޮތަށް ކަންކަން ކުރިއަށް ގެންދިއުމަށް އެދިވަޑައިގަންނަވާފައެވެ.

މިކަމާއި ގުޅިގެން ކޮމިޓީގެ މުގައްރިރު ނަޝީދު ވިދާޅުވީ، މެންބަރު އަންގާރަ ދުވަހުވެސް އެވާހަކަ ފާހަގަކުރެއްވި ކަމަށެވެ. އަދި އެކަމުގައި އެމަނިކުފާނަށް ފެނިވަޑައިގަންނަވާ ގޮތް ދަންނަވާފައިވާނެ ކަމަށާއި، ކޮމިޓީގެ ފަރާތުން ގޮތެއް ނިންމާނީ ކޮންގޮތަކަށްތޯ، ކޮމިޓީގެ ގަވާއިދުގައި ފާހަގަކޮށްފައި ނުވާ ކަމަށެވެ. އެހެންނަމަވެސް ގަވާއިދުގައި ފާހަގަކޮށްފައި ނެތްނަމަވެސް، ކޮމިޓީގެ ފަރާތުން ކަންކަން ނިންމަންޖެހޭކަން އެއީ ކަށަވަރުކަމެއް ކަމަށެވެ.

ކޮމިޓީން ފާސްނުކޮށް، މުޅި މަޖިލީހުގެ ކޮމިޓީއަށް ބޭފުޅުން ހާޒިރުކުރުމަށް އެކި ފަރާތްތަކަށް ސިޓީ ފޮނުވާ، ގަވާއިދާ ހިލާފަށް މަޖިލީހާއި ކޮމިޓީތައް ހިންގަވަމުން ގެންދަވާ ކަމަށް ވިދާޅުވެ މެންބަރުން ދަނީ ރައީސް ނަޝީދަށް ފާޑުވިދާޅުވަމުންނެވެ.