ޖަމްބަރީ އޮން ދަ އެއަރ- ޖަމްބަރީ އޮން ދަ އިންޓަރނެޓް ފަށައިފި
ޖޮޓާޖޮޓީ ކުރިއަށް ގެންދަނީ ކޮންމެ އޮކްޓޯބަރު މަހެއްގައި
ސްކައުޓް ކުދިން
ޖަމްބަރީ އޮން ދަ އެއަރ- ޖަމްބަރީ އޮން ދަ އިންޓަރނެޓް (ޖޮޓާޖޮޓީ) 2022 ފަށައިފިއެވެ.
ޖޮޓާޖޮޓީ 2022 ރާއްޖޭގައި ރަސްމީގޮތުން ހުޅުވައިދެއްވުމުގެ ގޮތުން ރައީސުލްޖުމްހޫރިއްޔާގެ ނައިބު ފައިސަލް ނަސީމް ވަނީ އެމެޗަރ ރޭޑިއޯ މެދުވެރިކޮށް ސްރީލަންކާގައި ތިބި ސްކައުޓުންނަށް މެސެޖެއް ފޮނުއްވާފައެވެ. ޖޯޓާޖޯޓީ ހަރަކާތަކީ ދުނިޔޭގެ އެކި ކަންކޮޅުތަކުން އެކި ޢުމުރުފުރާތަކުގެ ސްކައުޓުން އިންޓަރނެޓް އަދި ރޭޑިއޯ މެދުވެރިކޮށް ގުޅުވާލައިދޭ މިފަދަ އެންމެ ބޮޑު ހަރަކާތެވެ. މި ހަރަކާތުގެ ބައިވެރިންގެ އަޑު ދުނިޔޭގެ ކަންކޮޅުތަކަށް ފޮނުވަނީ ޝޯޓް ވޭވް ރޭޑިއޯ މެދުވެރިކޮށެވެ. މިއީ ތައުލީމީ ގޮތުން ވެސް ލިބޭ ރަނގަޅު ފުރުސަތެއް ކަަމަށް ރާއްޖޭގެ ސްކައުޓް އެސޯސިއޭޝަނުން ފާހަގަކުރެއެވެ. މިއީ ސްކައުޓުން އެއް ބަޔަކު އަނެއް ބަޔަކާއި ގުޅުވާދޭ، ގުޅުން ބަދަހިކޮށްދޭ ހަރަކާތެއް ކަމަށް ވެސް ސްކައުޓް އެސޯސިއޭޝަނުން ބުނެއެވެ. އުފަލާއި މަޖަލުގެ ތެރެއިން އެހެން ސްކައުޓުންނާއި ރައްޓެހިކަން އާލާކޮށް، ބަވަނަ ވެފައިވާ ދުނިޔޭގެ ކަންކަން ހައްލުކުރަން މި ހަރަކާތުގެ ތެރެއިން ފުރުސަތު ލިބޭ ކަމަށް އެ އެސޯސީއޭޝަނުން ބުނެއެވެ.
ސްކައުޓް އެސޯސިއޭޝަން އޮފް މޯލްޑިވްސްއިން އިންތިޒާމުކޮށްގެން ކުރިއަށް ގެންދާ މި ހަރަކާތުގައި ރާއްޖޭގެ އެކި ކަންކޮޅުތަކުގައި ތިބި ސްކައުޓުންނަށްވެސް ވަރޗުއަލްކޮށް މި ހަރަކާތުގައި ބައިވެރިވުމުގެ ފުރުސަތު ވަނީ ހުޅުވާލާފައެވެ. ކޮންމެ އޮކްޓޯބަރު މަހެއްގައި ކުރިއަށްގެންދާ މި ހަރަކާތް ކުރިއަށް ގެންދަން ހަމަޖެހިފައި ވަނީ މި މަހުގެ 14 އިން 16 އަށެވެ. މި ހަރަކާތުގައި 172 އަށްވުރެ ގިނަ ޤައުމުތަކުން ދެ މިލިޔަނަށްވުރެ ގިނަ ސްކައުޓުން ބައިވެރިވާކަން ފާހަގަކޮށްލެވެއެވެ.
