ލިލީ ލަޔަންސް އާއި ސިމްޑީ މޮޅުވެއްޖެ

ކްރިކެޓް ބޯޑް އޮފް މޯލްޑިވްސް އާއި ޓީމް ސިވިލިއަންސް ގުޅިގެން ކުރިއަށް ގެންދާ 15 ވަނަ ރަމަޟާން ކްރިކެޓް ކާނިވަލްގެ ކޮމްޕެނީ ޓޭޕްބޯލް މުބާރާތުގައި ބުދަ ދުވަހު ކުޅުނު މެޗުތައް ލިލީ ލަޔަންސް އާއި ސިންޑީ އިން ކާމިޔާބުކޮށްފިއެވެ.

ބުދަ ދުވަހު ކުޅުނު ފުރަތަމަ މެޗުގައި ބައްދަލުކުރީ ލިލީ ލަޔަންސް އާއި ގްލޯބަލް ކާގީއެވެ. މި މެޗް ލިލީ ކަޔަންސް އިން ކާމިޔާބުކުރީ 8 ވިކެޓުންނެވެ. ޓޮސް ދިމާވުމުން ލިލީ ލަޔަންސް އިން ގަސްތުކުރީ ހޮވާށެވެ. އެގޮތުން ގްލޯބަލް ކާގޯ އިން ކުޅެންއަރާ 8 އޯވަރުގެ ތެރޭގައި 6 ކުޅުންތެރިން ނުބައިވެގެން އެޓީމަށް ހެދުނީ 88 ލަނޑެވެ. އެޓީމުން އެންމެ ރަނގަޅަށް ކުޅުނީ 24 ލަނޑުހެދި ޔާޕާ އެވެ. ލިލީ ލަޔަންސް އިން ވަނީ 2 ވިކެޓް ނަގާފައެވެ. ޖަވާބުގައި ލިލީ ލަޔަންސް އިން ކުޅެން އަރާ އެންމެ ކުޅުންތެރިއަކުވެސް ނުބައި ނުވެ، ޖީވަން ޕްރަސާދު 36 ލަނޑު އަދި މުހަންމަދު ސަލީހް 31 ލަނޑު ހަދައި ފަސޭހަ ކަމާއިއެކު މެޗު ކާމިޔާބުކުރިއެވެ.

ބުދަ ދުވަހުގެ ދެވަނަ މެޗުގައި ކުޅެން ހަމަޖެހިފައި އޮތީ ސިމްޑީ އާއި ދިރްހަމް އެވެ. މި މެޗަށް ދިރްހަމް ހާޒިރު ނުވުމުގެ ސަބަބުން މެޗް ލިބުނީ ސިމްޑީގެ ޓީމަށެވެ.

މުބާރާތުގައި ބުރާސްފަތި ދުވަހުވެސް 2 މެޗު ކުޅުމަށް ވަނީ ހަމަޖެހިފައެވެ. ފުރަތަމަ މެޗުގައި ޕާސަނަލް ކޮޕިއުޓާސް އާއި ބޮން ބެވަރޭޖްސް ބައްދަލުކުރާއިރު ދެވަނަ މެޗްގައި ބައްދަލުކުރާނީ މާޒިޔާ ޓްރޭޑާސް އާއި ހިރާސާ ކެމިސްޓް އެވެ. ކުޅިވަރި އެކުވެނީގެ ކްރިކެޓް ދަނޑުގައި ކުޅުމަށް ހަމަޖެހިފައިވާ މި މެޗްތައް ފެށުމަށް ހަމަޖެހިފައިވަނީ ބުރާސްފަތި ދުވަހު ހަވީރު 16:00 ގައެވެ.