ސަރުކާރުގެ ސިޔާސަތަކީ، ޕްރައިވެޓް ސެކްޓަރގެ ބައިވެރިވުމާއެކު، ފަތުރުވެރިކަމުގެ އުދަރެސް ފުޅާކޮށް މިސިނާއަތް ސިންދަފާތުކުރުން - ރައީސް
ހަނިމާދޫ އެއާޕޯޓަށް މުހިންމު ބޮޑެތި ބަދަލުތަކެއް ގެނައުމާއެކު، އައްޑޫ ގަން އެއާޕޯޓްގެ ފެންވަރު އަންނަނީ މަތިކުރަމުން
ރާއްޖޭގެ ގައުމީ ފަތުރުވެރިކަމުގެ ދުވަހުގެ ހަފްލާފައި ރައީސް ވާހަކަފުޅުދައްކަވަނީ
ސަރުކާރުގެ ސިޔާސަތަކީ ޕްރައިވެޓް ސެކްޓަރގެ ބައިވެރިވުމާއެކު ފަތުރުވެރިކަމުގެ އުދަރެސް ފުޅާކޮށް، މިސިނާއަތު ސިންދަފާތުކުރުން ކަމަށް، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ގައުމީ ފަތުރުވެރިކަމުގެ ދުވަހުގެ ޖަލްސާގައި ވާހަކަފުޅުދައްކަވަމުންނެވެ. ރައީސް ވިދާޅުވީ، ރާއްޖެއަކީ ކަނޑު ބޮޑު، ބިން ކުޑަ ގައުމެއް ކަމަށެވެ. ނަމަވެސް ދިވެހި ފަތުރުވެރިކަން، ދުނިޔޭގެ ދެ މުރިނގަށް ފެތުރި ހަމައިސްކޮޅަށް ދެމިލައިފިކަމަށާއި، ދުނިޔޭގެ އެންމެ މަތީ ފެންވަރުގެ ހޮޓެލް ޗެއިންތަކުގެ ރިސޯޓްތައް މިހާރު ރާއްޖޭގައި އެބަހުރި ކަމަށެވެ. އެންމެ އަގުބޮޑެތި ކޮޓަރިތައް އެބަހުރި ކަމަށާއި، އެންމެ މަތީ ފެންވަރުގެ ޚިދުމަތްތައް އެބަ ދެވޭ ކަމަށެވެ. އަދި ބައިނަލްއަގުވާމީ އެވޯޑަކަށް ފަހު އެވޯޑެއް ދިވެހި ރިސޯޓްތަކުން އެބަ ހޯދާކަމަށެވެ.
ރާއްޖެއަކީ ބައިނަލްއަގުވާމީ ފަތުރުވެރިކަމުގެ ބާޒާރަށް އަބަދުވެސް ހުޅުވިފައި އޮތް މަންޒިލެއްކަން ފާހަގަކުރައްވަމުން ރައީސް ވިދާޅުވީ، ފަތުރުވެރިކަން ފުޅާކުރުމުގެ ފުރުސަތުތައް ރާއްޖޭގައި ކިތަންމެހާވެސް ގިނަކަމަށެވެ. އަދި ރާއްޖޭގައި އިންވެސްޓްކުރަން ބޭނުންވާ މީހުން އަދިވެސް އެބަތިބި ކަމަށާއި، ރާއްޖެއަށް ޒިޔާރަތް ކުރަން ބޭނުންވާ ފަތުރުވެރިންވެސް އެބަތިބި ކަމަށް ރައީސް ވިދާޅުވިއެވެ.
ރައީސް ވިދާޅުވީ މީގެތެރެއިންވެސް އެންމެ މުހިންމީ ދަތުރުފަތުރުގެ ފަސޭހަ ނިޒާމެއްކަމަށެވެ. މީގެ 12 ވަރަކަށް އަހަރު ކުރިން މަސައްކަތް ފެށި ވެލާނާ އިންޓަނޭޝަނަލް އެއާޕޯޓްގެ ތަރައްގީ މިހާރު އެ އަންނަނީ ލޯމައްޗަށް ފާޅުވަމުން ކަމަށެވެ. މީގެ އިތުރުން، ހަނިމާދޫ އެއާޕޯޓަށް މުހިންމު ބޮޑެތި ބަދަލުތަކެއް އެބަ ގެނެވޭކަމަށާއި، އައްޑޫ ގަން އެއާޕޯޓްގެ ފެންވަރު އަންނަނީ މަތިކުރަމުން ކަމަށެވެ. އަދި ހުވަދުއަތޮޅަށް ވެސް ބޮޑު ބަދަލެއް ގެންނަން މަސައްކަތް ކުރައްވާކަމަށެވެ. ރައީސް ވިދާޅުވީ، އަމާޒަކީ މީހުން ދިރިއުޅޭ ކޮންމެ ރަށަކުން، 20 ނުވަތަ 30 މިނެޓުން ދެވޭ ހިސާބުގައި އެއާޕޯޓެއް އޮތުންކަމަށެވެ.
ރައީސް ވިދާޅުވީ، ކޮވިޑުން އަރައިނުގަނެވިގެން އުޅެނިކޮށް މިއަހަރު ކުރީކޮޅު ފެށީ ޔޫކްރޭން ހަނގުރާމަ ކަމަށެވެ. އެ ހަނގުރާމައަށް 7 މަސް ވެގެން ދިޔައިރު، މުޅި ދުނިޔޭގެ އިގުތިސާދަށް ލޮޅުން އަރުވައިފި ކަމަށާއި، ރާއްޖޭގެ ފަތުރުވެރިކަމަށްވެސް އެ ހަނގުރާމައިގެ ނުސީދާ ގެއްލުންތައް ދަނީ ލިބެމުން ކަމަށެވެ. އަދި ދުނިޔޭގެ ބޮޑެތި އިގުތިސާދުތަކަށް ވެސް ހީނަރުކަން ވެރިވެއްޖެކަމަށެވެ.
އަދި އެ ހުރިހާ ގޮންޖެހުންތަކެއް ގިރާކުރުމަށް، ރިސޯޓްތަކުންނާއި އިންވެސްޓަރުން ވަރަށް ގިނަ މަސައްކަތްތަކެއް އެބަކުރައްވާ ކަމަށެވެ. އަދި ގޮންޖެހުންތައް ގިނަނަމަވެސް، މި ސިނާއަތުގެ ކުރިއެރުމަށްޓަކައި މިހާރުވެސް ވަރަށް ގިނަ މަސައްކަތްތަކެއް ކުރަމުން އަންނަކަމަށް ރައީސް ވިދާޅުވިއެވެ.
ރައީސް ވިދާޅުވީ ފަތުރުވެރިކަން ތަރައްގީކޮށް ފުޅާކުރުމުގައި އިތުރު ގޮންޖެހުންތަކެއްވެސް އެބަހުރިކަމަށެވެ. އެންމެ ބޮޑު ގޮންޖެހުމަކީ، ފަތުރުވެރިކަމަށް ދޫކޮށްފައިހުރި ބައެއް ތަންތަން، އަހަރުތަކެއް ވެގެން ދިޔައިރުވެސް ތަރައްގީނުކުރެވި އޮތުން ކަމަށެވެ. އެއީ، ދުރު ރާސްތާގެ ރޭވުމެއް ނެތި ދޫކޮށްލާފައި ހުރި ތަންތަންކަމަށާއި، ޚާއްސަކޮށް އެމްއެމްޕީއާރްސީ މެދުވެރިކޮށް މީގެ ހައެއްކަ އަހަރު ކުރިން ދޫކޮށްފައި ހުރި ބައެއް ރަށްތަކާއި ފަޅުތައްކަމަށެވެ.
އެތައް ބިލިއަން ޑޮލަރެއްގެ އަގުހުރި ރަށްތަކާއި ފަޅުތައް، ބަޔަކަށް ވިއްކާލިއިރު، އެ ތަންތަނުގެ އަގުވެސް ދައުލަތަކަށް ނުލިބޭކަމަށް ރައީސް ވިދާޅުވިއެވެ. އެ ތަންތަނުން ދައުލަތަށް ލިބުނު ގެއްލުމުގެ ބަދަލު ހޯދުމުގެ މަސައްކަތް، ޝަރުއީ ކޯޓުތައް މެދުވެރިކޮށް ކުރަމުން އަންނަކަން ފާހަގަކުރައްވައި ރައީސް ވިދާޅުވީ، ބައެއް ރަށްތަކާއި ފަޅުތަކުގެ މައްސަލަތައް އޭސީސީން ތަހުގީގުކުރަމުން އަންނަކަމަށެވެ. އަދި އަލަށް ހަދާ ރިސޯޓްތައް ތަރައްގީކުރުމަށް ބޭނުންވާނެ ފައިސާ ހޯދައިދިނުމުގެ މަސައްކަތްވެސް ސަރުކާރުން ކުރަމުން އަންނަކަމަށް ރައީސް ވިދާޅުވިއެވެ.
