އާރްޓީއެލް ފެރީގެ ނިޒާމަކީ ސީދާ ދިވެހި އުފެއްދުމެއް ކަމަށް, މިނިސްޓަރ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ މުޙައްމަދު އަސްލަމް ވިދާޅުވެއްޖެއެވެ.
ބޮޑުތިލަދުންތި ގުޅާލުމަށް ހއ. ދިއްދޫގައި ބޭއްވި ޚާއްސަ ޖަލްސާގައި ވާހަކަފުޅުދައްކަމުން އަސްލަމް ވިދާޅުވީ، އުޅަނދުތައް ބަންނަނީވެސް ރާއްޖޭގައި ކަމަށާއި، އަދި މިއީ ސަރުކާރުން ވަރަށް ގިނަ ވިސްނުންތައް ވިސްނުމަށްފަހު ފެށި މަސައްކަތެއްކަމަށެވެ.
އާރްޓީއެލް ފެރީ ނިޒާމުގެ ސަބަބުން އިގުތިސާދަށްވެސް ރަނގަޅު އަސަރެއް ކުރާނެކަމަށާއި، އާރްޓީއެލްގެ ފެރީގެ ނިޒާމަކީ ރާއްޖެއަށް ގެނެވުނު ބޮޑު ބަދަލެއްގެ ގޮތުގައި ދެކެވަޑައިގަންނަވާ ކަމަށް ވިދާޅުވިއެވެ.
މިކަމުން މުޖުތަމައުއަށް އަންނަ ބަދަލާއި ލިބޭ ފަސޭހަ ދެނެވިގެންދާނެ ކަމަށާއި ހިސާބު ޖަހާނީ އެގޮތަށް ކަމަށް އަސްލަމް ވިދާޅުވިއެވެ.
ޒޯން އެކެއްގައި ދަތުރުފަތުރުގެ ނިޒާމު ފެށިއިރު، 56،000ށްވުރެ ގިނަ މީހުން ދަތުރުކުރިކަން ފާހަގަކުރައްވައި އަސްލަމް ވިދާޅުވީ، ރައްޔިތުން ކުރިން އިހުސާސްކުރަމުން ދިޔަ އެކަހެރިކަން މިހާރު އިހުސާސް ނުވާނެ ކަމަށެވެ. އަދި ދަތުރުކުރާ މީހުންގެ 50 އިންސައްތަ މީހުން ދަތުރުކުރަނީ ބޭސްފަރުވާއަށް ކަމަށާއި ކޮންމެ ދުވަހަކު މީހުން ދަތުރުކުރާ ގޮތާއި އަންނަ ބަދަލުތައް ބަލަމުންދާކަމަށް ވިދާޅުވިއެވެ.
އަސްލަމް އިތުރަށް ވިދާޅުވީ، މި ފެރީ ނިޒާމުގެ ސަބަބުން ކައިރީގައި ހުރި ރަށްރަށާ ދަތުރުކުރާ ރަށްރަށާމެދު ގުޅުންތައް ބަދަހިވާން ފަށައިފިކަމަށެވެ.
މިއަދު ގައުމުގެ ހުންގާނުގައި ހުންނެވި ރައީސްއާއި ދައުލަތުގެ ވަޒީރުންގެ ވިސްނުންފުޅު ހުރީ ރާއްޖޭގެ ރަށްރަށް ވަކިކުރުމަށް ނޫންކަމަށްވެސް ވިދާޅުވިއެވެ.
މި މަސައްކަތް ފެށުމަށްޓަކައި ޕްލޭން ހަދައި ފޮތް ޗާޕްކޮށްފައިވާ ކަމަށާއި، ކޮންމެ ރަށަކުން އަނެއް ރަށަށް ދާ ރޫޓް އެނގެން އޮންނާނެ ކަމަށާއި، ހިސާބު ޖަހައި ޕްލޭން ކުރަހާފައިވާކަން އަސްލަމް ފާހަގަކުރެއްވިއެވެ.
ރާއްޖެ އޮންނާނެ ގޮތުގެ ތަސައްވުރުވެސް ކުރެހި ކަމަށް އަސްލަމް ވިދާޅުވިއެވެ. އެ ތަސައްވުރާއެކު ގެންނަން ޖެހޭ މައިބަދައަކީ ދަތުރުފަތުރު ކަމަށް މި ސަރުކާރުން ކަނޑައެޅިކަމަށް ވިދާޅުވިއެވެ.
މިއަދުގެ ރައީސް ޕްރޮޖެކްޓް ފައްޓަވައިދެއްވުމަށް ވަޑައިނުގަންނަވާ ކަމަށާއި، އެމަނިކުފާނަކީ ޕްރޮޖެކްޓްގެ މަސައްކަތް ނިންމެވުމަށް ވަޑައިގަންނަވާ ވެރިއެއް ކަމަށް އަސްލަމް ވިދާޅުވިއެވެ.
