ނަދީމްގެ މަރު: ދިފާއީ ވަކީލަކު މާލެގައި ނެތުމުން ޙުކުމްކުރުން އަނެއްކާވެސް ފަސްކޮށްފި

ހއ. ތަކަންދޫ އިބްރާހީމީ ހިޔާ، އުމުރުން 23 އަހަރުގެ ނަދީމު ޢަބްދުއްރަޙީމް އަށް ތޫނު އެއްޗަކުން ހަމަލާދީ މަރާލި މައްސަލައިގެ ޙުކުމް ކުރުން އަނެއްކާވެސް ފަސްކޮށްފިއެވެ.

ޝަރީއަތް ނިމެންދެން ބަންދުކުރާ މީހުންގެ މައްސަލަ ކުރިއަށްދާ ގޮތުގެ ތާވަލު ކްރިމިނަލް ކޯޓުން އާންމުކުރާއިރު، އެގޮތުގެ މަތިން މި މައްސަލައިގެ ޙުކުމް ކުރުމުގެ އަޑުއެހުން ސެޕްޓެމްބަރު މަހުގެ 26 ވާ ހޯމަ ދުވަހުގެ ހެނދުނު 09:00 ގައި ކުރިއަށް ގެންދިއުމަށް ކުރިން އޮތީ ތާވަލު ކުރެވިފައެވެ.

އެހެންނަމަވެސް، އަޑުއެހުން ކުރިއަށް ގެންގޮސްފައިނުވަނީ މި މައްސަލައިގެ ދިފާއީ ވަކީލަކު މާލޭގައި ނެތުމުގެ ސަބަބުންނެވެ.

މި މައްސަލައިގައި އެންމެ ފަހުން އަޑުއެހުމެއް ބާއްވާފައިވަނީ 21 އޯގަސްޓު 2022 ގައެވެ. އެއީ މި މައްސަލައިގެ ޙުކުމުގެ ކުރިން ޝަރީއަތުން ސާފުކުރަން ބޭނުންވާ ކަންކަން ސާފު ކުރުމަށް ކުރިއަށް ގެންދިޔަ އަޑުއެހުމެކެވެ.

ކްރިމިނަލް ކޯޓުގައި މި މައްސަލަ ބައްލަވަނީ އެ ކޯޓުގެ ގާޒީ ހުސައިން ފާއިޒު ރަޝާދެވެ.

އެންމެ ފަހުން ބޭއްވި އަޑުއެހުމުގައި ގާޒީ ވަނީ ދައުލަތުން ހުށައަޅާފައިވާ ވީޑިއޯ ފުޓޭޖްތަކާއި ގުޅޭ ސީޑީތަކާއި ގުޅިގެން ބައެއް ކަންކަން ސާފު ކުރައްވާފައެވެ. އެގޮތުން "ކުއެޝަނަަބަލް އެވިޑެންސް" ގޮތުގައި ހުށައެޅިފައިވާ ބައެއް ފުޓޭޖްތަކާއި ގުޅޭގޮތުން ގާޒީ ވަނީ ސުވާލު ކުރައްވާފައެވެ. އޭގެ ތެރެއިން ބައެއް ފުޓޭޖް ޝަރީއަތަށް ލިބިފައިނުވާކަންވެސް ގާޒީ ފާހަގަ ކުރެއްވިއެވެ.

އެކަމާ ގުޅޭގޮތުން ދައުލަތުގެ ވަކީލު ވިދާޅުވީ، އެ މައުލޫމާތުތައް ވެރިފައި ކުރުމަށްފަހު ދައުލަތުން ޝަރީއަތަށް ހުށައަޅާނެ ކަމަށެވެ. ދައުލަތުން ވަނީ އެކަންކަން ކަށަވަރު ކުރުމަށްފަހު އެކަމަށް ވާހަކަ ދެއްކެވުމަށް ފުރުސަތެއް ދެއްވުމަށް އެދިފައެވެ.

ދައުލަތުން ވަނީ އެ ފުޓޭޖްތައް ހުށައެޅުމަށް އެކަށީގެންވާ ވަގުތު ދިނުމަށް އެދިލައްވާފައެވެ.

ދައުލަތުގެ ޚުލާސާ ބަޔާނުގައި ގ.މަސްއޮޑިގޭ ކައިރީގެ ވީޑިއޯ ފުޓޭޖެއްގެ ވާހަކަ ބަޔާންކޮށްފައިވެއެވެ. އެެއީ މި މައްސަލައިގެ ދައުވާލިބޭ މަފާޒް އެތަނުގައި ހުރި ކަމާއި، އޭނާގެ ޖީބުން މާސްކެއް ނަގާ މަންޒަރު ދައްކުވައިދޭ ފުޓޭޖެއްކަން ދައުލަތުން ވަނީ ބަޔާންކޮށްފައެވެ. ނަމަވެސް އެކަމާއި ގުޅިގެން ދައުލަތުން ހުށައަޅާފައިވާ ފުޓޭޖުގައި ބަޔާންކޮށްފައިވާ ގަޑިއާއި ގުޅިގެން ޝަރީއަތުން ވަނީ އިތުރަށް ސާފު ކޮށްދިނުމަށް ދަންނަވާފައެވެ.