މިނީ ބަހުގެ ދަތުރުތަކަށް އުނދަގޫވާގޮތަށް ޕާކުކޮށްފައި ހުންނަ ވެހިކަލްތަކުގައި ސްޓިކަރ ޖަހަން ފެށުމުން، ގަވާއިދާ ޚިލާފަށް ޕާކުކުރުން މި ހަފުތާގައި މަދުވެއްޖެއެވެ.
ފުލުހުން އާންމުކޮށްފައިވާ ތަފާސްހިސާބުތައް ދައްކާގޮތުން، ބަހުގެ ޚިދުމަތް ދޭންފަށާފައިވާ ސެޕްޓެމްބަރ މަހުގެ 5 ވަނަ ދުވަހުން ފެށިގެން 17 ވަނަ ދުވަހުގެ ނިޔަލަށް 797 ވަޔަލޭޝަން ސްޓިކަރ ޖަހާފައިވެއެވެ. އަދި 69 ސައިކަލު ޓޯކުރިއެވެ. ފުރަތަމަ ހަފުތާގައި ފުލުހުން ވަނީ 538 ވެހިކަލެއްގައި ސްޓިކަރ ޖަހާފައެވެ. އެހެންކަމުން ފާއިތުވި ހަފުތާގައި ސްޓިކަރ ޖަހާފައިމިވަނީ 259 ވެހިކަލުގައެވެ.
މިނީ ބަހުގެ ޚިދުމަތް ފެށިއިރު، ބަސް ސްޓޮޕްތަކުގައާއި އެނޫންވެސް ތަންތަނުގައި، ބަހުގެ ދަތުރުތަކަށް އުނދަގޫވާގޮތަށް ގިނަ އަދަދަކަށް ވެހިކަލް ޕާކުކޮށްފައި ހުރެއެވެ. އެކަމާގުޅިގެން ފުލުހުން ބުނެފައިވަނީ، މާލޭގައި މިނީ ބަސް ދަތުރުކުރާ މަގުތަކުގައި ޓްރެފިކް ބާރުބޮޑުވާ ހިސާބުތަކުގައި ދިމާވާ މައްސަލަތައް ހައްލުކުރުމުގައި ފުލުހުން ހަރަކާތްތެރިވާނެ ކަމަށާއި، ބަހަށް ދަތުރުކުރުމަށް އުނދަގޫވާގޮތަށް ޕާކުކުރާ ވެހިކަލްތަކުގައި ސްޓިކަރ ޖަހާނެކަމަށެވެ. އަދި ވެހިކަލްތައް ޓޯކުރަން ޖެހިއްޖެނަމަ އެކަންވެސް ކުރާނެ ކަމަށެވެ.
މިނީ ބަސް ދުއްވަމުން އަންނަނީ ތިން ރޫޓެއްގައެވެ. އެއީ މަޖީދީމަގު ރޫޓާއި އޯކިޑު މަގު ރޫޓާއި އަމީނީ މަގު ރޫޓެވެ. ބަސް ދުއްވާ މަގުތަކުގައި ޕާކުކުރުން މަނާކޮށް، އެހެން ތަންތަނުގައި ޕާކިންގ ޒޯނު ހެދުމުގެ މަސައްކަތް އަންނަނީ ކުރަމުންނެވެ.
މިނީ ބަހަށް މާލޭގައި 42 ބަސްސްޓޮޕް ހަދާފައިވާއިރު މި ޚިދުމަތް ދެނީ 18 ބަސް ބޭނުން ކޮށްގެންނެވެ. މި ޚިދުމަތް ކޮންމެ ދުވަހެއްގެ ފަތިހު 5:45ން މެންދަމު 12:15އާ ހަަމައަށް ފޯރުކޮށްދެއެވެ. ކުރިޔަށް އޮތް ދެ ހަފުތާވެސް މިނީ ބަހުގެ ޚިދުމަތް ހިލޭ ދިނުމަށް އެމްޓީސީސީން ވަނީ ނިންމާފައެވެ.
