ކޯލިޝަން ހަދަން އެއްވެސް ބަޔަކު އަދި މަޝްވަރާއެއް ނުކުރޭ – ގާސިމް
ކޯލިޝަންގެ މަޝްވަރާއެއް އެއްވެސް ބޭފުޅަކު ނުކުރައްވަނީ ރިޔާސީ ޓިކެޓް ނުލިބޭތީ
ޖުމްހޫރީ ޕާޓީގެ ލީޑަރު ގާސިމް އިބްރާހިމް
2023 ވަނަ އަހަރުގެ ރިޔާސީ އިންތިހާބަށް ކޯލިޝަން ހަދަން އެއްވެސް ބަޔަކު މަޝްވަރާނުކުރާ ކަމަށް ޖުމްހޫރީ ޕާޓީގެ ލީޑަރު ގާސިމް އިބްރާހިމް ވިދާޅުވެއްޖެއެވެ.
ރާއްޖެޓީވީގެ ފަށާއިރަށް ދެއްވި އިންޓަރވިއުގައި، މާމިގިލީ ދާއިރާގެ މެންބަރުކަން ވެސް ކުރައްވާ އަދި މިހާރު އޮތް ކޯލިޝަން ސަރުކާރުގެ ދެވަނައަށް އެންމެ ބޮޑު ޕާޓީގެ ލީޑަރު ގާސިމް އިބްރާހިމް ވިދާޅުވީ ކޯލިޝަން ހެދުމަށް އަދި އެއްވެސް ބަޔަކު ޖުމްހޫރީ ޕާޓީއާއި މަޝްވަރާކޮށްފައި ނެތް ކަމަށާއި، އަދި ކޮށްފައިވެސް ނުވާ ކަމަށެވެ.
ގާސިމް ވިދާޅުވީ ކޯލިޝަންގެ މަޝްވަރާއެއް އެއްވެސް ބޭފުޅަކު ނުކުރައްވަނީ ރިޔާސީ ޓިކެޓް ލިބޭނެކަން ކަށަވަރުވެފައި ނުވާތީ ކަމަށެވެ. އެނގިވަޑައިގަންނަވާ ގޮތުން، މިހާތަނަށް ރިޔާސީ ޓިކެޓް ކަށަވަރުވެފައި ވަނީ ކުރީގެ ރައީސް އަބްދުﷲ ޔާމީނަށް އެކަނި ކަމަށް ގާސިމް ވިދާޅުވިއެވެ.
ގާސިމް ވިދާޅުވީ ވެރިކަން ކާމިޔާބުކުރެވޭނީ ކޯލިޝަނެއް އޮވެގެން ކަމަށެވެ. ނަމަވެސް ވެރިކަން ލިބުމަށްފަހު ކޯލިޝަނެއް އޮތުމެކޭ ނެތުމެކޭ އެއްގޮތް ކަމަށެވެ. ޖުމްހޫރީ ޕާޓީ ހިމެނިވަޑައިގަންނަވާ ކޯލިޝަނަށް އިޝާރާތްކުރައްވާ ގާސިމް ވިދާޅުވީ އެމްޑީޕީއަކުން އަދި ސަރުކާރުން ވެސް ރަސްމީކޮށް ކޯލިޝަން މިހާރު ނެތްކަމަށް ވިދާޅުނުވާ ކަމަށެވެ. ނަމަވެސް، ހަގީގަތަކީ އެއްބަސްވެފައި އޮތް އެއްބަސްވުމާއި ގާތަށް، 90 އިންސައްތަ ވެސް ފުރިހަމަ ނުވާ ކަމަށެވެ.
ރައީސް އިބްރާހިމް މުހައްމަދު ސާލިހްގެ ސަރުކަރުން ވެރިކަމަށް ވަޑައިގެންނެވީ ގުޅިފައިވާ ޕާޓީތަކުގެ ކޯލިޝަނަކާއެކުއެވެ. އެމްޑީޕީ އިސްވެ އޮވެ އުފެއްދި ކޯލިޝަންގައި ހިމެނެނީ ޖުމްހޫރީ ޕާޓީގެ އިތުރުން އަދާލަތު ޕާޓީ އަދި މޯލްޑިވްސް ރިފޯމް މޫވްމަންޓެވެ.
