ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ލ އަތޮޅަށް ވަޑައިގަތުމުން، އެ އަތޮޅުން އެމަނިކުފާނަށް ހޫނު މަރުހަބާއެއް ދަންނަވައިފިއެވެ.

އެ މަނިކުފާނަށް ލ. ކައްދޫން މަރުހަބާ ދެންނެވީ ދާއިރާގެ މެމްބަރުންނާއި ކައުންސިލަރުންނެވެ. އެ މަނިކުފާނަށް އާއްމުންވެސް ވަނީ ހޫނު މަރުހަބާއެއް ކިޔާފައެވެ.

ރައީސަށް މަރުހަބާ ދެންނެވުމަށް ލ. ގަން ފޮނަދޫ ރިދަމްގެ ސަގާފީ އައިޓަމެއް ވަނީ ހުށަހަޅައިދީފައެވެ. އެމަނިކުފާނަށް މަރުހަބާ ދެންނެވުމަށް ލ. ގަމު ދާއިރާގެ މެމްބަރު މުހައްމަދު ވިސާމާއި ލ އަތޮޅު ކައުންސިލް، ފޮނަދޫ ކައުންސިލް، އަދި ގަމު ކައުންސިލްގެ ބޭފުޅުން އެއާޕޯޓަށް ވަޑައިގެންނެވިއެވެ.

ރައީސް ޞާލިޙު ލ.ށް ވަޑައިގަންނަވާފައިވަނީ އެ އަތޮޅު ގަމުގައި ބޭއްވުމަށް ހަމަޖެހިފައިވާ "ވިއަވަތި ރާއްޖެ" މަހާސިންތާއަށެވެ. މި މަހުގެ 10ން 12ށް ކުރިއަށް ގެންދާ މި މަހާސިންތާގައި ގިނަ ކަންތައްތަކަކާ ގުޅޭގޮތުބް މަޝްވަރާކުރުމަށް ވަނީ ހަމަޖެހިފައެވެ. މި މަހާސިންތާއަކީ ރައީސް ޞާލިޙުގެ އިސްނެންގެވުމާއެކު، އަލަށް އިންތިޚާބުކުރި ކައުންސިލްތަކާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކާއެކު ބާއްވަވަމުން ގެންދަވާ ސިލްސިލާ މަޝްވަރާ ބައްދަލުވުންތަކެކެވެ.

މި ކޮންފަރެންސްގައި ރާއްޖޭގެ ދެކުނުގެ އަތޮޅުތައް ކަމަށްވާ; ދ، ތ، ލ، ގއ، ގދ، ފުވައްމުލައް ސިޓީ އަދި އައްޑޫ ސިޓީގެ މޭޔަރުންނާއި، އަތޮޅާއި އަދި ރަށު ކައުންސިލްތަކުގެ ރައީސުންނާއި، އަންހެނުން ތަރައްގީއަށް މަސައްކަތްކުރާ ކޮމިޓީތަކުގެ ރައީސުން ބައިވެރިވެވަޑައިގަންނަވާނެކަމަށް ރައީސް އޮފީހުން މައުލޫމާތުދެއެވެ. މީގެ އިތުރުން، ކެބިނެޓް މިނިސްޓަރުންނާއި، ސަރުކާރު މުއައްސަސާތަކުގެ އިސްވެރިންނާއި، ޓެކްނިކަލް މުވައްޒަފުން ހިމެނޭހެން 250 އަށްވުރެ ގިނަ ބައިވެރިން މި ފަހަރުގެ ވިއަވަތި ކޮންފަރެންސްގައި ބައިވެރިވެވަޑައިގަންނަވާނެ ކަމަށް ރައީސް އޮފީހުން ބުނެއެވެ.