ސްކޫލުތަކުގެ އުމްރާނީ ތަރައްގީއަށް މިހާތަނަށް އެންމެ ބޮޑު ޚަރަދެއް ކުރީ މި ސަރުކާރުން: އެޑިއުކޭޝަން މިނިސްޓަރ

ސްކޫލުތަކުގެ އުމްރާނީ ތަރައްގީއަށް މިހާތަނަށް އެންމެ ބޮޑު ޚަރަދެއް ކުރީ މި ސަރުކާރުން ކަމަށް، އެޑިއުކޭޝަން މިނިސްޓަރ ޑރ. އާއިޝަތު އަލީ ވިދާޅުވެއްޖެއެވެ.

މުއައްސަސާތަކުން ކޮންގްރެސްއަށް މައުލޫމާތު ދެއްވަމުން މިނިސްޓަރ ވިދާޅުވީ، އެންމެ ގިނަ ޕްރޮޖެކްޓް ސްކޫލްތަކުގައި ހިންގި ސަރުކާރަކަށް މި ސަރުކާރު ވާނެކަމަށެވެ. އެގޮތުން އެއް ދަންފަޅިއަށް ކިޔަވައިދިނުމުގެގޮތުން 216 މަޝްރޫއު ބަޖެޓްކޮށް، 46 މަޝްރޫއު ނިމި ބޭނުން ކުރަން ފަށާފައިވާ ކަމަށް ވިދާޅުވިއެވެ. 89 މަޝްރޫއު ކުރިއަށްދާއިރު، 11 މަޝްރޫއު އެވޯޑްކުރެވިފައިވާކަމަށާއި، މި މަޝްރޫއުތަކުގެ އަމަލީ މަސައްކަތް ވަރަށް އަވަހަށް ފެށިގެން ދާނެކަމަށް ވިދާޅުވިއެވެ .

މި ސަރުކާރުން މިހާތަނަށް 1288 ކްލާސްރޫމާއި 81 މަލްޓިޕަރސަސް ހޯލާއި 338 އެހެނިހެން އިމާރާތްތައް ގާއިމުކޮށްފައިވާކަމަށް މިނިސްޓަރ ވިދާޅުވިއެވެ.

2014 ވަނަ އަހަރުން ފެށިގެން 2018 ވަނަ އަހަރާ ހަމައަށް، ކުރީގެ ރައީސް އަބްދުﷲ ޔާމީންގެ ސަރުކާރުގައި މަސައްކަތް ފުރިހަމަކުރެވުނީ 135 ކްލާސްރޫމުގައި ކަމަށާއި އެޅުނީ 15 މަލްޓިޕަރސަސް ހޯލް ކަމަށްވެސް މިނިސްޓަރ ވިދާޅުވިއެވެ. އަދި އެހެނިހެން 64 މަޝްރޫއެއް ހިންގި ކަމަށްވެސް ވިދާޅުވިއެވެ.

ކުރީ ސަރުކާރާ އަޅައިބަލާއިރު، މަޝްރޫއުތަކުގެ އަދަދަށް ބެލިނަމަވެސް މި ސަރުކާރުން ހޯދާފައިވާ ކާމިޔާބީތައް އެނިގެންދާނެކަމަށް ވިދާޅުވިއެވެ.

މީގެއިތުރުން ޕީއެސްއައިޕީ ޕްރޮޖެކްޓްތަކަށް ޔާމީން ސަރުކާރުން 941.6 މިލިއަން ރުފިޔާ ޚަރަދުކޮށްފައިވާއިރު، މި ސަރުކާރުން ޚަރަދުކޮށްފައިވަނީ 1316.9 މިލިއަން ރުފިޔާ ކަމަށްވެސް ޑރ. އާއިޝަތު އަލީ ވިދާޅުވިއެވެ.

ރާއްޖޭގެ ކޮންމެ އަތޮޅަކުން އޭލެވެލްއަށް ކިޔެވުމުގެ ފުރުސަތު ފަހިވެފައިވާކަން އެކަމަނާ ފާހަގަކުރެއްވިއެވެ. ފަންނުވެށި ޕްރޮގްރާމް މިހާރު ފެށިފައިވާކަމަށާއި، އެ ޕްރޮގްރާމުގައި އެކި ހުނަރުތައް ދަސްކޮށްދޭނެ ކަމަށް މިނިސްޓަރ ވިދާޅުވިއެވެ.

ތައުލީމުގެ ގާނޫނު ވުޖޫދުކުރެވުން އެއީ ލިބުނު ކާމިޔާބީއެއް ކަމަށް މިނިސްޓަރ ވަނީ ސިފަކުރައްވާފައެވެ.

ގައުމީ މަންހަޖު އިސްލާހު ކުރުމުގެ މަސައްކަތް ފަށާފައިވާ ކަމަށާއި، މުގައްރަރުތަކާއި ފޮތްތައް އިސްލާހުކުރަން ފެށިފައިވާކަމަށްވެސް ވިދާޅުވިއެވެ.