ތާލިބާނުން ބައިނަލްއަގުވާމީ މުޖުތަމައާ ގުޅުންބަދަހިކުރާނީ އިސްލާމީ ޝަރީއަތާ އެއްގޮތަށް
20 އޯގަސްޓު 2022 | ހޮނިހިރު 02:133000ށްވުރެ ގިނަ ގަބީލާތަކުގެ ވެރިންނާއި އޮފިޝަލުންނާއި ދީނީ އިލްމުވެރިން ވަނީ ކަންދަހާރަށް އެއްވެފައި
ތާލިބާން ސަރުކާރަށް އަހަރެއް ފުރުން ފާހަގަކުރުމަށް ބޭއްވި ރަސްމިއްޔާތުގެތެރެއިން
ތާލިބާނުން ބައިނަލްއަގުވާމީ މުޖުތަމައާ ގުޅުން ބަދަހިކުރާނީ އިސްލާމީ ޝަރީއަތާ އެއްގޮތަށްކަމަށް، އެ ޖަމާއަތުގެ އެންމެ އިސްލީޑަރު ވިދާޅުވެއްޖެއެވެ.
އަފްޣާނިސްތާނުގައި މިހާރު ވެރިކަން ކުރަމުން އަންނަ ތާލިބާން ސަރުކާރަށް އެއް އަހަރުވެފައިވާއިރު، އެގައުމުގެ އިންފޮރމޭޝަން މިނިސްޓްރީން ވަނީ އެޖަމާއަތުގެ އެންމެ އިސްލީޑަރު ދެއްކެވި ވާހަކަފުޅުގެ ކޮޕީއެއް ހިއްސާކޮށްފައެވެ.
3000ށްވުރެ ގިނަ ގަބީލާތަކުގެ ވެރިންނާއި އޮފިޝަލުންނާއި ދީނީ އިލްމުވެރިން ވަނީ ކަންދަހާރަށް އެއްވެފައެވެ. މިއީ ތާލިބާން ޖަމާއަތުގެ އެންމެ އިސް ރޫހާނީ ލީޑަރު ހައިބަތުﷲ އަޚުންޒާދާ ހުންނަވާ ތަނެވެ. ކަންދަހާރުގައި ތާލިބާނުގެ އެންމެ އިސްލީޑަރާއެކު ކުރިޔަށްގެންދިޔަ މިބައްދަލުވުމަކީ ފާއިތުވި އަހަރެއްހާ ދުވަހުގެ ތެރޭގައި މިގޮތަށް ކުރިޔަށް ގެންދިޔަ ދެ ވަނަ ބައްދަލުވުމެވެ.
މިބައްދަލުވުމުގައި ވާހަކަފުޅުދައްކަވަމުން ހައިބަތުﷲ އަޚުންޒާދާ ވަނީ، މާތްﷲގެ ރަހުމަތްފުޅުން މިފަދަ ބައްދަލުވުމެއް ބޭއްވުމުގެ މިނިވަންކަން ލިބިފައިވާކަން ފާހަގަކުރައްވާފައެވެ. އަދި ބައިނަލްއަގްވާމީ މުޖުތަމައާ ގުޅުން ބާއްވަމުން ގެންދާނީ އިސްލާމީ ޝަރީއަތާއި އެއްގޮތަށްކަމަށާއި، އެއްވެސް ގައުމަކާއެކު އިސްލާމީ ޝަރީއަތާ ޚިލާފަށް ގުޅުން ބާއްވަންޖެހޭނަމަ އެގައުމަކާއެކު ގުޅުން ނުބާއްވާނެކަމަށެވެ.
މީގެއިތުރުން މިބައްދަލުވުމުގައި ވަނީ، ދާދިފަހުން އެމެރިކާއިން ޑްރޯން ހަމަލާދީގެން އަލްގައިދާގެ ލީޑަރ އައިމަން އައްޒަވާހިރީ މަރާލާފައިވާ މައްސަލައާ ގުޅުވައި، އަފްޣާނިސްތާނުގެ ވައިގެ ސަރަހައްދު ބޭނުންކޮށްގެން އެފަދަ ހަމަލާތައް ދިނުން ކުށްވެރިކޮށްފައެވެ.
އެމެރިކާއާ ތާލިބާންގެ ގުޅުމަށް މިހަމަލާއާ ގުޅިގެން ވަނީ އަސަރުކޮށްފައެވެ. އެއީ އެމެރިކާއާއި ތާލިބާނުން ވެފައިވާ އެއްބަސްވުމާ ޚިލާފަށް އަފްޣާނިސްތާނުގެ ބިމުން އައްޒަވާހިރީއަށް ޖާގަދިނުމުންނެވެ. އެމެރިކާއާއި ތާލިބާނުން ވެފައިވާ އެއްބަސްވުމުގައި، ޓެރަރިސްޓް ޖަމާއަތްތަކަށް އަފްޣާނިސްތާނުގެ ބިމުން ޖާގަ ނުދިނުމަށް ވަނީ އެއްބަސްވެފައެވެ.
އަނެއްކޮޅުން ދުނިޔޭގެ އެއްވެސް ގައުމަކުން މިހާތަނަށް އައިއިރު ތާލިބާން ސަރުކާރު ރަސްމީކޮށް ބަލައިގެންފައެއްނުވެއެވެ. މިއާއެކު އަފްޣާނިސްތާނަށް ކުރިމަތިވެފައިވާ އިގުތިސާދީ ބޮޑު އަނދަވަޅުން އެގައުމު ސަލާމަތްކުރުމަށް ތާލިބާން ސަރުކާރަށް ވަނީ ބޮޑެތި ގޮންޖެހުންތަކާ ކުރިމަތިވެފައެވެ. ގިނަ ގައުމުތަކުން ތާލިބާން ސަރުކާރަށް ޕްރެޝަރކުރާ މައިގަނޑު ކަމަކީ އަންހެނުންނާއި އަންހެންކުދިންނަށް ތައުލީމުގެ ފުރުސަތު ދިނުމާމެދުއެވެ.
