ރައީސުލްޖުމްހޫރިއްޔާކަމަށް ކުރިމަތިލައްވާ ފަރާތްތަކުގެ ތެރެއިން 35 އިންސައްތަ ލިބިގެން ވެރިކަމަށް އަންނަ މީހަކީ ދައުލަތުގެ އެންމެ އިސްވެރިޔާގެ ގޮތުގައި ހުންނަންޖެހޭ މީހެއްކަމަށް ގަބޫލުފުޅުނުކުރައްވާ ކަމަށް، ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ވިދާޅުވެއްޖެއެވެ.
ބަރުލަމާނީ ނިޒާމާ ގުޅޭގޮތުން ސިޔާސީ އެކި ލީޑަރުން ވާހަކަފުޅުދައްކަވަމުން ގެންދަވާ މި ދަނޑިވަޅުގައި، "ރާއްޖެ ޓީވީ"އަށް ދެއްވި އެކްސްކްލޫސިވް ފޯން އިންޓަރވިއުގައި، އެމްޑީޕީގެ އެންމެ އިސް ލީޑަރު، ރައީސް ސޯލިހު ވިދާޅުވީ 35 އިންސައްތަ އިސްލާހަކީ އެމަނިކުފާނު ތާއީދުކުރައްވާ އިސްލާހެއް ނޫންކަމަށެވެ.
ރައީސް ވިދާޅުވީ 35 އިންސައްތަ ލިބިގެން އަންނަ މީހަކު ސަރުކާރުގެ ނުވަތަ ދައުލަތުގެ އެންމެ އިސްވެރިޔާގެ ގޮތުގައި ހުންނާކަށް ގަބޫލުފުޅުނޫންކަމަށެވެ. އަދި ގަބޫލުފުޅުކުރައްވަނީ މިހާރު މި އޮތްގޮތަށް، ރައްޔިތުންގެ ފުރިހަމަ އަޣުލަބިއްޔަތުން ވެރިކަމަށް މީހަކު ހޮވުންކަމަށެވެ. އެއީ 50 އިންސައްތައާއި އަދި އިތުރަށް ވޯޓު ލިބިގެން އަންނަ ފަރާތަކަށް ދައުލަތުގެ ވެރިކަން/ސަރުކާރުގެ ވެރިކަން އޮންނަގޮތަށް އޮތުންކަމަށް ރައީސް ވިދާޅުވިއެވެ.
އަޅުގަނޑު އެއްވެސް ގޮތަކަށް ގަބޫލެއްނުކުރަން 35 އިންސައްތަ ލިބިގެން އަންނަ މީހަކަށް ސަރުކާރުގެ ނުވަތަ ދައުލަތުގެ އެންމެ އިސްވެރިޔާގެ ގޮތުގަ ހުންނާކަށެއް. އަޅުގަނޑަށް ގަބޫލުކުރެވެނީ މިހާރު މި އޮތްގޮތަށް ރައްޔިތުންގެ ފުރިހަމަ އަޣުލަބިއްޔަތު.ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހް
ރައީސް ވިދާޅުވީ އެމަނިކުފާނު ބޭނުންފުޅުވަނީ މިހާރު މި އޮތްގޮތް ކަމަށެވެ.
ރައީސުލްޖުމްހޫރިއްޔާގެ މަގާމަށް ކުރިމަތިލައްވާ ފަރާތްތަކުގެ ތެރެއިން، މަގާމަށް އިންތިޚާބު ކުރެވޭނީ 35 އިންސައްތައަށްވުރެ މަތިން އަޣުލަބިއްޔަތު ލިބޭ މީހަކަށްކަން ބަޔާންކޮށް، ގާނޫނު އަސާސީއަށް އިސްލާހު ހުށަހަޅަން ރައީސް ނަޝީދުގެ ގަރާރުގައި ވިދާޅުވެފައިވެއެވެ.
މި އިސްލާހުގައި ވަނީ، ރައީސުލްޖުމްހޫރިއްޔާ އިންތިޚާބުކުރާނީ ރައްޔިތުންގެ އާންމު ވޯޓަކުންކަމަށާއި، އެ މަގާމަށް ކުރިމަތިލާ މީހުންގެ ތެރެއިން ރައީސުލްޖުމްހޫރިއްޔާކަމުގެ މަގާމަށް އިންތިޚާބުވާނީ އެންމެ ގިނަ ވޯޓު ލިބޭ، އަދި ވޯޓުދިން މީހުންގެ 35 އިންސައްތައަށްވުރެ މަތީ އަޣުލަބިއްޔަތެއް ހޯދާ މީހެއްކަމަށެވެ.
މިބައި އިތުރަށް ތަފްސީލުކޮށްދެއްވަމުން ވިދާޅުވެފައިވަނީ، ބައެއް ގައުމުތަކުގައި ބަރުލަމާނީ ނިޒާމުގައި ރައީސުލްޖުމްހޫރިއްޔާއަކީ ރައްޔިތުންގެ މަޖިލީހުން އައްޔަންކުރާ މީހެއްގެ ގޮތުގައި ކަނޑައަޅާފައި އޮންނަ ސަބަބަކީ، އެ ގައުމުތަކުގައި ރައީސުލްޖުމްހޫރިއްޔާއަކީ ދައުލަތުގެ އެންމެ އިސްވެރިޔާގެ ހައިސިއްޔަތުން ކަމައެކަނި ރަމްޒީ ބާރުތަކެއް ލިބިފައިވާ މީހަކަށް ވާތީކަމަށެވެ.
އަދި ރާއްޖެއަށް ތައާރަފްކުރި ނިޒާމުގައި ދައުލަތް ހިންގުމުގެ އިސް މަގާމުތަކަށް މީހުން އައްޔަންކުރުމަށް މަޖިލީހަށް ނަން ފޮނުވުމުގެ ބާރާއި، މަޖިލިސް އުވާލުން ފަދަ ބާރުތައް ރައީސުލްޖުމްހޫރިއްޔާއަށް ލިބިގެންވާ ގޮތަށް ހުށަހަޅާތީ، ރައީސުލްޖުމްހޫރިއްޔާކަމަށް އިންތިޚާބުކުރަންވާނީ ރައްޔިތުންގެ އަޣުލަބިއްޔަތު އޮންނަ މީހެއްކަމަށް ފެންނަކަމަށެވެ.
