ދުނިޔޭގެ އެންމެ ވަރުގަދަ ބާރުގެ ގޮތުގައި ސިފަ ކުރަމުން އަންނަ އެމެރިކާއިން ކުރި އެންމެ ނާކާމިޔާބު ހަނގުރާމައިގެ ގޮތުގައި ގިނަ ބަޔަކު ސިފަ ކުރާ އަފްޣާން ހަނގުރާމައަށް ގެނައި ކުއްލި ނިމުމާއެކު އަފްޣާނިސްތާނުގެ ލަގަން ނެގީ ހަތިޔާރު އެޅި ހަނގުރާމަވެރި ޖަމާއަތެއްގެ ގޮތުގައި ލިސްޓުކޮށްފައި ވާ ޠާލިބާން ޖަމާއަތުގެ ހަނގުރާމަވެރިންނެވެ.

މި ދަނޑިވަޅަކީ އިންތިހާ ފަޤީރު ކަން އިތުރު ވުމާއި، ހަނަފަސްކަން ފެތުރިގެން ދިއުމުގެ އިތުރުން ހަށިގަނޑަށް ބޭނުންވާ މުހިންމު މާއްދާތައް ނުލިބި މެލްނިއުޓްރިޝަންގެ މައްސަލަތައް އިތުރުވުމާއި، އަންހެނުންގެ ޙައްޤުތައް ކަށަވަރު ކުރުމުގައި އަފްޣާނިސްތާނުގެ ކުރިމަގު ބަނަވެފައި ވާ ދަނޑިވަޅެކެވެ. ނަމަވެސް، ޠާލިބާނުންގެ ވެރިކަމަށް 1 އަހަރު ފުރުން، އަފްޣާނިސްތާނުގައި ވަނީ ކުލަގަދަ ގޮތެއްގައި ފާހަގަ ކޮށްފައެވެ.

ޠާލިބާނުންގެ ވެރިކަމަށް 1 އަހަރު ފުރުން ފާހަގަ ކުރުމުގެ ގޮތުން ބައެއް މީހުން ވަނީ ފަޒާގެ ތެރެއަށް ބަޑިޖަހާފައެވެ. ޠާލިބާން ހަނގުރާމަވެރިންގެ ގިނަ އަދަދެއްގެ ބަޔަކު ވަނީ، އެއް ސަރަހައްދަކަށް ޖަމާވެ، އެ ޖަމާއަތުގެ ކަޅާއި ހުދުގެ ދިދަ، ވައިގެ ތެރޭގައި ވިހުރުވާފައެވެ. މައިގަނޑު އިހުތިފާލުތައް ކުރިއަށް ދިޔައީ، އަފްޣާނިސްތާނުގައި ހުންނަ އެމެރިކާ އެމްބަސީ ކުރިމަތީގައި ކަމަށް ވާ އިރު، އެތައް ސަތޭކަ ބަޔަކު ވަނީ އެސަރަހައްދަށް ޖަމާވެ، އުފާ ފާޅު ކުރުމުގެ ހަރަކާތްތަކުގައި ބައިވެރިވެފައެވެ.

އަފްޣާނިސްތާނުގައި ޠާލިބާނުން ހިންގާ ސަރުކާރުގެ ވަޒީރުންވެސް ވަނީ ހަރަކާތްތަކުގައި ބައިވެރިވެފައެވެ. އެކްޓިންގް ފޮރިން މިނިސްޓަރު އާމިރު ޚާން މުއްތަޤީ ވަނީ، ޠާލިބާނުންގެ ވެރިކަމާއެކު އަފްޣާނިސްތާނަށް ސަލާމަތްތެރިކަން ލިބިފައި ވާ ކަން ފާހަގަ ކޮށްފައެވެ. އެގޮތުން އެމެރިކާއިން ގެނެސްދިނުމަށް ފެއިލްވި ސަލާމަތާއި ރައްކާތެރިކަން އަފްޣާނިސްތާނަށް ލިބިފައި ވާ ކަމަށާ، އަފްޣާނިސްތާނުން ބޭނުން ވަނީ މުޅި ދުނިޔެއާއިއެކު އެދެވޭ ގުޅުންތަކެއް ދަމަހައްޓަން ކަން މުއްތަޤީ ވަނީ ފާހަގަ ކޮށްފައެވެ.

ޖުމުލަ ގޮތެއްގައި ބަލާއިރު ޠާލިބާނުންގެ ވެރިކަމުގައި އަފްޣާނިސްތާނުގައި ހަމަޖެހުން ޤާއިމު ވެފައި ވާ ކަމަށް ދެންނެވިދާނެއެވެ. ނަމަވެސް އައިސިސް ހަނގުރާމަވެރިންގެ ފަރާތުން ދޭތެރެ ދޭތެރެއިން ހަމަލާ އަމާޒުވި މަންޒަރު ވަނީ ފެނިގެންގޮސްފައެވެ.

ކަން މިހެން އޮތް އިރު، އަފްޣާނިސްތާނަށް އުފުލަން ޖެހިފައިވާ އިގުތިސޯދީ ތަކުލީފުތަކުގެ މަތިން ހަނދާން ނައްތާލެވޭކަށް ނެތެވެ. އިގުތިސޯދީ ހަމަޖެހުމެއް ނެތެވެ. ބައިނަލްއަގުވާމީ މުޖުތަމައުން އަފްޣާނިސްތާނުގެ ސަރުކާރު އެކަހެރިކޮށް، އަފްޣާނިސްތާނުގެ ލީޑަރުން ބަލައިގަތުމަށް އިންކާރު ކުރަމުން ދާއިރު، އެކަމުގެ ސީދާ އަސަރު ފޯރަމުން ދަނީ އަފްޣާނިސްތާނުގެ އާންމު ރަށްވެހިންނަށެވެ.

ބޭރުގެ ފަރާތްތަކުން އަފްޣާނިސްތާނަށް ދެމުން ދިޔަ ތަރައްޤީގެ އެހީތައް މެދުކަނޑާލާފައި ވާ އިރު، މުޖުތަމައުގެ ޒަރޫރީ ބޭނުންތަކަށްވެސް ނޭދެވޭ އަސަރު ވަނީ ފޯރާފައެވެ. އަންހެނުންނާއި އަންހެން ކުދިންގެ ޙައްޤުތައް އިންތިހާއަށް ނިގުޅައިގެންފައި ވާ ކަމުގެ ޝަކުވާ ދޭތެރެ ދޭތެރެއިން ފެންމަތިވެއެވެ.

އަފްޣާނިސްތާނު ކޮންޓްރޯލް ކުރަމުންދާ ޠާލިބާން ހަނގުރާމަވެރިން ދަނީ، ބޭރުގެ ފަރާތްތަކުން ހިފަހައްޓާފައި ވާ މަރުކަޒީ ބޭންކުގެ ރިޒާވްގައި ވާ 9 ބިލިއަން ޑޮލަރު ރިލީޒް ކުރުމަށް ޑިމާންޑް ކުރަމުންނެވެ. ނަމަވެސް އެމެރިކާއިން ދަނީ، އެ ކަމަށް ފުރުޞަތު ފަހި ކުރަނީ ނަމަ، އަފްޣާނިސްތާނުގައި އޮތް ޠާލިބާނުންގެ ލީޑާޝިޕަށް ބަދަލު ގެނައުމަށް ޑިމާންޑް ކުރަމުންނެވެ. ހުޅަނގުގެ ޑިމާންޑްތަކަށް ދީލާލުމަށް ޠާލިބާނުން އިންކާރު ކުރެއެވެ. އެހެންކަމުން، ދެ ފަރާތުން ކުރެ އެއް ފަރާތުން ދޫ ދިނުމުން މެނުވީ، އަފްޣާނިސްތާނުގެ މަސްރަހުން އެދެވޭ ބަދަލެއް ފެންނާނެ ކަމަކަށް ނުބެލެވެއެވެ.