އިންޑިއާ ހައިކޮމިޝަން ހުޅުމާލެއަށް ބަދަލުކޮށްފި
15 އޯގަސްޓު 2022 | ހޯމަ 02:05އިންޑިއާ ހައިކޮމިޝަން އިމާރާތް މިހާރު ހުންނާނީ ހުޅުމާލެ ލޮޓް ނަންބަރު 11499 ގައި
އިންޑިއާ ހައި ކޮމިޝަން ކުރިން ހުރި އިމާރާތް
ރާއްޖޭގައި ހުންނަ އިންޑިއާގެ ހައި ކޮމިޝަން ހުޅުމާލެއަށް ބަދަލުކޮށްފިއެވެ.
މި ހަފްތާގެ އާދީއްތަ ދުވަހުން ފެށިގެން ހައިކޮމިޝަނުން ޚިދުމަތްދޭނީ ހުޅުމާލެ ފުރަތަމަ ފިޔަވަހީގެ ހިތިގަސްމަގުގެ ގޯޅި 4 ގެ ލޮޓް ނަންބަރު 11499 ގައި ހުންނަ އިމާރާތުންނެވެ. މިއީ ހުޅުމާލޭގެ އިންޑޯ ސްވިން ޕޫލު ހުންނަ އިމާރާތުގެ ކުރި،މައްޗަށް އޮންނަ ގޯޅީގައި ހުންނަ އިމާރާތާކެވެ.
އިންޑިއާ ހައިކޮމިޝަން މިހާތަނަށް ހިންގަމުން އައީ ހ. އަތިރީގެއާގޭގައެވެ. އެތަނުގައި ޚިދުމަތް ދެމުން އައި ނަމަވެސް ޖާގައިގެ ދަތިކަމުގެ ސަބަބުން ޚިދުމަތް ދިނުމުގައި ދަތިތަކާ ދިމާވާ ކަމަށް އެ ކޮމިޝަނުން ވަނީ މީގެ ކުރިން ވެސް ބުނެފައެވެ.
ރާއްޖޭގައި ހުންނަ ބޭރު ޤައުމުތަކުގެ އެމްބަސީތަކަށް ދިމާވެފައިވާ ޖާގައިގެ ދަތިތައް ހައްލު ކުރުމަށް ދެވަނަ ފިޔަވަހިން އެ ޤައުމުތަކުގެ އެމްބަސީތައް އެޅުމަށް ބިން ވެސް ސަރުކާރުން ވަނީ ހަމަޖައްސައިދީފައެވެ. މީގެ ތެރޭގައި އިންޑިއާ ވެސް ހިމެނޭއިރު އެ ކޮމިޝަނުގެ އައު އިމާރާތުގެ ބިންގާ 2019 ވަނަ އަހަރު ވަނީ އަޅާފައެވެ. އެ އިމާރާތުގެ މަސައްކަތް އަދި އެއްކޮށް ނުނިމެއެވެ.
އިންޑިއާގެ އިތުރުން އެމްބަސީތައް އަޅަން ހުޅުމާލެ ދެވަނަ ފިޔަވަހިން ބިން ދޫކުރި ޤައުމުތަކުގެ ތެރޭގައި ލަންކާ އާއި ބަންގްލަދޭޝާއި ޗައިނާ އާއި ޕާކިސްތާނާއި ޔޫއޭއީ ހިމެނެއެވެ.
