ގާދިއްފުށި ކައުންސިލަށް ބައެއް ކަންކަން ސާފުކުރަން ދިޔަ ބަޔަކަށް ޖަވާބުދާރީނުވެ ކައުންސިލަރުން ފިއްލަވައިފި
އެމީހުން ކައުންސިލް އިދާރާއަށް ގޮސްފައިވަނީ އެ ރަށުގައި އޮންނަ ރައްޔިތުންގެ ދޯންޏާ ގުޅުންހުރި މައްސަލައެއްގައި
ކައުންސިލް އިދާރާއަށް މައުލޫމާތު ސާފުކުރަން ދިޔަ މީހުން އަދިވެސް ތިބީ އެތަނުގައި
ކައުންސިލްގެ ފަރާތުން ސާފުކުރަން ހުރި ކަންތައްތަކެއް ސާފުކުރުމަށް ތ. އަތޮޅު ގާދިއްފުށީ ކައުންސިލް އިދާރާއަށް ދިޔަ ރައްޔިތުންގެ ބަޔަކު އިދާރާގައި ތިއްބާ، ޖަވާބުދާރީވާން މަޑުނުކޮށް ރަސްމީގަޑި ނިމުމުން ކައުންސިލަރުން "ފިއްލަވައިފި" އެވެ.
އެ ރަށުން މައުލޫމާތު ދިން މީހަކު ބުނީ، ކައުންސިލުން ސާފު ކުރަންޖެހޭ އެކި ކަންކަމާ ގުޅޭގޮތުން މައުލޫމާތު ސާފުކުރުމަށް އެ ރަށުގެ ރައްޔިތުންގެ ބަޔަކު މިއަދު ހެނދުނު 11 ޖަހާ އެކާހަށްހާއިރުއްސުރެ ތިބީ ކައުންސިލް އިދާރާގައި ކަމަށެވެ. އެތަނަށް ދިޔުމުން ކައުންސިލަރުންނާ ބައްދަލުވެ ވާހަކަ ދެކެވުނު ކަމަށާއި ނަމަވެސް، މަޝްވަރާ ކުރުމަށް ކަމަށްބުނެ ބައްދަލުވުން ކުރުކޮށްލުމަށްފަހު، ރަސްމީގަޑި ނިމުމުން ކައުންސިލަރުންނާއި ޒިންމާދާރުވެރިޔާ ވެސް ހިމެނޭހެން ފަހަރަކު ބޭފުޅަކު ގެއްލެމުން ގޮސް، އެންމެން އޮފީހުން ބޭރަށް ވަޑައިގެންފައިވާ ކަމަށް ވެސް މައުލޫމާތު ދިން މީހާ ބުންޏެވެ.
އެ ރަށުން ވާހަކަ ދެއްކި މީހާ ބުނީ، ރައްޔިތުންގެ ބަޔަކު ކައުންސިލާ ބައްދަލު ކުރަން ދިޔަ މައިގަނޑު ބޭނުމަކީ އެ ރަށުގައި އޮންނަ ރައްޔިތުންގެ ދޯނި ކުއްޔަށް ދީފައިވާ ފަރާތާއެކު ހަދާފައިވާ އެއްބަސްވުން ހަމަވެ އެތައް ދުވަހެއް ވެފައިވާއިރު ވެސް އޭނާ އަތުން ދޯނި އަތުލާ ރަށަށް ގެނެވިފައި ނުވާ މައްސަލައާއި، ގާނޫނުން ލާޒިމް ކުރާ ރައްޔިތުންގެ ބައްދަލުވުންތައް ވެސް ކައުންސިލުން ނުބާއްވާ މައްސަލައާއި އެނޫންވެސް ޒުވާނުންނާ ގުޅުން ހުރި ބައެއް މައްސަލަތަކުގައި ކަމަށެވެ.
މީގެ ތެރެއިން ރައްޔިތުންގެ މަސްދޯނި ދޫކޮށްފައިވާ ފަރާތުން ދޯނި އަތުލާ ރަށަށް ގެނައުމުގެ މައްސަލައިގައި، ކައުންސިލަށް ދިޔަ ރައްޔިތުން ވަނީ 48 ގަޑިއިރުގެ ތެރޭގައި ދޯނި ރަށަށް ގެނައުމަށް ކައުންސިލަށް މުއްދަތެއް ދީފައެވެ. އެ މީހުންނާއެކު ކައުންސިލް އިދާރާގައި ބޭއްވި ބައްދަލުވުމުގައި ކައުންސިލުން ބުނެފައިވަނީ، އެއްބަސްވުމާ އެއްގޮތަށް އަމަލު ކުރުމަށް މަސައްކަތް ކުރަމުން ދާކަމަށާ ނަމަވެސް، އެ ދޯނި ހަވާލުވި ފަރާތުން ފާހަގަ ކުރާ ބައެއް ކަންކަން އެބަހުރި ކަމަށެވެ. އެގޮތުން އެ ފަރާތުން ގެންގުޅޭ މުވައްޒަފުންނަށް މުސާރަދޭން ދަތިވެފައިވާ މައްސަލަފަދަ ކަންކަން ކައުންސިލުން ފާހަގަ ކޮށްފައިވެއެވެ. ނަމަވެސް، ރައްޔިތުންގެ ފަރާތުން ބައްދަލުވުމަށް ދިޔަ މީހުންވަނީ އެކަން ބަލައި ނުގަނެވޭނެ ކަމަށާއި ކުރީގެ ކައުންސިލްގައި ވެސް ހައެއްކަ މަސް އިތުރަށް ދީފައިވާ ކަމަށާ އަދި މި ކައުންސިލުންވެސް މިއަދާހަމައަށް ވެސް ދޯނި އެ ފަރާތުން އަތުލާފައި ނުވާކަން ފާހަގަކޮށްފައެވެ.
މި ބައްދަލުވުމަށްފަހު، ސާފުކުރަންޖެހޭ ކަންކަން ހުރިކަމަށްބުނެ ބައްދަލުވުން ކުރުކޮށްލިފަހުން، ފަހަރަކު ކައުންސިލަރަކު ގެއްލެމުން ގެއްލެމުންގޮސް، މިހާރު އިދާރާގައި ހުންނެވީ އެންމެ ކައުންސިލް މެންބަރެއް ކަމަށާ، ޒިންމާދާރު ވެރިޔާވެސް 2 ޖެހުމާއިއެކު އިދާރާއިން ވަޑައިގެންފައިވާ ކަމަށް އެ ރަށުން މައުލޫމާތު ދެއެވެ. ކައުންސިލް އިދާރާއަށް ދިޔަ ރައްޔިތުންގެ ގުރޫޕް މިރޭ 7 ޖެހިއިރުވެސް ތިބީ ކައުންސިލް އިދާރާގައެވެ. އެ މީހުން އިދާރާގައި ތިބުމުން ކައުންސިލް އިދާރާ ހުރީ ބަންދު ނުކުރެވިއެވެ.
