ކޮމަންވެލްތު ގޭމްސްގެ ޓޭބަލް ޓެނިސްގައި ކުޅުނު ތިން ވަނަ މެޗުން ބަލިވެ ޓީމު އިވެންޓުން ރާއްޖޭގެ އަންހެން ގައުމީ ޓީމު ކަޓައިފިއެވެ.

ގޭމްސްގެ ފުރަތަމަ މެޗުގައި ރާއްޖެ ބަލިވީ މޮރިޝަސް އަތުން 3-2 ގޭމުންނެވެ. ދެ ވަނަ މެޗުގައި މެލޭޝިއާ އަތުން ބަލިވީ ސީދާ ތިން ގޭމުންނެވެ. ފަހު މެޗުގައި އޮސްޓްރޭލިއާ އަތުން ބަލިވީ ވެސް ސީދާ ތިން ގޭމުންނެވެ.

މެޗުގެ ފުރަތަމަ ޑަބްލްސްގައި ރާއްޖޭގެ ފާތިމަތު ޖުމާނާ ނިމާލްއާއި އައިޝަތު ރަފާ ނާޒިމް ނިކުތީ އޮސްޓްރޭލިއާގެ ޖިއާން ފޭންގް ލޭ އަދި މިންޔުން ޖީގެ ޕެއަރއާ ދެކޮޅަށެވެ. އެ ގޭމު އޮސްޓްރޭލިއާއިން ކާމިޔާބުކުރީ ސީދާ ތިން ސެޓުންނެވެ. އެއީ 11-4، 11-6 އަދި 11-6ންނެވެ.

ފުރަތަމަ ސިންގަލްސްގައި ރާއްޖޭގެ ފާތިމަތު ދީމާ އަލީ ނުކުތީ އޮސްޓްރޭލިއާގެ ޔަންޒީ ލިއުއާ ދެކޮޅަށެވެ. މި ގޭމު އޮސްޓްރޭލިއާގެ ޔަންޒީ ކާމިޔާބުކުރީ ސީދާ ތިން ސެޓުންނެވެ. އެއީ 11-2، 11-6 އަދި 11-3ންނެވެ. ފަހު ގޭމުގައި ރާއްޖޭގެ ރަފާއާ ދެކޮޅަށް ނިކުތީ އޮސްޓްރޭލިއާގެ މިންޔުންއެވެ. މި ގޭމުގެ ސެޓުތައް އޮސްޓްރޭލިއާގެ މިންޔަން ކާމިޔާބުކުރީ 11-6، 11-3 އަދި 11-5ންނެވެ.

ތިން މެޗުން ބަލިވެ ރާއްޖެ ދިޔައީ ގްރޫޕް ސީގެ ފުލަށެވެ. މި ގްރޫޕްގެ އެއް ވަނަ ލިބެނީ ކުޅުނު ތިން މެޗުން މޮޅުވި އޮސްޓްރޭލިއާއަށެވެ. މެލޭޝިއާއަށް ދެވަނަ ލިބެނީ ކުޅުނު ތިން މެޗުގެ ތެރެއިން ދެ މެޗުން މޮޅުވުމުންނެވެ. ގްރޫޕްގެ ތިން ވަނަ ލިބެނީ އެއް މެޗުން މޮޅުވި މޮރިޝަސްއަށެވެ.