ބޮޑު ތަފާތަކުން ބިސްބުރު ބަލިކޮށް، ބުރު އެއްވަނާގައި ހަމަޖެހިލައިފި

މިހާރު ކުރިއަށްދާ އެފްއޭއެމް ދެވަނަ ޑިވިޝަން ފުޓްބޯޅަ މުބާރާތުގައި ބޮޑު ތަފާތަކުން ބިސްބުރު ސްޕޯޓްސް ކްލަބް ބަލިކޮށް، ތާވަލުގެ އެއްވަނައިގައި ބުރު ސްޕޯޓްސް ކްލަބް ހަމަޖެހިލައިފިއެވެ.

ގްރޫޕު އެކެއްގައި ބިސްބުރާއި ބުރު ވާދަކުރީ މިއަދު ހަވީރު ގަލޮޅު ދަނޑުގައެވެ. މި މެޗު ބުރުން ކާމިޔާބުކުރީ 6-0 ގެ ތަފާތު ބޮޑު ނަތީޖާއަކުންނެވެ. ފުރަތަމަ ހާފުގެ 17 ވަނަ މިނެޓުގައި ބުރަށް ލީޑު ނަގައިދިނީ ސަރބިއާގެ ސްޓްރައިކަރު ސްޓެފަން ޑުރިކްއެވެ. ފުރަތަމަ ހާފުގައި ބުރަށް ލީޑު ފުޅާ ކޮށްދިނީ އަހުމަދު ނާޒިމްއެވެ.

ބުރުގެ ބާކީ ހަތަރު ލަނޑު އެޓީމުން ކާމިޔާބުކުރީ ދެވަނަ ހާފުގައެވެ. އޭގެ ތެރެއިން އެއް ލަނަޑަކީ ބިސްބުރުގެ އިބްރާހިމް އީމާއު އަތުން ބައިކޮޅަށް ވަން ލަނޑެކެވެ. ފުރަތަމަ ލަނޑު ޖެހި ސްޓެފަން ވަނީ ދެވަނަ ހާފުގައި އިތުރު ދެލަނޑުޖަހާ ހެޓްރިކް ހަދާފައެވެ. މެޗުގެ ފަހު ވަގުތުގައި ބުރުގެ ހަވަނަ ލަނޑު އެޓީމަށް ކާމިޔާބުކޮށްދިނީ އަބްދުﷲ ޝާފިއުއެވެ.

މި ނަތީޖާއާއެކު ގްރޫޕު އެކެއްގެ އެއްވަނައިގައި ބުރު އޮތީ ހަތަރު މެޗު ކުޅެގެން ލިބުނު 12 ޕޮއިންޓާއިއެކުއެވެ. ތިން މެޗުން ލިބުނު ހަޕޮއިންޓާއިއެކު ދެވަނައިގައި ކުޑަ ހެންވޭރު ޔުނައިޓެޑް އޮތްއިރު، ގޯލުގެ ތަފާތުން ކުޑަ ހެންވޭރު ކުރީގައި އޮތުމުން ޓެންޓް ސްޕޯޓްސް ކްލަބް އޮތީ ތިންވަނައިގައެވެ. ހަތަރުވަނައިގައި އޮތް ބިސްބުރަށްވެސް ލިބެނީ ހަ ޕޮއިންޓެވެ. ދިވެހި ސިފައިންގެ ކްލަބް ފަސްވަނައިގައި އޮތީ ތިން ޕޮއިންޓާއިއެކުއެވެ. ހަމަ އެއަދަދަށް ޕޮއިންޓު ހޯދައިގެން ކްލަބް ޕީކޭ ހަވަނައިގައި އޮތްއިރު، ޖޭޖޭ ސްޕޯޓްސް ކްލަބަށް ލިބެނީ ތާވަލުގެ ހަތްވަނައެވެ. ޕޮއިންޓެއް ނުލިބި ތާވަލުގެ ފުލުގައި އޮތީ ކެޕިޓަލް ސިޓީ ސްޕޯޓްސް ކްލަބްއެވެ.