އިނގިރޭސިވިލާތުގެ ކޮންމެ 18 މީހަކުން އެކަކު ކޮވިޑަށް ޕޮޒިޓިވްކަމަށް ތަފާސްހިސާބުތަކުން ދައްކައިފިއެވެ.

ބީބީސީގައި ރިޕޯޓުކޮށްފައިވާގޮތުން އިނގިރޭސިވިލާތުގެ ގާތްގަނޑަކަށް 3.5 މިލިއަން މީހުން ކޮވިޑަށް ޕޮޒިޓިވްވެފައިވާއިރު، އެއީ ގާތްގަނޑަކަށް އެވްރެޖްކޮށް ކޮންމެ 18 މީހަކުން އެކެކެވެ.

އެއީ ފާއިތުވި ހަފުތާތަކާ އަޅައިބަލާއިރު، އިތުރު އަދަދެއްކަމަށް ބީބީސީގައި ރިޕޯޓުކޮށްފައިވެއެވެ. މި ކޭސްތައް އިތުރުވަމުންދަނީ މިހާރު ފެތުރެމުންދާ އޮމިކްރޯންގެ ސަބް ވޭރިއަންޓުތައް ކަމަށްވާ ބީއޭ-4 އަދި ބީއޭ-5ގެ ސަބަބުންނެވެ.

އިނގިރޭސިވިލާތުގައި ކުރިން ބަލިޖެހިފައިވާ ފަރާތްތައްވެސް އަނެއްކާވެސް ޕޮޒިޓިވްވަމުންދާކަމަށް ބޭރުގެ ނޫސްތަކުން ވަނީ ރިޕޯޓުކޮށްފައެވެ.

ސިއްހީ އޮފިޝަލުން ވަނީ ވެކްސިން ފުރިހަމަކުރަންޖެހޭ ފަރާތްތައް ވީހާވެސް އަވަހަށް ވެކްސިން ފުރިހަމަކޮށް، ބޫސްޓަރ ޑޯޒްވެސް ޖެހުމަށް އިލްތިމާސްކޮށްފައެވެ. އަދި މިހާރު ވައިރަސް ފެތުރެމުންދާ ނިސްބަތް ދެނެގަތުމަށް ކަމާގުޅުންހުރި ޑޭޓާތައް ބަލައި، އެކަމުގެ ދިރާސާތައް އިނގިރޭސިވިލާތުގެ ކަމާބެހޭ ފަރާތްތަކުން ދަނީ ހަދަމުންނެވެ.

މިހާތަނަށް އެއްކުރެވިފައިވާ ޑޭޓާތަކަށް ބަލާއިރު، އިނގިރޭސިވިލާތުގެ ހުރިހާ ހިސާބެއްގައިވެސް ވައިރަސް ފެތުރެމުންދާ މިންވަރު އިތުރުވެފައިވާކަމަށް ސިއްހީ މާހިރުންނާ ހަވާލާދީ ބޭރުގެ ނޫސްތަކުން ރިޕޯޓުކޮށްފައިވެއެވެ. އެގޮތުން އެންމެ ބޮޑަށް މިވަގުތު ބަލި ފެތުރެމުންދަނީ ސްކޮޓްލެންޑުގައި ކަމަށްވެއެވެ.

އޭގެ އިތުރުން، ހޮސްޕިޓަލުގައި އެޑްމިޓްކޮށްގެން ފަރުވާދޭން ޖެހިފައިވާ މީހުންގެ އަދަދުވެސް އިތުރުވެފައިވާއިރު، އުމުރުން 75 އަހަރުން މަތީގެ މީހުން ގިނަކަން ވަނީ ފާހަގަކޮށްފައެވެ. ޑރ. މަރީ ރަމްސޭ ވިދާޅުވާގޮތުގައި، އިނގިރޭސިވިލާތުގެ އުމުރުން 75 އަހަރުން މަތީގެ 16 އިންސައްތަ މީހުން އަދި މިހާތަނަށް ބޫސްޓަރ ޑޯޒް ޖަހާފައެއްނުވެއެވެ.

އިނގިރޭސިވިލާތުގައި ދުވާލެއްގެ މައްޗަށް 11،000ށްވުރެ ގިނަ މީހުންނަށް ކޮވިޑް ބަލީގެ ސަބަބުން ހޮސްޕިޓަލުގައި އެޑްމިޓްކޮށްގެން ފަރުވާ ދޭން ޖެހިފައިވެއެވެ.