އިގްތިސާދީ އަނދަވަޅަކަށް ގައުމު ވައްޓާލެއްވުމަށްފަހު އިސްތިއުފާގެ ކުރިން ފިއްލަވައިގެން ލަންކާގެ ރައީސް ގޮތަބަޔާ ރާޖަޕަކްސަ ރާއްޖެ ވަޑައިގެންނެވި އިރު، ރައްޔިތުންގެ މަޖިލީހުން އެމަނިކުފާނަށް ދައުވަތެއް ދެއްވާފައިވާކަން އެނގިފައި ނުވާކަމަށް ރައްޔިތުންގެ މަޖިލީހުން ބުނެފިއެވެ.

ސީއެންއެންގައި ބުނެފައިވަނީ ގޮތަބަޔާ ރާޖަޕަކްސަ ވަޑައިގެންނެވި ފްލައިޓު ޖައްސާފައިވަނީ ރައްޔިތުންގެ މަޖިލީހުގެ ރައީސްގެ ދައުވަތަށް ކަމަށް އެންގުމުން ކަމަށެވެ. އަސްކަރީ މަތިންދާ ބޯޓު ވެލާނާ އިންޓަރނޭޝަނަލް އެއަރޕޯޓުގައި ޖެއްސުމުގައި، ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދުގެ ދައުރެއް ވާކަމަށް ސީއެންއެންގައި ރިޕޯޓްކޮށްފައިވީ ނަމަވެސް، މަޖިލީހުގެ އިދާރާއަކަށް އެފަދަ މައުލޫމާތެއް ލިބިފައި ނުވާކަމަށް އެއިދާރާއިން ބުނެއެވެ.

މީގެ އިތުރުން ލަންކާގެ އަސްކަރިއްޔާގެ ބޯޓެއް ވެލާނާ އިންޓަރނޭޝަނަލް އެއަރޕޯޓަށް ޖައްސާފައިވާ އިރު، މިކަމާއި ގުޅޭ ގޮތުން އެމްއެންޑީއެފުން ވަކި އެއްޗެއް ބުނެފައި ނުވެއެވެ. ބޭރުގެ ޑިޕްލޮމެޓެއް ރާއްޖެ އަންނަ ނަމަ އެކަން ފޮރިން މިނިސްޓްރީއަށް ވެސް އެނގޭނެއެވެ. ނަމަވެސް ގޮތަބަޔާ ރާއްޖެ ވަޑައިގަންނަވާފައިވާ އިރު، މިކަމާއި ގުޅިގެން ފޮރިން މިނިސްޓްރީން ވެސް ވަކި އެއްޗެއް ބުނެފައި ނުވެއެވެ.

ސީއެންއެންގައި ބުނެފައިވަނީ ގޮތަބަޔާ އަދި އެމަނިކުފާނުގެ އަނބިކަނބަލުންނާއެކު، ސްރީލަންކާގެ ވައިގެ އަސްކަރިއްޔާގެ އޭއެން32 ސިފައިން އުފުލާ މަތިންދާ ބޯޓެއްގައި އެޤައުމުން ގެންގޮސްފައިވާ ކަމަށެވެ. ލަންކާގެ ވައިގެ އަސްކަރިއްޔާއިން ވަނީ މިކަން ކަށަވަރުކޮށްދީފައެވެ.

ސީއެންއެންގައި ބުނެފައިވަނީ ވެލާނާ އެއަރޕޯޓުގެ އެއަރ ޓްރެފިކް ކޮންޓްރޯލް އިން ފްލައިޓު ޖައްސަން ހުއްދަ ނުދިން ކަމަށެވެ. ނަަމަވެސް މަޖިލީހުގެ ރައީސް، ރައީސް މުހައްމަދު ނަޝީދުގެ ދައުވަތަކަށް ގޮތަބަޔާ ވަޑައިގަންނަވާ ކަމަށް ވިދާޅުވެ ފަހުން ފްލައިޓު ޖައްސަން ހުއްދަ ދީފައިވާ ކަމަށެވެ.

ހޯމަ ދުވަހު ލަންކާގެ އެއަރޕޯޓުން ގައުމުން ބޭރަށް ފުރާވަޑައިގަތުމަށް 2 ފަހަރެއްގެ މަތިން ގޮތަބަޔާ މަސައްކަތް ކުރެއްވި ކަމަށާއި، ނަމަވެސް އެ ފުރުސަތު އެއަރޕޯޓުގެ އިމިގްރޭޝަނުން ދީފައި ނުވާ ކަމަށް ބުނެފައިވެއެވެ.

ސީއެންއެންގައި ބުނެފައިވަނީ ހޯމަ ދުވަހު ކޮލަމްބޯ އެއަރޕޯޓަށް ގޮތަބަޔާ ވަޑައިގެންނެވީ އިތުރު 15 މީހުންނާއެކުގައި ކަމަށެވެ. މީގެ ތެރޭގައި އާއިލީ ބޭފުޅުން ހިމެނިވަޑައިގަންނަވައެވެ. އަދި ސްރީލަންކަން އެއަރލައިން މެދުވެރިކޮށް އެދުވަހުގެ ރޭގަނޑު 6:25 ގައި ދުބާއީ އަށް ވަޑައިގަންނަވަން މަސައްކަތް ކުރެއްވި ކަމަށް އަސްކަރިއްޔާގެ އިސް އޮފިޝަލަކާ ހަވާލާދީފައިވެއެވެ.

ނަމަވެސް އިމިގްރޭޝަން އޮފިސަރުން ޕްރޮސެސް ކުރިއަށް ގެންދިއުމަށް ދެކޮޅު ހެދި ކަމަށާއި، ސަބަބަކީ އެތަނުގައި ރައީސް ނުހުންނެވުމުން ކަމަށް ވަނީ ބުނެފައެވެ. އަދި ފްލައިޓު ފުރީ ގޮތަބަޔާއާއެކު ވަޑައިގަންނަވަން ތިއްބެވި ބޭފުޅުންނާ ނުލާ ކަމަށްވެސް ވެއެވެ.

އަދި އެދުވަހުގެ ރޭ 9:20 އިއްތިހާދުގެ ފްލައިޓަކަށް އަބޫ ދާބީއަށް ވަޑައިގަންނަވަން މަސައްކަތް ކުރެއްވި ނަމަވެސް، އިމިގްރޭޝަން ކިއުއަށް ވަޑައިގަންނަވަން ގޮތަބަޔާ ދެކޮޅު ހެއްދެވުމުން ފްލައިޓުން ދަތުރުކުރެވޭ ގޮތް ނުވި ކަމަށް ސީއެންއެންގައި ވަނީ ރިޕޯޓްކޮށްފައެވެ. އަދި ކިއުގައި ނުޖެހި ބޯޓަށް އެރޭނެ ގޮތެއް ނެތުމުން ގޮތަބަޔާއަށް ފުރާވަޑައިގެންނެވޭނެ ގޮތެއް ނުވި ކަމަށް އޮފިޝަލަކާއި ހަވާލާދީ ރިޕޯޓްކޮށްފައިވެއެވެ.

ގައުމު ދޫކުރައްވާ ފިއްލަވައިގެން އުޅުއްވާ ލަންކާގެ ރައީސް ގޮތަބަޔާ ރާޖަޕަކްސަ އިސްތިއުފާ ދެއްވާނީ ރައްކާތެރި މަންޒިލަކަށް ވަޑައިގެންނެވުމަށްފަހުގައި ކަމަށް މީޑިއާތަކުގައި ވަނީ ރިޕޯޓްކޮށްފައެވެ.

ބައެއް މީޑިއާތަކުގައި ބުނެފައިވަނީ ފަހު މަންޒިލަށް ވަޑައިގެންނެވުމަށްފަހު ބުދަ ދުވަހުގެ ރޭ 8 ޖަހާއިރު މަގާމުން އިސްތިއުފާ ދެއްވާނެ ކަމަށެވެ. ނަމަވެސް ފަހު މަންޒިލަކީ ކޮބައިކަމެއް ހާމަކޮށްފައި ނުވެއެވެ. މީޑިއާތަކުގައި ބުނެފައިވަނީ ގޮތަބަޔާގެ ފަހު މަންޒިލަކީ ދެކުނު އިރުމަތީ އޭޝިއާގެ ގައުމެއް ކަމަށެވެ.

ދެކުނު އިރުމަތީ އޭޝިއާގައި 11 ގައުމެއް ހިމެނެއެވެ. އެގައުމުތަކަކީ، ބުރޫނާއި، ކެމްބޯޑިއާ، އިންޑޮނޭޝިއާ، ލާއޯސް، މެލޭޝިއާ، މިޔަންމާ، ފިލިޕީންސް، ސިންގަޕޫރް، ތައިލެންޑް، ޓިމޯ-ލެސްޓޭ އަދި ވިއެޓްނާމްއެވެ.

އަންގާރަ ދުވަހުގެ ދަންވަރު 2 ޖެހި އިރު ގޮތަބަޔާ ވަނީ އަނބިކަނބަލުންނާާއި ބޮޑީގާޑުންނާއެކު ލަންކާގެ އަސްކަރީ ބޭސްއަކުން އަސްކަރީ މަތިންދާ ބޯޓެއްގައި ރާއްޖެ ވަޑައިގަންނަވާފައެވެ. އަދި މިހާރު ހުންނެވީ ރާއްޖޭގައެވެ.

މީޑިއާތަކުގައި ބުނެފައިވާ ގޮތުން ބުދަ ދުވަހު ގޮތަޔަބާގެ ފަހު މަންޒިލަށް ވަޑައިގަންނަވާނެއެވެ.

އާންމުވެފައިވާ ބައެއް ވީޑިއޯތަކުން ފެންނަ ގޮތުގައި ގޮތަބަޔާ ރާއްޖެއަށް ވަޑައިގެންނެވުމާއެކު ހައި ސެކިއުރިޓީގައި އެއަރޕޯޓުން މާލެ ގެނެސްފައިވެއެވެ. ނަމަވެސް މިހާރު ހުންނެވި ތަނެއްގެ މައުލޫމާތު އެނގިފައި ނުވެއެވެ. ރައީސްގެ ދެކަނބަލުންގެ އިތުރުން 13 މީހަކު މި ފްލައިޓުން އައި އިރު އެއީ ކޮން ބައެއްކަމެއް ސާފެއް ނޫނެވެ.