ދުނިޔޭގެ ބާޒާރުގައި ތެލުގެ އަގު ބޮޑުވަމުންދާތީ ތެލުން ސަބްސިޑީ ދިނުމަށް ސަރުކާރުން ކުރި ޚަރަދު ބަޖެޓުކުރި އަދަދަށްވުރެ ބޮޑުވެފައިވާކަމަށް ފިނޭންސް މިނިސްޓްރީގެ ޗީފް ފައިނޭންޝަލް ބަޖެޓް އެގްޒެކެޓިވް، އަހުމަދު ސަރުވަޝް އާދަމް ވިދާޅުވެއްޖެއެވެ.

ރާއްޖޭގެ އިޤްތިސާދުގެ މިސްރާބު ހުރިގޮތާއި ގުޅޭގޮތުން، ރާއްޖެ ޓީވީގެ ފަލަސުރުޚީގައި ވާހަކަ ދައްކަވަމުން ސަރުވަޝް ވިދާޅުވީ ތެޔޮ އަގުބޮޑުވުމާއި ގުޅިގެން ތެލުގެ ސަބްސިޑީއަށް ކުރާ ޚަރަދު ވަރަށް ބޮޑުތަނުން އިތުރުވެފައިވާ ކަމަށެވެ. ތެލުގެ ސަބްސިޑީގެ ގޮތުގައި ބަޖެޓު ކުރީ 350 މިލިއަން ރުފިޔާ ކަމަށާއި، އެހެންނަމަވެސް ފުރަތަމަ ހަ މަސް ދުވަސް ނިމުނުއިރު މި އަދަދު ބިލިއަނަކަށްވުރެ މައްޗަށް އަރާފައިވާކަމަށް ސަރުވަޝް ވިދާޅުވިއެވެ. މިގޮތަށް ތެލުގެ އަގު ބޮޑުވަމުންދާނަމަ 1.9 ބިލިއަނަށް މި އަދަދު އިތުރުވުމަކީ އެކަށީގެންވާ ކަމެއް ކަމަށް ސަރުވަޝް ވިދާޅުވިއެވެ.

ސަރުވަޝް ވިދާޅުވީ މިހާރުގެ އަންދާޒާތަކަށް ބަލާއިރު، ތެލުގެ އަގު އަދިވެސް ބޮޑުވާނެކަން ފެންނަމުންދާ ކަމަށެވެ. އެހެންކަމުން އެ ހިރާސް ކުޑަކޮށް އަޅަންޖެހޭ ފިޔަވަޅުތައް އެޅުމަކީ ވަރަށް މުހިންމު ކަމެއް ކަމުގައި ދެކިވަޑައިގަންނަވާ ކަމަށް އޭނާ ވިދާޅުވިއެވެ.

މިކަމާއި ގުޅިގެން އަންނާނެ ހިރާސްތައް ކުޑަކުރުމަށް ތެޔޮ ގަންނަން ލިބޭ އަގު ކުޑަކުރުމަށް ސަރުކާރުތަކުގެ މެދުގައާއި، ރަހުމަތްތެރި ޤައުމުތަކުގެ މެދުގައި މަޝްވަރާތައް ކުރިއަށްގެންދާކަމަށް ސަރުވަޝް ވިދާޅުވިއެވެ. އަދި ތެޔޮ ޝިޕްމެންޓުތަކަށް ފައިސާ ދެއްކުމުގައި އެއްފަހަރާ އަންނަ ލޯޑު އަހަރުތަކަކަށް ބަހާލައިގެން ދެއްކޭނެ ގޮތެއް ހެދުމަށް ފައިނޭންސް ހޯދުން ފަދަ މަސައްކަތްތައްވެސް ކުރިއަށްދާކަމަށް އޭނާ ވިދާޅުވިއެވެ. މިއީ މިއަހަރުގެ ބަޖެޓަށް އަންނަ ލޯޑު ކުޑަކުރުމަށް ކުރެވިދާނެ ކަމެއްކަން ސަރުވަޝް ފާހަގަކުރެއްވިއެވެ.

ދުނިޔޭގެ ބާޒާރުގައި ސާފު ނުކުރާ ތެޔޮ ފީފާއެއްގެ އަގު ހުރީ 111 ޑޮލަރާއި 118 ޑޮލަރާއި ދެމެދުގެ އަގެއްގައެވެ. އޯޕެކް މެންބަރު ޤައުމުތަކުގައި މިވަގުތު ސާފުނުކުރާ ތެޔޮ ފީފާއެއްގެ އަގު ހުރީ 107.66 ޑޮލަރާއި 118.74 ޑޮލަރާއި ދެމެދުގައެވެ.

ނޫސްވެރިންގެ ބައްދަލުވުމުގައި މީގެ ކުރިން ރައީސް ސާލިޙު ވިދާޅުވެފައިވަނީ ރައްޔިތުންނަށް ކަރަންޓު ދިނުމާއި، މަސްވެރިންނަށް ހެޔޮ އަގެއްގައި ޑީސަލް ވިއްކުމަށްޓަކައި ސަރުކާރުން ސަބްސިޑީ ދެމުން އަންނަ ކަމަށެވެ. ސަބްސިޑައިޒް ކުރަމުން އަންނަ އިރު، ދައުލަތުގެ ބަޖެޓުގައި މި އަހަރު ޖަހާފައި އޮންނާނީ 341.5 މިލިއަން ރުފިޔާ ކަމަށެވެ. އަދި އެއީ އޭރު ތެލުގެ އަގު، ދުނިޔޭގެ މާކެޓުގައި ހުރިވަރަށް ބަލާފައި ކަމަށެވެ. އެހެން ނަމަވެސް، ދުނިޔޭގެ ބާޒާރުގައި ތެލުގެ އަގަށް އައި ބަދަލާއެކު، އިތުރަށް 1.6 ބިލިއަން ރުފިޔާ ތެލުގެ ސަބްސިޑީއަށް ދޭންޖެހޭ ކަމަށެވެ. އަދި މިހާވަރު ދޭންޖެހޭނީ ރައްޔިތުންނަށް އަގުހެޔޮކޮށް ތެޔޮ ފޯރުކޮށްދިނުމަށްޓަކައި ކަމަށް ރައީސް ވިދާޅުވިއެވެ.

ރައީސް ވިދާޅުވީ ސަރުކާރުން އެ ބުރަ ނަގަމުން އަންނަ ކަމަށާއި، ތެލުގެ އަގު ބޮޑުނުކުރާ ކަމުގައިވާނަމަ، ސަރުކާރުން އެ ޚަރަދު ކުރަންޖެހޭނެ ކަމަށެވެ. އެހެން ނަމަވެސް، މިފަދަ ކޮންމެ ދަނޑިވަޅެއްގައި، ރައްޔިތުންނަށް ވީހާވެސް ލުއި ގޮތްތައް ހޯދާދިނުމަށްޓަކައި ސަރުކާރުން އަންނަނީ އަޅަންޖެހޭ ފިޔަވަޅުތައް އަޅަމުން ކަމަށާއި، އެހެން ނަމަވެސް، ކުރިއަށް އޮތް ތަނުގައި، ތެލުގެ އަގަށް ބަދަލުތަކެއް އައުމަކީ އެކަށީގެންވާ ކަމެއް ކަަމަށް ރައީސް ވަނީ ވިދާޅުވެފައެވެ.