"ސޭވް އަ ޑަޔަބެޓިކް ޗައިލްޑް" ޕްރޮގްރާމަށް ސްޓެލްކޯގެ އެހީ

ޑަޔަބެޓީސް ސޮސައިޓީ އޮފް މޯލްޑިވްސުން ހިންގަމުން އަންނަ "ސޭވް އަ ޑަޔަބެޓިކް ޗައިލްޑް" ޕްރޮގްރާމަށް އެހީތެރިކަން ފޯރުކޮށްދޭން ސްޓެލްކޯއިން އެއްބަސްވެއްޖެއެވެ.

ހޯމަ ދުވަހު ސްޓެލްކޯގައި ބޭއްވި ރަސްމިއްޔާތެއްގައި، މި އެހީތެރިކަން ފޯރުކޮށްދިނުމަށް އެމްއޯޔޫއެއްގައި ވަނީ ސޮއިކޮށްފައެވެ. ސްޓެލްކޯގެ ފަރާތުން މި އެއްއޯޔޫގައި ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރ އަހުމަދު ޝަރީފެވެ. އަދި ޑަޔަބެޓިކް ސޮސައިޓީގެ ފަރާތުން ސޮއިކުރެއްވީ އެ ޖަމްއިއްޔާގެ ޗެއަރޕަރސަން އާއިޝަތު ޝިރުހާނާއެވެ.

މި އެއްބަސްވުމުގެ ދަށުން ސްޓެލްކޯއިން، ޑަޔަބެޓިކް ސޮސައިޓީގެ ސޭވް އަ ޑަޔަބެޓިކް ޗައިލްޑް ޕްރޮގްރާމަށް އެހީތެރިކަން ފޯރުކޮށްދެނީ އެ ކުންފުނީގެ އިޖުތިމާއީ ޒިންމާގެ ދަށުންނެވެ. މި އެހީތެރިކަން މިއަހަރުގެ ނިޔަލަށް ދެމުންގެންދާނެކަމަށް ސްޓެލްކޯއިން ބުނެއެވެ.

"ސޭވް އަ ޑަޔަބެޓިކް ޗައިލްޑް" ޕްރޮގްރާމް ހިންގަމުން އައީ ޑަޔަބެޓިކް ސޮސައިޓީން އަމިއްލައަށެވެ. އެގޮތުން، ބޭރުގެ އެހީގެ ދަށުން، ހަކުރު ބަލި ހުންނަ މީހުންނަށް ބޭނުންވާ އިންސިއުލިން ފޯރުކޮށްދޭއިރު، ހިލޭ ޚިދުމަތްދޭ ކްލިނިކެއްވެސް ވަނީ ހުޅުވާފައެވެ.

ޑަޔަބެޓިކް ސޮސައިޓީގެ ޗެއަރޕަރސަން އާއިޝަތު ޝިރުހާނާ ވިދާޅުވީ، ކުރިން އަމިއްލައަށް އެ ޕްރޮގްރާމް ހިންގިނަމަވެސް 2020 ވަނަ އަހަރު އެ ޖަމްއިއްޔާގެ މާލީ ހާލަތު ދަށްވެ ޕްރޮގްރާމް ހިންގުމުގައި ދަތިތަކާ ދިމާވެފައިވާކަމަށެވެ. މިއާއެކު އެ ޕްރޮގްރާމް ހިންގުމަށް އެކި ފަރާތްތަކުގެ އެހީއަށް އެދިފައިވާކަމަށާއި، އެކަމަށް ސްޓެލްކޯއިން އިޖާބަދިނުމުން ޝުކުރުވެރިވާކަމަށް އޭނާ ވިދާޅުވިއެވެ.

މި އެއްބަސްވުމާ ގުޅޭގޮތުން ސްޓެލްކޯގެ މެނޭޖިންގ ޑިރެކްޓަރ އަހުމަދު ޝަރީފު ވިދާޅުވީ "ސޭވް އަ ޑަޔަބެޓިކް ޗައިލްޑް" ޕްރޮގްރާމް ހިންގުމަށް ބޭނުންވާ ހުރިހާ އެހީތެރިކަމެއް އެ ކުންފުނިން ފޯރުކޮށްދޭނެކަމަށެވެ. އަދި ސްޓެލްކޯއަކީ ރައްޔިތުންގެ ކުންފުންޏަކަށްވާއިރު ރައްޔިތުންނާ ގުޅުންހުރި މިފަދަ ކަންކަމުގައި ހިލޭ ސާބަހަށް މަސައްކަތްކުރާ ޖަމްއިއްޔާތަކަށް އަބަދުވެސް އެހީތެރިކަން ފޯރުކޮށްދެއްވާނެ ކަމަށްވެސް ޝަރީފު ވިދާޅުވިއެވެ.

ޑަޔަބެޓިކް ސޮސައިޓީ އޮފް މޯލްޑިވްސް އުފައްދާފައިވަނީ 2000 ވަނަ އަހަރުގައެވެ. ފާއިތުވި 22 އަހަރު ތެރޭގައި އެ ކުންފުނިން ވަނީ ހަކުރު ބައްޔާ ބެހޭގޮތުން މީހުން ހޭލުންތެރިކުރުމާއި، ހަކުރު ބަލި ޖެހިފައިވާ ކުޑަކުދިންނާއި ޒުވާނުންނަށް އެހީތެރިކަން ފޯރުކޮށްދިނުމަށް ގިނަ މަސައްކަތްތަކެއް ކޮށްފައެވެ.