ސޯޝަލް މީޑިއާއިން ފެންނަ ކޮންމެ އެއްޗަކީ ތެދެއް ނޫން!

ޒަމާން ކުރިއަރައި، ޓެކްނޮލޮޖީގެ ގޮތުން ވަސީލަތްތައް ވެސް މިވަނީ ކުރިއަރާފައެވެ. މިކަންކަމާއި އެއްވަރަށް އިންސާނުންގެ ދިރިއުޅުމުގެ ވައްޓަފާޅިވެސް މިވަނީ ކުރިއަރާފައެވެ. މިހާރު އަތުގައި ސްމާޓް ފޯނެއް ނޯންނަ މީހަކު މަދުވާނެއެވެ. ސޯޝަލް މީޑިއާގެ އެކި ޕްލެޓްޕޯމްތައް ބޭނުންކުރާ މީހުންގެ އަދަދު ވެސް މަދެއް ނޫނެވެ. ސޯޝަލް މީޑިއާގެ އެކި ޕްލެޓްޕޯމްތައް ގިނަފަހަރު ވެގެންދަނީ މުއާސަލާތުކޮށް، މައުލޫމާތު ފޯރުކޮށްދިނުމުގައި ނުހަނު ބޭނުންތެރި އެއްޗެކަށެވެ. މިގޮތުން ބަލައިފިނަމަ މިއީ ނުލާހިކު ބޭނުންތެރި އެއްޗެކެވެ. ހަމަ މިޔާ އެއްވަރަށް މި ޕްލެޓްޕޯމްތަކުގެ ބޭނުން ނަހަމަ ގޮތުގައި މީހަކު ހިފާނަމަ އެ މީހަކަށް ވެސް މި ޕްލެޓްފޯމްތައް މުހިންމު ވެގެން އެބަދެއެވެ.

ގިނަ ފަހަރަށް ފޭސްބުކް، ޓުވިޓަރ ނުވަތަ އިންސްޓަގްރާމް ކަހަލަ އެޕްލިކޭޝަންތަކުގައި ހިތުގެ އުދާސްތަކާއި ޝުއޫރުތައް ހިއްސާކުރެވެއެވެ. ހަމަ މި ޕްލެޓްފޯމްތަކުގައި މީހުން ޒުވާބު ވެސް ކުރެއެވެ. މީހެއްގެ އަބުރު ނަގާލާ، ދޮގު ވާހަކަތައް ފެތެރުމުގައި މި އެޕްލިކޭޝަންތައް އެހާމެ ބޮޑު ދައުރެއް އަދާކުރެއެވެ. އަޕްލޯޑް ކޮށްލަންޖެހޭނީ އެންމެ ވީޑިއޯއެކެވެ. ވީޑިއޯ އަޕްލޯޑް ކުރާތާ އެތައް ސިކުންތެއްގެ ތެރޭގައި މި ވީޑިއޯ އެންމެނާއި ހަމައަށް ފޯރައެވެ. ދެން މީހުންތައް އެ ވީޑިއޯއެއް ޝެއާކޮށް، ކޮމެންޓްކޮށް ހަދައެވެ. މިފަހަރު ވެސް މިވީ އެކަހަލަ ގޮތެކެވެ. މާލެސިޓީ ކައުންސިލްގެ މޭޔަރ ޑރ. މުހައްމަދު މުއިއްޒު އެބޭފުޅާގެ ރަސްމީ ޓުވިޓަރ އެކައުންޓުން ވީޑިއޯއެއް ހިއްސާކުރައްވަމުން ކެޕްޝަންގައި ޖައްސަވަނީ "މާތްﷲ މި ޤައުމު އިސްލާމީ އަދުއްވުންގެ ކިބައިން ސަލާމަތް ކުރައްވާށި" މިފަދައިންނެވެ.

މި ވީޑިއޯ އިން ފެނިގެން މިދަނީ މިސްކިތެއްގެ ތެރޭގައި ބިދޭސީންތަކެއް ނިދާފައި ތިބި މަންޒަރެވެ. މި ވީޑިއޯއެއް ވެސް ގިނަ މީހުން ކޮމެންޓްކޮށް، ރީޓުވީޓްކޮށްފައިވެއެވެ. ވީޑިއޯ ކޮށްފައިވާ މީހުން ބުނާގޮތުން އެ މިސްކިތުގައި 200 ވަރަކަށް މީހުން ބަރިބަރިޔަށް ނިދާފައި ތިއްބެވެ. އެމީހާއަށް ވެސް އެކަން އެނގުނީ ވުޟޫ ކުރުމަށް އެތަނަށް ވަތް ފަހުން ކަމަށް ވެސް ވީޑިއޯގައި ބުނެއެވެ. މިވީޑިއޯ އާންމުވެގެން ދިޔުމާއެކު ފ. ދަރަނބޫދޫ ކަައުންސިލްގެ ރައީސް އަބްދުލް ހަމީދު އާދަމް "ރާއްޖެއެމްވީ" އަށް މައުލޫމާތު ދެއްވަމުން ވިދާޅުވީ ކުރީގެ އެ މިސްކިތަކީ ގަބުރުތަކެއް މަތީގައި އަޅާފައިވާ ތަނަކަށް ވާތީ ރައްޔިތުންގެ ޝަކުވާއާއެކު ސަރުކާރުން އައު މިސްކިތެއް އެރަށުގައި އަޅާފައިވާ ކަމަށެވެ. އެ އައު މިސްކިތުގައި ނަމާދުކުރަން ފެށި ހިސާބުން ވީޑިއޯއިން އެ ފެންނަ މިސްކިތަކީ ބޭނުންކުރާ މިސްކިތެއް ނޫން ކަމަށް ކައުންސިލްގެ ރައީސް ހަމީދު ވިދާޅުވިއެވެ.

މީގެއިތުރުން ކުރީގެ އެ މިސްކިތް ކައުންސިލާ ހަވާލުކުރި ފަހުން އެރަށުން ބޭރު ބަޔަކާ ހަވާލުކޮށްގެން އެތަނުގައި ގުރުއާން ކްލާހެއް ހިންގާފައިވާކަމަށާއި އެހެންނަމަވެސް ދުވަސްކޮޅަކުން އެ ކްލާސް ހުއްޓި، އެއަށްފަހު އެތަން ބޭނުންކުރީ ރައްޔިތުންގެ ބައްދަލުވުންތައް ބޭއްވުމަށް ކަމަށް އޭނާ ވިދާޅުވިއެވެ. އެއަށްފަހު އެރަށު ބަނދަރު ހަދަން އެމްޓީސީސީން ގެނައި ޓީމު ނިދުމަށް ދެ އަހަރަށް އެތަން އެމްޓީސީސީއަށް ކުއްޔަށް ދީފައިވާކަމަށް ހަމީދު ވިދާޅުވިއެވެ. އެތަނުގައި މިހާރު ތިބީ ފެނާއި ނަރުދަމާގެ މަސައްކަތަށް އެރަށަށް ގޮސްތިބި އިންޑިއާގެ ބިދޭސީންތަކެއްގެ ތެރެއިން 15 ވަރަކަށް ބިދޭސީން ކަމަށް އޭނާ ވިދާޅުވިއެވެ. އެކަމަކީ ކައުންސިލަށް އެނގިގެން ހިނގާ ކަމެއް ކަމަށް ހަމީދު ވިދާޅުވިއެވެ. އެތަނުގައި އެމީހުން ކުރަނީ ކޮން ކަމެއްތޯ ކައުންސިލުން ބަލާ ކަމަށާއި، އަދިވެސް އެތަނުގައި ގުރުއާން ކްލާސް ހިންގަން ބަޔަކު ބޭނުންވާނަމަ އެކަން ކުރުމުގެ ފުރުސަތު ދޭނެ ކަމަށް ހަމީދު ވިދާޅުވިއެވެ.

ކައުންސިލުން ރާއްޖެއެމްވީއަށް މިފަދައިން މައުލޫމާތު ދީފައިވާއިރު މުއިއްޒުވެސް ގުޅުއްވިނަމަ ހަމަ ކައުންސިލުން މި މައުލޫމާތު ދެއްވާނެ ނޫންތޯއެވެ. މުއިއްޒު ޓުވިޓަރގައި ހިއްސާކުރެއްވި ވީޑިއޯ އަމިއްލައަށް ބަލާލުމުން ވެސް މިސްކިތެއްގައި 200 މީހުން ދިރިއުޅޭނީ ކިހިނެއްތޯ، ހިތުގައި ސުވާލު ނުއުފެދޭބާއެވެ. މުއިއްޒު އަކީ މާލެ ސިޓީ ކައުންސިލްގެ މޭޔަރެވެ. ޒިންމާދާރު މަޤާމެއްގައި ހުންނަވާ ބޭފުޅަކު މިފަދަ ވީޑިއޯއެއް ސޯޝަލް މީޑިއާއަށް ދޫކޮށްލައްވާއިރު މިކަމުގައި ހަޤީޤަތް އޮޅުން ފިލުއްވަން ވިސްނިވަޑައި ނުގެންނެވީ ބާވައެވެ. މިފަދަ ވީޑިއޯއެއްގެ ސަބަބުން އާންމު މަސްލަހަތު ގެއްލިގެންދާކަން ހަމަ އެބޭފުޅާއަށް އެނގިވަޑައިނުގެންނެވީ ބާވައެވެ. ނުވަތަ އެނގިހުރެ ވެސް މަސްލަހަތު ގެއްލުވާލައްވަން ބޭނުންފުޅުވީ ބާވައެވެ. މިއީ ހައްތަހާވެސް ހިތުގައި އުފެދޭ ސުވާލުތަކެވެ. ކޮންމެ ގޮތަކަށް ހިތުގައި ނިޔަތް އޮތް ނަމަވެސް ސިޔާސީ ބޭނުމެއްގައި ނުވަތަ އެނޫން ވެސް ބޭނުމެއްގައި ދީން ހަތިޔާރަކަށް ހެދުމަކީ އެއްވެސް ހާލެއްގައި އެއްވެސް ދިވެއްސަކު ބަލައިގަންނާނެ ކަމެއް ނޫނެވެ. ރާއްޖޭގައި އުޅޭ ސިޔާސީ މީހުން ދީނީ ކާޑު ކުޅުން ހުއްޓާލަން އެބަޖެހެއެވެ.

މިކަންތައްތަކާއި އެއްވަރަށް އާންމު ރައްޔިތުން ވެސް އެބަ ހޭލުންތެރިވާން ޖެހެއެވެ. ސޯޝަލް މީޑިއާ އިން ފެންނަ ކޮންމެ ވީޑިއޯ އަކީ ނުވަތަ ޕޯސްޓަކީ ތެދަކަށް ނުވާނެކަން އެބަ ޤަބޫލު ކުރަންޖެހެއެވެ. ފޭސްބުކުންނާއި ޓުވިޓަރ އަދި އެހެނިހެން ސޯޝަލް މީޑިއާ އެޕްލިކޭޝަންތަކަކީ އަސްލު ދުނިޔެއެއް ނޫނެވެ. އޭގެން ބައެއް ފަހަރަށް ދައްކާ އެއްޗަކީ ހަޤީޤަތެއްތޯ އޮޅުން ފިލުވައި ބަލަން ޖެހެއެވެ. އެއީ އޭގައި ބައެއް ފަހަރު ހިމެނިގެންދަނީ އެބަޔަކު ނުވަތަ އެމީހަކު ދެއްކި އެއްޗެކެވެ. އެކި މަޤްސަދުތައް ހާސިލް ކުރުމަށްޓަކައި ވެސް މިފަދަ އެޕްލިކޭޝަންތަކުގެ ބޭނުން މީހުން ކުރާކަން ދެނެގަންނަންވީއެވެ. އެންމެ ކުޑަ މިސާލަކަށް ބަލާއިރު ފޭސްބުކް އެކައުންޓްތައް ބޭނުންކޮށްގެން ފައިސާ ފޭރެއެވެ. ސޯޝަލް މީޑިއާ އިން ފެންނަ ކޮންމެ އެއްޗަކީ ތެދަކަށް ނުވާއިރު ކޮންމެ ކަމެއްގައި ވެސް ދެކޮޅު އޮންނަ އުސޫލުން، ވާހަކައިގެ އަނެއްކޮޅު ވެސް ހޯދަންވީއެވެ. ބައިބައި ކުރުވުމަށް ނުވަތަ ސިޔާސީ މަޤްސަދުގައި ސިޔާސީ މީހުން ޖަހާ މިފަދަ މަޅީގައި ރައްޔިތުން ނުބެދެންވީއެވެ.