ފިރިހެން ނަމެއްކަމުގައިވާ "ކަލާ" ދެޖިންސަށް ބޭނުން ކުރަން ފެށުނު، ކަލާގެ އަންހެން ނަމަކީ "ކަނބާ"

ކަލާއަކީ މީގެ 80 އަހަރުކުރިން 1940ގެ އަހަރުތަކާއި ހަމަޔަށް އަންހެނުންނަށް ނިސްބަތްކުރެވުނު ލަފުޒެއް ނުވަތަ ނަމެއް ނޫނެވެ. އެކަން ސާބިތެވެ.

ކަލާ އަންހެނުންނަށް (ދެ ޖިންސަށް) އެންމެ ފުރަތަމަ ނިޞްބަތްކުރެއްވީ އަލްއަމީރު މުޙައްމަދު އަމީނު ދޮށިމޭނާ ކިލެގެފާނު ކަމުގައިވެއެވެ!

އެ ކިލެގެފާނުގެ އެންމެ އަރިސް "އަމީނީ ޤުލްޝަނުން ފަރިވެފޮޅުނު ވަސްމީރު މާމެލާމެލީގެ ތެރެއިން ޑޭޒީމާ" އަލްފާޟިލާ (އަލްމަރުޙޫމާ) އާމިނަތު ފާއިޒާ އަރިހުން މިކަން އޮޅުންފިލުވުނެވެ. ދިވެހި ބަހުގެ އެެއްވެސް އަދީބަކަށް މިކަން އެއިރު ފުރިހަމަޔަށް ސާފުކޮށެއް ނުދެވުނެވެ.

މިކަން ދިރާސާކުރެވުނީ މީގެ 25 އަހަރުކުރިން 1990ގެ އަހަރުތަކުގައެވެ. އަމީނީ ދައުރުގެ ކުރިން ކަލާ ނިޞްބަތްކުރެވުނީ ހަމައެކަނި ފިރިހެން ޖިންސަށެވެ. މިސާލުތައް ތިރީގައި އެވަނީއެވެ.

ދިވެހިރާއްޖެ މީގެ 895 އަހަރުކުރިން ހިޖުރީގޮތުން 548ގައި އިސްލާންވުމުގެ ކުރިން ދިވެހީންނަށް ކިޔާފައި ވަނީ ދިވެހި ނަންނަމެވެ. އަދި ރާއްޖެ އިސްލާމްވި ގަރުނު ކަމަށްވާ ހިޖުރައިން 6ވަނަގަރުނާއި، 7ވަނަގަރުނާއި، 8ވަނަ ގަރުނު، މީލާދީން 12ވަނަގަރުނާއި 13ވަނަގަރުނާއި 14ވަނަ ގަރުނުގައި ބައެއް ރަސްރަސްކަލުންނާއި ރަނިންނަށް ދިވެހި ނަންނަން ކިޔާފައިވެއެވެ.

އެގޮތުން، އިސްލާން ދިވެހިރާއްޖޭގެ 2ވަނަ ރަސްގެފާނު އައްސުލްތާން މުތެއި ކަލަމިންޖާ ((1166-1184މ) އެވެ.

4ވަނަ ރަސްގެފާނު އައްސުލްތާން ދިނެއި ކަލަމިންޖާ (1192-1198މ) އެވެ.

5ވަނަ ރަސްގެފާނު އައްސުލްތާން ދިހެއި ކަލަމިންޖާ (1198-1213މ) އެވެ.

6ވަނަ ރަސްގެފާނު އައްސުލްތާން ވަޑި ކަލަމިންޖާ (1213-1232މ) އެވެ.

އަދި މިނޫންވެސް ސޯމަވަންސަ (ހަނދުވަންހަ)އިގެ ރާއްޖޭގެ އިސްލާމް ގިނަ ރަސްރަސްކަލުންނަށް ކިޔާފައި ވަނީ ދިވެހި ނަންނަން ފާހަގަކުރެވެއެވެ.

އަދި ސަތުހިރި އައިސިރިފަދަ ދިވެހި ނަންނަމުގެ ވަޒީރުން އެދުވަސްވަރު ތިއްބެވިއެވެ.

ރާއްޖޭގެ އެންމެމަތީވެރިކަން ކުރެއްވި އަންހެން ދެތިން ރަނިކަނބަލުންގެ ތެރެއިން 2ރަނި ކަނބަލަކަށް ދިވެހި ނަން ކިއިފައިވެއެވެ. އެއީ އައްސުލްތާނާ ރާދަފަތި ކަނބައިދިކިލެގެ (1359މ) އަދި އައްސުލްތާނާ ދާއިން ކަނބައިދިކިލެގެ (1363-1367މ)އެވެ.

ވޭތުވެދިޔަ 9ވަރަކަށް ގަރުނު ނުވަތަ 900 ވަރަކަށް އަހަރު ދިވެހި ނަންނަން ދިވެހިންނަށް ކިޔާފައިވެއެވެ. އަދި އަރަބި ނަންނަން ކިޔާފައިވިޔަސް އެއީ ރަސްމީ ލިޔުންތަކަށް ނުވަތަ ފޮތުގެ ނަމެއްގެ ގޮތުގައި ބަލައި ދިވެހި ނަންނަން އާންމުކޮށް ކިޔުމުގެ ސަގާފަތަށްވެސް 900 އަހަރުވަނީއެވެ.