އިދިކޮޅު މެންބަރުންގެ މަގުސަދަކީ ވެރިކަމުގެ ދަހިވެތިކަމުގައި، ގައުމުގައި ނެތް ނިރުބަވެރިކަމެއް ގެނައުން – ޔައުގޫބް
ނިރުބަވެރިކަމެއް ގެނެސްގެން މި ކަންކަން ހުއްޓުވުމަށް މަސައްކަތްކުރުމަކީ ދިވެހި ރައްޔިތުން ބަލައިގަންނާނެކަމެއްނޫން
ޔައުގޫބް
އިދިކޮޅު ޕީޕީއެމް ޕީއެންސީގެ މެންބަރުން ބޭނުންވަނީ ވެރިކަމުގެ ދަހިވެތިކަމުގައި، ގައުމުގައި ނެތް ނިރުބަވެރިކަމެއް ގެނެސްގެން ވެރިކަން ވައްޓާލުންކަމަށް ދާންދޫ ދާއިރާގެ މެންބަރު ޔައުގޫބު އަބްދުﷲ ވިދާޅުވެއްޖެއެވެ.
ދާންދޫ ދާއިރާގެ މެންބަރު ޔައުގޫބު މިހެން ވިދާޅުވީ، ސަރުކާރުގެ ފަރާތުން ފުވައްމުލަކު ދެކުނު ދާއިރާގެ މެންބަރު މުހައްމަދު މުމްތާޒް ހުށަހަޅުއްވާފައިވާ، ގާނޫނު ނަންބަރު 3/2006 (ދައުލަތުގެ މާލިއްޔަތުގެ ގާނޫނު)އަށް އިސްލާހު ގެނައުމުގެ ބިލުގެ އިބްތިދާއީ ބަހުސްގައި ވާހަކަދައްކަވަމުންނެވެ.
މެންބަރު ޔައުގޫބު ވިދާޅުވީ، ބިލާ ދެކޮޅަށް ވާހަކަދައްކަވާ (ޚާއްސަކޮށް ޕީޕީއެމް-ޕީއެންސީގެ) އިއްޒަތްތެރި މެންބަރުން ވާހަކަދައްކަވަނީ މައިގަނޑުގޮތެއްގައި އެންމެކަމަކާ ގުޅޭގޮތުންކަމަށެވެ. އެއީ މިތާނގައި އިންޓަރނަލް އޮޑިޓް ޑިޕާޓްމަންޓެއް، ނޫނީ ޗީފް އިންޓަރނަލް އޮޑިޓަރެއް ހުންނާތީ އެކަމާ ދެކޮޅަށްކަމަށެވެ. އެއީ ދިވެހި ރައްޔިތުންނަށް ވަރަށް ސާފު ކަމެއް ކަމަށާއި، އެއީ ޕީޕީއެމް ޕީއެން.ސީގެ މެންބަރުން އެކަމާ ދެކޮޅުވާނެކަމެއްކަން އެނގިވަޑައިގަންނަވާކަމަށެވެ.
ޔައުގޫބު ވިދާޅުވީ އިދިކޮޅު ޕާޓީއަށް ނިސްބަތްވާ މެންބަރުންނަށް، ޚާއްސަކޮށް އެ ޕާޓީގެ ވެރިކަމުގައި އޮންނައިރު، އެ ބޭފުޅުންގެ ހަމައެކަނި ހުންނަ ވިސްނުންފުޅަކީ، ވައްކަމާއި، ކޮރަޕްޝަނާއި، ފަސާދައާއި، މި ކަންކަން ނޫން އިތުރު ކަމެއް ނޫންކަމަށްވާތީ އެ ކަންކަން ކުރަން އުނދަގޫވާނެތީ އެކަމާ ދެކޮޅުވާނެކަމަށެވެ.
ބިލުގައި އެ އިސްލާހު ހުށަހެޅިގެން އައިއިރުވެސް އެކަމާ ދެކޮޅުވާނެކަން އެނގިވަޑައިގަންނަވާ ކަމަށާއި، އެއީ މަޖިލީހުގެ ހުރިހާ މެންބަރުންނަށް، އަދި ދިވެހި ހުރިހާ ރައްޔިތުންނަށް ވެސް ވަރަށް ސާފުކޮށް އެނގޭނެ ކަމެއް ކަމަށް ވިދާޅުވިއެވެ. އިދިކޮޅު މެންބަރުންގެ ސިޔާސަތަކީ ވައްކަންކުރުންކަމަށްވާތީ، އެކަން ކުރަން އުނދަގޫވެދާނެތީ އެކަމާ ދެކޮޅުވާނެކަމަށް ޔައުގޫބް ވިދާޅުވިއެވެ. ޚާއްސަކޮށް އެ މާއްދާ ގާނޫނެއްގެ ތެރެއަށް ލައިގެން ގާނޫނެއްގެ ގޮތުގައި ހިންގަން އެ މީހުންނަށް އުނދަގޫވާނެތީ އެކަމާ ދެކޮޅުވެގެން އެ ވާހަކަ ދައްކާނެކަމަށެވެ.
ޔައުގޫބް ވިދާޅުވީ ރައީސް ޔާމީން ނެންގެވި ލޯނުތަކުގެ ތެރެއިން އެންމެ ބޮޑު، އެންމެ ބިރުވެރި ހާލަތެއްގައި އޮތް ލޯނު މި އަހަރު ދައްކައި ނިމިއްޖެކަމަށެވެ. އަދި ބާކީ މިއަހަރު އިތުރު ލޯނެއް ނެތް ކަމަށާއި، މި އަހަރު ބާކީ މި އޮތް 6 މަސްދުވަހާއި، 2023އާއި، 2024އާއި 2025ގައި ހަމަޖެހިލައިގެން ބާކީ ދެން ހުރި ލޯނުތަކަށް ފައިނޭންސް ހޯދަން ފުރުސަތު ލިބޭނެކަމަށެވެ. ނުވަތަ އެ ލޯނުތަކަށް އަނބުރާ ފައިސާ ދައްކާނެ މަގު ތަނަވަސްކުރަން، ނޫނީ އެކަމާ ވިސްނައިގެން ކަންކަން ކުރިއަށްގެންދިޔުމަށް ރަނގަޅު ފުރުސަތު އެބަ ލިބޭކަމަށް މެންބަރު ޔައުގޫބް ވިދާޅުވިއެވެ.
ޔައުގޫބް ވިދާޅުދީ، މި ރާއްޖޭގައި ނެތް ބިރުވެރިކަމެއް މި ރާއްޖެއަށް ގެންނަން (ކޮންމެ މީހަކު ކުރިޔަސް) އެ ކުރާ މަސައްކަތަކީ، ގައުމު އިނދަޖައްސާލަން ކުރެވޭ މަސައްކަތެއްކަމަށެވެ. އަދި އެމް.އެމް.އޭގެ ގަވަރުނަރާއި ދެ ވަޒީރުންގެ ވާހަކަފުޅުންވެސް އެނގިވަޑައިގެން ކަމަކީ އަދި ދޭހަވެވަޑައިގަތް ކަމަކީ، މި ރާއްޖެ ރަނގަޅު ޓްރެކެއްގައި އޮއްވައި، މި ވެރިކަމާ ނުރުހޭ ބަޔަކު ގަސްތުގައި ވެރިކަން ވައްޓާލަން، އަދި ގައުމު ދިރުވާލަން، އަދި ރާއްޖެ ބަނގުރޫޓުކުރުވަން ކުރާ މަސައްކަތެއްކަމަށެވެ. އަދި ދަރަނި ރީސްޓްރަކްޗަރކުރުމުގެ ވާހަކަ ތަކުރާރުކޮށް އެބަ ދައްކާކަމަށް ޔައުގޫބު ވިދާޅުވިއެވެ.
މެންބަރު ޔައުގޫބު ވިދާޅުވީ، ދިވެހިން ބޭނުންވަނީ ވަކި މީހަކު ވެރިކަމުގައި ހުންނާކަށް ނޫންކަމަށާއި، ކޮންމެ މީހަކު ވެރިކަމުގައި ހުއްޓަސް ރައްޔިތުންނަށް ލިބެންޖެހޭ ޚިދުމަތް ރަނގަޅަށް ލިބެންޏާ ދިވެހިންނަށް އެ ނިމުނީ ކަމަށެވެ. އަދި މިހާރު މި ހިނގަމުންދާ ވެރިކަމަކީ މީހުންނަށް އަނިޔާކުރުމާ ދުރު، ވައްކަން ކުރުމާ ދުރު، މި ރާއްޖޭގެ ރައްޔިތުންނަށް ބޭނުންވާ ގިނަ ޚިދުމަތްތައް، ޚާއްސަކޮށް ފެނާއި ނަރުދަމާއާއި ބޯހިޔާވަހިކަން ފޯރުކޮށްދިނުމުގައި ފެށުނީއްސުރެ (އަދި ޚާއްސަކޮށް ކޮވިޑުގެ ބަލިމަޑުކަމުގެ ތެރޭގައި) މި ހިސާބަށް މި އައީ ހަމަ ރަނގަޅު ޚިދުމަތްތަކެއް ފޯރުކޮށްދެމުންކަމަށެވެ.
ދިވެހި ރައްޔިތުން ތިބީ މި ވެރިކަމާމެދު ރުހި ހިތްހަމަޖެހިގެން ކަމަށާއި، ވެރިކަމުގެ ދަހިވެތިކަމުގައި ގައުމުގައި ނެތް ނިރުބަވެރިކަމެއް ގެނެސްގެން މި ކަންކަން ހުއްޓުވުމަށް މަސައްކަތްކުރުމަކީ ދިވެހި ރައްޔިތުން ބަލައިގަންނާނެކަމެއް ނޫންކަމަށް މެންބަރު ޔައުގޫބު ވިދާޅުވިއެވެ.
