ފްރަންޓްލައިން ފުލުހުންނަށްވެސް އިންޓަރޕޯލް ޑޭޓާބޭސް ބަލާލެވޭނެ

ދިވެހި ފުލުހުންގެ ޚިދުމަތުގައި މަސައްކަތް ކުރާ ހުރިހާ ފްރަންޓްލައިން އޮފިސަރުންނަށް އިންޓަރޕޯލްގެ ޑޭޓާބޭސްގެ ރެކޯޑުތައް ބެލޭގޮތް ހަމަޖައްސައިފިއެވެ.

މި ކުރިއެރުމާއެކު، ދިވެހި ފުލުހުންގެ ޚިދުމަތުގައި މަސައްކަތް ކުރާ ހުރިހާ ފްރަންޓްލައިން އޮފިސަރުންނަށްވެސް އިންޓަރޕޯލް ޑޭޓާބޭސްގެ ރެކޯޑުތައް ބަލާލެވޭނެއެވެ. އިންޓަރޕޯލްގެ ސެކެޓަރީ ޖެނެރަލް ކުރެއްވި ޓްވީޓެއްގައި ވަނީ އެއީ ފުލުހުންގެ މަސައްކަތްތަކަށް ނުހަނު ބޭނުންތެރި މައުލޫމާތުތަކަށްވާއިރު، އެކަމަށްޓަކައި ކޮމިޝަނަރ އޮފް ޕޮލިސް މުޙައްމަދު ޙަމީދު ކުރެއްވި މަސައްކަތް ފާހަގަކުރައްވާފައެވެ.

ސީޕީ ވިދާޅުވާ ގޮތުގައި އެކަމަށްޓަކައި ނޭޝަނަލް ސެންޓްރަލް ބިއުރޯއާއި އައިސީޓީ ޓީމުން ވަނީ ގިނަ މަސައްކަތްތަކެއް ކުރައްވާފައެވެ.

މިއީ ޤާނޫނު ތަންފީޒު ކުރުމުގެ އިދާރާގައި ދުނިޔޭގެ ފެންވަރުގައި ކުރެވޭ މަސައްކަތް އިތުރަށް ފުޅާ ކުރުމަށް ކުރެވޭ މަސައްކަތެއްކަން ސީޕީ ވަނީ ފާހަގަކުރައްވާފައެވެ.

އެކަމާ ގުޅޭގޮތުން "އަދަދު" ނޫހާއި ވާހަކަ ދައްކަވަމުން ސީޕީ ވަނީ މިއީ އިންޓަޕޯލްއާ ގުޅިގެން 2019 ގައި ފުލުހުން ފެށި މަސައްކަތެއްކަން ފާހަގަ ކުރައްވާފައެވެ. އަދި މި ބަދަލާއެކު، ކަނޑުމަގުން އަންނަ ބިދޭސީންގެ ބެކްގްރައުންޑް ވެސް ބަލާލެވޭނެ ކަމަށާއި، އެމީހުން ރާއްޖެއަށް އައުމުގެ ކުރިން ކޮން ކަހަލަ ރެކޯޑެއް އޮންނަ ބައެއްތޯ ބަލާލެވޭނެކަމަށް ސީޕީ ވަނީ ވިދާޅުވެފައެވެ.

އެ ނޫހަށް ދެއްވި އިންޓަރވިއުގައި ސީޕީ ވިދާޅުވެފައިވާ ގޮތުގައި، ކުށް ކުރުމުގެ ފަހުގެ ޓްރެންޑުތަކުގެ މައުލޫމާތުތައް ދެނެގަނެވި، މައްސަލަތަކުގެ ތަހުގީގުތަކުގައިވެސް އިތުރު ފަސޭހަތަކެއް ލިބިގެންދާނެއެވެ.