މިއީ އަމިއްލަ އުއްމީދު އިސްކޮށް، ވެރިކަމަށް ފައިނަގަންވީ ވަގުތެއް ނޫން – ރައީސް ނަޝީދު
ރައީސް ނަޝީދުގެ 30 އިންސައްތަ ފޯމިއުލާއަށް ރައީސް ސޯލިހު ތާއީދެއްނުކުރައްވާ
ފަރުވާއަށްފަހު ރައީސް ނަޝީދު ރާއްޖެ ވަޑައިގެންނެވި ދުވަހު އެއަރޕޯޓުން ރައީސް ސޯލިހު އެމަނިކުފާނަށް މަރުހަބާދަންނަވަނީ
މި ދަނޑިވަޅަކީ އަމިއްލަފުޅު އުއްމީދު އިސްކުރައްވައި، ވެރިކަމަށް ފައި ނަންގަވަންވީ ވަގުތެއް ނޫންކަމަށް ރައްޔިތުންގެ މަޖިލީހުގެ ރައީސް، އަދި އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ރައީސް ނަޝީދު މިހެން ވިދާޅުވީ، ދެވަނަ ދައުރަކަށް ރައީސް ސޯލިހު ކުރިމަތިލައްވާނެކަމުގެ އިޝާރާތެއް ކުރައްވާފައިވަނިކޮށް ކުރެއްވި ޓްވީޓެއްގައެވެ. ރައީސް ނަޝީދު ކުރެއްވި ޓްވީޓުގައި ވިދާޅުވެފައިވަނީ، އެމަނިކުފާނަށް ފެނިވަޑައިގަންނަވާގޮތުގައި މިއަދުގެ ހާލަތަކީ އަމިއްލަ އުއްމީދު އިސްކޮށް ވެރިކަމަށް ފައިނަގަންވީ ވަގުތެއް ނޫންކަމަށެވެ. އަދި މިއީ ބޭރު ފައިސާގެ ރިޒަރވް ރަނގަޅުކޮށް ރައްޔިތުންގެ ސަލާމަތްތެރިކަން ދެމެހެއްޓޭނެ ގޮތަކާމެދު ވިސްނައި ހަމަމަގަށް އަޅުވާންވީ ވަގުތުކަމަށް ރައީސް ނަޝީދު ވިދާޅުވެފައިވެއެވެ.
ބުދަ ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ރައީސް ވިދާޅުވީ, އަންނަ އަހަރުގެ އިންތިޚާބުގައި މިހާރުގެ ކޯލިޝަންގެ ބައިވެރިންނާއެކު ވާދަކުރައްވައިގެން ކާމިޔާބުކުރެއްވޭނެ ކަމުގެ ޔަގީންކަން އެބައޮތްކަމަށެވެ.
ރައީސް ވިދާޅުވީ، އަންނަ އަހަރު އެންމެ މުހިންމު ކަމަކީ އެމްޑީޕީއަށް ވެރިކަން ލިބުން ކަމަށެވެ. އަދި މިއީ ރާއްޖެއަށްވެސް މިވަގުތު އެންމެ ފައިދާހުރި ގޮތް ކަމަށާއި، އެއީ މިހާރު ފެށިފައި ހުރި މަޝްރޫއުތައް ކުރިއަށްގެންދިއުމަށް މުހިންމު ކަމެއް ކަމަށް ރައީސް ވިދާޅުވިއެވެ.
ރައީސް އިތުރަށް ވިދާޅުވީ، ޕާޓީގެ ކެންޑިޑޭޓް ކަނޑައަޅާނީ ޕާޓިގެ ކޮންގްރެސްއިން ކަމަށާއި, ގަވާއިދުގައި ޕްރައިމަރީއެއް ބާއްވަން އޮންނަ ނަމަ ކަންތައް އެގޮތަށް ކުރައްވާނެ ކަމަށެވެ. އަދި ޕްރައިމަރީއެއް ބޭއްވުމަކީ ޑިމޮކްރަސީގެ ރީތި އުސޫލެއްކަންވެސް ރައީސް ފާހަގަކުރެއްވިއެވެ.
