100 ކިލޯ ޑްރަގް ކޭސް: ދިފާއީ ހެކި ހުށައަޅަން އިތުރު ވަގުތު ދީފި
ދެން މި މައްސަލައިގެ އިބްތިދާއީ އަޑުއެހުމެއް ކުރިއަށް ގެންދަވާނީ 15 އޯގަސްޓުގައި
އަތުލައިގަތް 100 އެއްހާ ކިލޯގެ ހެރޮއިން- މަސްތުވާތަކެތި ހޯދާފައިވަނީ ފަޅުރަށެއްކަމަށްވާ އދ. ބޮޑުކާށިހުރާގައި ފޮރުވާފައި ހުއްޓައި
100 ކިލޯގެ ޑްރަގް މައްސަލައިގައި ހިމެނޭ މީހުންގެ މައްޗަށް އުފުލާފައިވާ ޑައިމޯފިން ޓްރެފިކްކުރުމުގެ ދައުވާތަކުގެ އަޑުއެހުމެއް އަންގާރަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
މި މައްސަލައިގައި، ޑައިމޯފިން ޓްރެފިކް ކުރުމުގެ ކުށުގެ ދައުވާ އުފުލާފައިވަނީ ހދ. ކުމުންދޫ، ޑިއާފުރެންޑް، އިބްރާހީމް ސިނާން، ގއ. ކޮލަމާފުށި، ސޯސަންގެ، އިބްރާހީމް ޒާއިދު ހަބީބު، ކ. މާފުށި، ސްވީޓްމީޑް، އަހުމަދު މާހިރު، ނ. ވެލިދޫ، ބީޗްހެވެން، ޖުމާން މުސްތަފާ، ލ. ކަލައިދޫ، ޖަނަވަރީމާގެ، މުހައްމަދު އަހްމަދު، ދ. ބަނޑިދޫ، ޕޮލާރިސް، މުހައްމަދު ހުސައިންގެ އިތުރުން، ބިދޭސީ ދެ ރައްޔިތުން ކަމަށްވާ ބަންގްލަދޭޝްގެ ޑީއެމް މޮބިންއާއި، އެމްޑީ ރަފީގުލް އިސްލާމްގެ މައްޗަށެވެ.
މި އަޑުއެހުމުގައި މައްސަލަ ބައްލަވާ ގާޒީ ދީބާނާޒް ފަހުމީ ވިދާޅުވީ، ދައުވާލިބޭ ބައެއް ފަރާތްތަކުގެ ވަކީލު ދިފާއީ ހެކި ހުށައެޅުމަށް އިތުރު ވަގުތަށް އެދިފައިވާ ކަމަށެވެ. އެކަމާ ގުޅޭގޮތުން އެ ވަކީލު ވިދާޅުވީ، އިތުރު ވަގުތަށް އެދިލެއްވީ މި މައްސަލައިގައި ގިނަ ފަރާތްތަކެއް ހިމެނޭތީއާއި، ލިޔެކިޔުންތައް ދިރާސާ ކުރުމަށް ގިނަ ވަގުތުތަކެއް ހޭދަވާތީ ކަމަށެވެ. ވަކީލު ވަނީ ދިފާއީ ހެކި ހުށައެޅުއްވުމަށް 5 ދުވަހުގެ މުއްދަތެއް ދެއްވުމަށް އެދިލައްވާފައެވެ.
އެކަމަށް ދައުލަތުގެ ވަކީލުވެސް އިއުތިރާޒެއް ނުކުރައްވައެވެ. ވުމާއެކު، މައްސަލަ ބައްލަވާ ގާޒީ ވަނީ އެ ފުރުސަތު ދެއްވަވައި، އެއާ ގުޅިގެން ތާވަލަށް އަންނާނެ ބަދަލުތައް ދެފަރާތުގެ މަޝްވަރާއާއެކު ކަނޑައަޅުއްވާފައެވެ.
ގާޒީ ވަނީ 15 ޖޫންގައި ދިފާއީ ހެކި ހުށައެޅުއްވުމަށް އެދިލައްވާފައެވެ. އަދި ދައުލަތުގެ ހުށައެޅުންތަކާއި، ދެފަރާތުން ރައްދު ދިނުމަށް ގާޒީ ވަނީ ދުވަސްތައް ކަނޑައަޅުއްވާފައެވެ.
ދެން މި މައްސަލައިގެ އިބްތިދާއީ އަޑުއެހުމެއް ކުރިއަށް ގެންދަވާނީ 15 އޯގަސްޓުގައި ކަމަށް ގާޒީ ދީބާނާޒް ފަހުމީ ވިދާޅުވިއެވެ.
މި މައްސަލައިގައި އުފުލާފައިވާ ދައުވާ ސާބިތުވެއްޖެނަމަ އުމުރަށް ޖަލަށް ލުމާއެކު 1 ލައްކަ ރުފިޔާއާ 10 މިލިއަން ރުފިޔާއާ ދެމެދުގެ އަދަދަކުން ޖޫރިމަނާ ކުރެވޭނެއެވެ.
މީގެ އިތުރުން، އެ ދައުވާ ސާބިތުނުވެ، މި ކުށުގެ އަމަލުގައި އެއްވެސް މިންވަރަކަށް ބައިވެރިވިކަން ނުވަތަ ކުށް ކުރަން އުޅުނުކަން ސާބިތުވެއްޖެނަމަ 18 އަހަރަށް ޖަލަށް ލުމާއެކު، 75،000 ރުފިޔާއާއި، 7،500،000 ރުފިޔާއާ ދެމެދުގެ ޖޫރިމަނާއެއް އަންނާނެއެވެ.
