މަސްތުވާތަކެއްޗާއި ގޭންގު މައްސަލަ ފުލުހުންނަށް އެކަނި ހައްލު ނުކުރެވޭނެ: ރައީސް
މަސްތުވާތަކެތި އެތެރެކުރުމަށާއި ގޭންގުތައް ބާރުވެރިކުރަން ގިނަ މަސައްކަތް ކުރާތީ އެކަން ހުއްޓުވަން ޖެހޭ ކަމަށް ވިދާޅުވި
ރައީސުލްޖުމްހުރިއްޔާ އިބްރާހިމް މުހައްމަދު ސާލިހު
ރާއްޖޭގައި މަސްތުވާތަކެތީގެ މައްސަލަ އާއި ގޭންގުތަކުގެ ބިރުވެރިކަން އޮތްކަން ފާހަގަކުރައްވައި އެއީ ފުލުހުންނަށް އެކަނި ހައްލު ކުރެވޭނެ ކަމެއް ނޫން ކަމަށް ރައީސުލްޖުމްހޫރިއްޔާ އިބްްރާހިމް މުހައްމަދު ސާލިހު ވިދާޅުވެއްޖެއެވެ.
އއ. އުކުޅަހުގައި ކުރިއަށްދިޔަ "ވިއަވަތި ރާއްޖެ" ކޮންފަރެންސް ނިންމަވައިލައްވައި ރައީސް ވިދާޅުވީ މަސްތުވާތަކެތި އެތެރެ ކުރުމަށާއި ގޭންގުތައް ބާރުވެރި ކުރުވުމަށް ގިނަ ކަންކަން ކުރަމުންދާ ކަން ފާހަގަކުރެވިފައިވާ ކަމަށެވެ. އެހެންކަމުން، މަސްތުވާތަކެއްޗާއި ގޭންގުތަކުގެ މައްސަލަ ހައްލު ކުރަން ސަރުކާރުން އެކި މަސައްކަތްތައް ކުރަމުން އަންނަ ކަމަށާއި އެގޮތުން، ޤައުމީ ފެންވަރުގައި ޓާސްކްފޯސެއް އުފައްދަވާފައިވާ ކަމަށް ރައީސް ވިދާޅުވިއެވެ.
ރައީސް ވިދާޅުވީ ރަށްރަށުގައި ހިނގާ މަސްތުވާތަކެތީގެ ކަންކަމާއި ގޭންގު ޙަރަކާތްތައް ހުއްޓުވޭނީ ކައުންސިލްތަކާއި އަންހެނުންގެ ތަރައްޤީއަށް މަސައްކަތް ކުރާ ކޮމިޓީތައް ވެސް ގުޅިގެން ކަމަށެވެ. އަދި އެކަމުގައި ފުލުހުންނަށް އެއްބާރުލުން ދިނުމަށް ވެސް ރައީސް އެދިވަޑައިގެންނެވިއެވެ.
ވިއަވަތި ރާއްޖެ ކޮންފަރެންސްގައި ފުލުހުން ބުނި ގޮތުގައި މާލޭގައި 44 ގޭންގެއް ޙަރަކާތްތެރިވެއެވެ. މީގެ ތެރެއިން 9 ގޭންގެއްގެ ނުރައްކާ ބޮޑު ކަމަށާއި ގޭންގުތަކަށް ނިސްބަތްވާ 2800 އެއްހާ މީހުން އެބަތިބިކަމަށް ވަނީ ބުނެފައެވެ.
މީގެ އިތުރުން ރާއްޖޭގެ ދެކުނުގައި ވެސް މިހާރު ގޭންގުތައް އިތުރުވަމުން އަންނަ ކަމަށާއި އުތުރާއި މެދު ރާއްޖެތެރޭގައި ގޭންގުތައް ފެތުރުމުގެ ބިރު އެބައޮތް ކަމަށް ފުލުހުން ބުނެއެވެ. އެއީ މާލޭގައި ޙަރަކާތްތެރިވާ ގޭންގުތަކުގެ އިސް ސަފުގައި އެ ރަށްރަށުގެ މީހުން އިސްކޮށް ޙަރަކާތްތެރިވާތީ ކަމަށް ވެސް ފުލުހުން ބުނެއެވެ.
ފުުލުހުން ވެސް ވަނީ ގޭންގުތަކާއި މަސްތުވާތަކެތީގެ މައްސަލަ ހައްލު ކުރުމަށް ކައުންސިލްތަކުގެ އެހީއަށް އެދިފައެވެ.
