ސްރީލަންކާގައި އިއުލާނުކޮށްފައިވާ ކާފިއު އުވާލައިފި

ސްރީލަންކާގައި އިއުލާނުކޮށްފައިވާ ކާފިއު އުވާލައިފިއެވެ.

ސްރީލަންކާގައި އިއުލާނުކޮށްފައިވާ ކާފިއު އުވާލާފައި ވަނީ އާދިއްތަ ދުވަހުއެވެ. ރޮއިޓަރސްއިން ރިޕޯޓުކޮށްފައިވާގޮތުން ސްރީލަންކާގެ ކާފިއު އުވާލާފައި މިވަނީ ބުދިސްޓުންގެ ވެސަކް ފެސްޓިވަލްއާއި ދިމާކޮށެވެ.

އެގައުމުގައި އިއުލާނުކޮށްފައިވާ ކާފިއު އުވާލާފައި މިވަނީ އެގައުމުގެ ބޮޑުވަޒީރުކަމުގެ މަގާމުގައި ހުންނެވި މަހިންދަ ރާޖަޕަކްސަ މަގާމުން އިސްތިއުފާދެއްވުމުން އެމަގާމަށް ރަނިލް ވިކްރަމަސިންގހަ އައްޔަނުކުރެވުނު ފަހުންނެވެ.

ރައީސް ގޮތަބަޔާ ރާޖަޕަކްސަ މުޅި ސްރީލަންކާގައި ކާފިއު އިއުލާނުކޮށްފައި ވަނީ މެއި 09 ވަނަ ދުވަހުއެވެ. އެގޮތުން މިކާފިއު އިއުލާނުކުރެވިގެން ދިޔައީ ސްރީލަންކާގެ ސަރުކާރަށް ވާގިވެރިވާ ފަރާތްތަކާ ސަރުކާރުގެ އިސްތިއުފާއަށް ގޮވާލާ މުޒާހަރާކުރަމުންދިޔަ މީހުންގެ ދެމެދު ހިނގި ހަމަނުޖެހުންތަކެއް ހޫނުވުމުންނެވެ. އޭރު ބޮޑުވަޒީރުކަމުގެ މަގާމުގައި ހުންނެވި މަހިންދަ ރާޖަޕަކްސަ ބޮޑުވަޒީރުކަމުގެ މަގާމުން އިސްތިއުފާދެއްވާފައި ވަނީވެސް މި ހަމަނުޖެހުންތަކުގެ ތެރޭގައެވެ.

ވެސަކް ފެސްޓިވަލަށް ތައްޔާރުވުމުގެ ގޮތުން އެގައުމުގެ ބުދިސްޓުން ދަނީ އިމާރާތްތަކުގައި ބުދިސްޓުންގެ ދިދަތައް ދަމަމުންނެވެ. އަދި އެމީހުން ދަނީ ފައްޅިތަކުގައި ބާއްވާ އަޅުކަމުގެ ކަންތައްތަކަށް ފައްޅިތަކަށް ޒިޔާރަތްކުރަމުންނެވެ.

ސްރީލަންކާގެ ސަރުކާރާ ދެކޮޅަށް ކުރަމުންދިޔަ ސުލްހަވެރި މުޒާހަރާތައް ހޫނުވެފައި ވަނީ މިދިޔަ ހަފުތާގައެވެ. މިދިޔަ ހަފުތާގެ ހަމަނުޖެހުންތަކުގައި ނުވަ މީހުން މަރުވެ 300ށް ވުރެ ގިނަ މީހުންނަށް އެކިވަރުގެ އަނިޔާ ލިބިފައިވާކަމަށް ރިޕޯޓުތައް ބުނެއެވެ.

މިދިޔަ ހަފުތާގެ ހަމަނުޖެހުންތަކާއި ގުޅިގެން މިހާތަނަށް 230 މީހުން ހައްޔަރުކޮށްފައިވާކަމަށް ސްރީލަންކާގެ ފުލުހުންނާ ހަވާލާދީ ރިޕޯޓުކޮށްފައިވެއެވެ.