ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް އަމާޒުކޮށް ދިން ހަމަލާއާ ހެންވޭރު ދެކުނު ދާއިރާގެ މެމްބަރު ހުސައިން ޝަހީމް (އަނދުން ހުސައިން)އާ ގުޅުވައި ރައީސް ނަޝީދު ދެއްކެވި ވާހަކަފުޅާ ގުޅިގެން ކަމާބެހޭ އިދާރާތަކަށް މައްސަލަ ހުށަހެޅުއްވުމަށް އޭނާ ނިންމަވައިފިއެވެ.

އާންމު ކޮމިޓީގެ ބުރާސްފަތި ދުވަހުގެ ބައްދަލުވުމުގެ އެޖެންޑާގައި ހިމެނިފައިމިވާ މައްސަލައަކީ އަނދުން ހުސައިން ފޮނުއްވާފައިވާ ސިޓީއަކާ ގުޅޭގޮތުން ކޮމިޓީގެ ލަފައަކަށް އެދި ހުށައަޅާފައިވާ މައްސަލަ ދިރާސާކުރުމެވެ.

ކޮމިޓީއަށް މަޖިލީހުގެ އަމީންއާންމު ފޮނުއްވާފައިވާ އިދާރީ މެމޯގައި ބުނެފައިވަނީ، އަނދުން ހުސައިން ހުށަހަޅުއްވާފައިވާ ސިޓީއާމެދު އަމަލު ކުރައްވަންވީ ގޮތް ދެންނެވުމަށް ރައްޔިތުންގެ މަޖިލީހުގެ ރައީސް ދަންނަވާފައިވާ ކަމަށެވެ.

ރައްޔިތުންގެ މަޖިލީހުގެ ވަޓްސްއަޕް ގްރޫޕަށް ރައީސް ނަޝީދު ފޮނުއްވި މެސެޖެއްގައި އަނދުން ހުސައިނަށް ބޮޑެތި ތުހުމަތުތަކެއް ކުރައްވައި ވިދާޅުވީ، ރައީސް ނަޝީދަށް ދެވުނު ހަމަލާގެ ރޭވުންތައް ފޮރުވުމުގައި އޭނާ ސަރުކާރަށް ވާގިވެރިވަމުންދާ ކަމަށެވެ.

އެކަމާގުޅިގެން އަނދުން ހުސައިން ހުށައެޅުއްވި ސިޓީވެސް ކޮމިޓީގައި ވަނީ އިއްވަވާފައެވެ. ބުދަ ދުވަހު މަޖިލީހަށް ފޮނުއްވެވި މި ސިޓީއަކީ މަޖިލީހުގެ ރައީސަށް އެޑްރެސް ކުރައްވައި ފޮނުއްވާފައިވާ ސިޓީއެކެވެ.

މި ސިޓީގައި ވިދާޅުވެފައިވަނީ، ރައީސް ނަޝީދަށް އަމާޒުކޮށް، ދީނީ ހަރުކަށި ފިކުރުގެ ބަޔަކުކަމަށް ތުހުމަތު ކުރެވޭ ބަޔަކު ދިން ބޮމުގެ ހަމަލާގެ ފަހަތުގައި އަނދުން ހުސައިން ބައިވެރިވުމެއް އޮތްކަމަށް ދޭހަވާ ގޮތަށް އެއްވެސް އަސާސެއް ނެތް ތުހުމަތުތަކެއް ރައީސް ނަޝީދު ކުރައްވާފައިވާކަމަށެވެ.

އެގޮތުން ރައީސް ނަޝީދު މި ތުހުމަތުތައް ކުރައްވާފައިވަނީ 8 މެއި 2022ގައި ރައްޔިތުންގެ މަޖިލީހުގެ ވަޓްސްއަޕް ގްރޫޕުގައި ދެއްކެވި ވާހަކަފުޅެއްގައިކަމަށް ވަނީ ވިދާޅުވެފައެވެ.

އަނދުން ހުސައިން ވަނީ އެ ވާހަކަފުޅުތަކަކީ އޭނާގެ ހައްގުތަކާއި އިމްތިޔާޒުތަކަށް އުނިކަން އަންނާނެފަދަ ވާހަކަތަކެއްކަމަށް ވިދާޅުވެ، ރައީސް ނަޝީދުފަދަ މަގާމެއްގައި ހުންނެވި ބޭފުޅަކު އެފަދަ އަސާސެއް ނެތް ވާހަކަ ދެއްކެވުމަކީ އޭނާގެ ފުރާނައަށްވެސް ނުރައްކަލެއް ކުރިމަތިވެގެން ދިއުމުގެ އިހްތިމާލު އޮތް ކަމެއްކަމަށް ވިދާޅުވެފައެވެ.

އަނދުން ހުސައިން ވަނީ އެ މައްސަލަ ކަމާބެހޭ އިދާރާތަކަށް ހުށައެޅުއްވުމަށް ނިންމަވާފައިވާކަން ހާމަކުރައްވާފައެވެ. އަދި މި މައްސަލަ ކަމާބެހޭ އިދާރާތަކަށް ހުށައެޅުމަށްޓަކައި 8 މެއި 2022 ވަނަ ދުވަހުގެ 19:01އާ 20:26އާ ދެެމެދު ރައްޔިތުންގެ މަޖިލީހުގެ ވަޓްސްއަޕް ގްރޫޕަށް ފޮނުވާފައިވާ އެންމެހާ މެސެޖުތަކުގެ ކޮޕީ ލިބޭނެގޮތް ހައްދަވައިދެއްވުމަށް މަޖިލީހުގައި ވަނީ އެދިވަޑައިގެންފައެވެ.

އާންމު ކޮމިޓީއަށް ހުށައެޅިފައިވަނީ އެ ސިޓީއާ ގުޅިގެން މަޖިލީހުގެ ސެކްރެޓޭރިއޭޓަށް ލަފައެއް އެރުވުމެވެ.

މި ބައްދަލުވުމުގައި ވާހަކަ ދައްކަވަމުން ހެންވޭރު ހުޅަނގު ދާއިރާގެ މެމްބަރު ހަސަން ލަތީފް ވިދާޅުވި ގޮތުގައި، މެއި 6ގެ ހަމަލާގެ ވިކްޓިމްއަކީ ރައީސް ނަޝީދެވެ. ވީއިރު، ރައީސް ނަޝީދަށް ދިން ހަމަލާގެ ތަހުގީގު އޮއްވައި، ރައީސް ނަޝީދު ކުރެއްވި ކަމަކާ ގުޅިގެން އިތުރު ކަންކަން ބެއްލެވުމާމެދު ހަސަން ލަތީފް ވަނީ ޚިޔާލު ފާޅު ކުރައްވާފައެވެ.

މި ބައްދަލުވުމުގައި އަލިފުށީ ދާއިރާގެ މެމްބަރު މުހައްމަދު ރަޝީދު ހުސައިން (ބިގޭ) ވިދާޅުވީ، މިއީ އާންމު ކޮމިޓީއާ ހަމައަށް ކޮންމެހެން އަންނަންޖެހޭ މައްސަލައެއްވެސް ނޫންކަމަށެވެ. އެގޮތުން މިއީ އިދާރީ ގޮތުން ގޮތެއް ނިންމިފައި އޮންނަންޖެހޭނެ ކަމެއްކަމަށް ދެކެވަޑައިގަންނަވާކަމަށް ބިގޭ ވިދާޅުވިއެވެ.

އެކަމާގުޅޭގޮތުން ހަސަން ލަތީފް ވިދާޅުވީ، މިއީ މަޖިލީހުގެ ޔައުމިއްޔާއެއް ހޯދުމަށް ހުށަހެޅުއްވި ހުށަހެޅުއްވުމެއްނަމަ އިދާރީ ގޮތުން ހައްލުކުރެވިދާނެ ކަމެއް ކަމަށެވެ. ނަމަވެސް މަޖިލީހުގެ ވަޓްސްއަޕް ގްރޫޕެއްގައި ހުރި މެސެޖުތަކެއް ހޯދުމަށް މެމްބަރަކު ހުށަހަޅުއްވާފައި މިވަނީ މުޅިން އަލަށްކަން ފާހަގަ ކުރައްވައި ހަސަން ލަތީފް ވަނީ، މި މައްސަލައާ ގުޅިގެން އާންމު ކޮމިޓީގެ ލަފައަކަށް އެދިވަޑައިގެންފައިވަނީވެސް އެ ސަބަބާހުރެކަމަށް ބެލެވޭކަމަށް ވިދާޅުވެފައެވެ.

މި އަޑުއެހުމުގައި ކުރެންދޫ ދާއިރާގެ މެމްބަރު ޣަނީ ވަނީ، މިއީ ވިސްނާވަޑައިގަތުން މުހިއްމު މައްސަލައެއްކަމަށް ވިދާޅުވެފައެވެ.

ޙަސަން ލަތީފް ވިދާޅުވީ، މަޖިލީހުގެ ވަޓްސްއަޕް ގްރޫޕެއްގައި ދެކެވުނު ވާހަކައެއް ފުލުހުންނަށް ހުށައަޅައިގެން ކުރިއަށް ދިއުމަކީ މީގެ ކުރިން ކޮށްފައިވާ ކަމެއް ނޫން ކަމަށެވެ.

ވުމާއެކު، ކޮމިޓީން ގޮތެއް ނިންމެވުމުގެ ކުރިން އެކަމާ ގުޅިގެން ބަލަންޖެހޭ ކަންކަން އިތުރަށް ބައްލަވައި، މި މައްސަލަ އިތުރަށް ދިރާސާ ކުރެއްވުމަށް ކޮމިޓީގެ މުގައްރިރު، ހަސަން ލަތީފް ވަނީ ހުށައަޅުއްވާފައެވެ. އެކަމަށް އެއްވެސް މެމްބަރަކު އިއުތިރާޒެއް ނުކުރައްވައެވެ.