އަންހެނުން އާންމު ތަންތަނުގައި އުޅޭއިރު މޫނުބުރުގާއެޅުމަށް ތާލިބާނުން އަންގައިފި
7 މެއި 2022 | ހޮނިހިރު 09:47ކޮންމެހެން މުހިއްމު ކަމެއް ނެތްކަމުގައިވާނަމަ، ވީހާވެސް ގިނައިން ގޭގައި ތިބުމަށް އަންގާފައިވޭ
އަފްޣާނިސްތާން- އަންހެނުން އާންމު ތަންތަނަށް ނުކުމެ އުޅޭއިރު، މޫނުބުރުގާ އަޅަން ޖެހޭނެ
އަންހެނުން އާންމު ތަންތަނުގައި އުޅޭއިރު މޫނުބުރުގާއެޅުމަށް ތާލިބާނުންގެ ސުޕްރީމް ލީޑަރު އަންގަވައިފިއެވެ.
ހޮނިހިރު ދުވަހު ތާލިބާނުންގެ ސުޕްރީމް ލީޑަރު އެގޮތަށް އަންގަވާފައިވާއިރު، މި އެންގުން އަންގަވާފައިވަނީ ކާބުލްގައި ކުރިއަށް ދިޔަ ރަސްމިއްޔާތެއްގެ ތެރޭގައެވެ.
މި އެންގުމުގައިވާ ގޮތުން، ކުޑަ އަންހެންކުދިންނާއި އުމުރުން ދުވަސްވީ އަންހެނުން ފިޔަވައި ދެން ތިބި އަންހެނުން އާންމު ތަންތަނަށް ނުކުމެ އުޅޭއިރު، މޫނުބުރުގާ އަޅަންޖެހޭނެއެވެ. އަދި ކޮންމެހެން މުހިއްމު ކަމެއް ނެތްކަމުގައިވާނަމަ، ވީހާވެސް ގިނައިން ގޭގައި ތިބުމަށް ވަނީ އަންގާފައެވެ.
މިއީ ތާލިބާނުން 1996ން 2001ށް އެ ގައުމުގައި ވެރިކަންކުރިއިރުވެސް އަމަލުކުރަމުން އައި އުސޫލުތަކެކެވެ.
20 އަހަރަށްފަހު, ތާލިބާނުން ވެރިކަމަށް އައީ 2021ވަނަ އަހަރުގެ އޯގަސްޓު މަހުއެވެ. އެ ދުވަސްވަރު މަހުރަމަކާ ނުލައި އަންހެނުންނަށް ގެއިން ބޭރަށް ނިކުމެ އުޅުން އޮންނަނީ މަނާކޮށްފައެވެ. އަދި ތައުލީމު ހާސިލްކުރުމަށް ދެވޭނީ އެއްކޮށް ނިވާވެ ތިބެގެންނެވެ.
ތާލިބާނުން ބުނެފައިވަނީ މިހާރު ބައެއް ޕްރޮވިންސްތަކުގައި އަންހެނުންނަށް ހައި ސްކޫލަށް ދެވޭނެކަމަށެވެ.
އޭގެ އިތުރުން، އަންހެނުންގެ ހައްގުތަކާ ގުޅޭގޮތުން އަފްޣާނިސްތާނުގައި މިހާރު ވެރިކަން ކުރަމުން އަންނަ ތާލިބާން ސަރުކާރުން ނެރުނު އަމުރުގައި, އަންހެނުންނަށް ކައިވެނިކުރުމަށް މަޖުބޫރުކޮށް އެއީ މުދަލެއްގެ ގޮތުގައި ނުބެލެވޭނެކަމަށްވެސް ވަނީ އަންގާފައެވެ.
މިއަމުރުގައި ބުނެފައިވަނީ ކައިވެނިކުރުމުގައި އަންހެން މީހާގެ ރުހުންވެސް ބޭނުންވާނެކަމަށެވެ. ނަމަވެސް އަންހެނުން ތައުލީމު ހާސިލުކުރުމާއި ގެއިން ބޭރުގައި މަސައްކަތްކުރުމާއި ގުޅޭގޮތުން މި އަމުރުގައި އެއްވެސް ވާހަކައެއް ހިމަނާފައެއްނުވެއެވެ.
