ފުރަތަމަ އެއީ މަޖުބޫރު މާއްދާއެއް، މިހާރު ޕްރޮފެޝަނަކީވެސް ހޮބީއަކީވެސް އެއީ!

އުމުރުން އެންމެ 4 އަހަރުގައި ފުރަތަމަ މޫދަށް ދާން ފެށީ މަޖުބޫރު މާއްދާއަކަށްވީމައެވެ. އެކަމަކު އޭރުވެސް މޫދަށް ޚާއްޞަ ލޯތްބެއް އޮތެވެ. ފަތާ ހިތްވެއެވެ. އިންޑިޔާގައި ތައުލީމް ހާސިލްކުރިއިރު މޫދަށް އެރުން ނުވަތަ ފެތުންވީ ހަމްނާ އަހުމަދުގެ ސްކޫލް ޓައިމް ޓޭބަލްގައި އޮތް މާއްދާއަކަށެވެ. އެކަމަކު މިހާރު ހާލަތު ބަދަލުވެއްޖެއެވެ. މިއީ އޭގެ 14 އަހަރު ފަހެވެ. މިއަދު ހަމްނާއަކީ ޤައުމީ ޗެމްޕިއަނެވެ. ޤައުމީ ހަތަރު ރެކޯޑެއް އޭނާ އަތުގައި އެބައޮތެވެ.

ޝޯރޓްކޯސް 50 މީޓަރ ބެކްސްޓްރޯކްގެ އަންހެން ޤައުމީ ރެކޯޑް އޮތީ ހަމްނާ އަތުގައެވެ. 100 މީޓަރ އިންޑިވިޖުއަލް މެޑްލޭގެ ޤައުމީ ރެކޯޑް އޮތީވެސް ހަމްނާ އަތުގައެވެ. މިއީ ޚާއްޞަ ރެކޯޑެކެވެ. 15 އަހަރުވީ ރެކޯޑެއް ހަމްނާ މުގުރާލީ 2021 ވަނަ އަހަރު އަބޫދާބީގައި އޮތް 15 ވަނަ ފީނާ ވޯލރްޑް ސްވިމިންގ ޗެމްޕިއަންޝިޕްގައެވެ. އެމުބާރާތުގައި ވާދަކޮށް ރެކޯޑް މުގުރާލި ދެ ރިލޭ ޓީމްގައިވެސް ހަމްނާ ހިމެނެއެވެ. އެއީ 4 ގުނަ 50 މިކްސްޑް މެޑްލޭއާއި, 4 ގުނަ 50 މިކްސްޑް ފްރީސްޓައިލްއެވެ.

18 އަހަރުގައި އެއީ މިހާރު ކޯޗެކެވެ. ޕާސަނަލް ޓްރެއިނަރެކެވެ. ދުވާލުގެ ގިނަ ވަގުތު ސްވިމިންއާ ގުޅުންހުރި ކަންކަމުގައި ހޭދަކުރާ, ބޮޑު އުއްމީދެއް އޮތް ފެތުންތެރިއެކެވެ. ހަމައެކަނި ހަމްނާގެ ތަމްރީނުތަކާއި, ޕްރެކްޓިސްއަށް އެކަނިވެސް ޕޫލްގައި 4 ގަޑިއިރު ހޭދަކުރެއެވެ. އެކަމަކު އޭނާ ބުނީ އެއީ ބައިނަލްއަޤްވާމީ މިންގަނޑަށް ބަލާއިރު މަދު އަދަދެއްކަމަށެވެ. ފެތުމުން ރާއްޖެއަށް ރަން ވަނަތަކެއް ހޯދަދިނުމަކީވެސް އެހެން އެތްލީޓުންނެކޭ އެއްގޮތަށް ހަމްނާގެވެސް އެންމެ ބޮޑު އުއްމިދެވެ.

އެމަސައްކަތުގައި ލިބުނު އެންމެ ބޮޑު ހިތްހަމަޖެހުމަކީ ރާއްޖޭގައި ހުރެގެން ޕޫލެއްގައި ޕްރެކްޓިސް ކުރުމުގެ ފުރުޞަތު ލިބުމެވެ. ކުރިން ޓްރެކްގައި ފެތިއިރާ މިހާރުވެސް ވަރަށްބޮޑު ކުރިއެރުންތަކެއް އަންނަކަން ޒުވާން ފެތުންތެރިޔާ ފާހަގަކުރިއެވެ. ކުރިންނަމަ މުބާރާތްތަކަށް ދަނީ ޓްރެކްގައި ފެތުމަށްފަހުއެވެ. ބައެއް ފަހަރު މުބާރާތް ކައިރިވުމުން އެހެން ޤައުމެއްގައި ޕޫލެއްގައި ފަތާލަން ފުރުޞަތު ލިބެއެވެ. އެކަމަކު ގިނަފަހަރު މުބާރާތުގެ ކުރިން ޕޫލަށް ހޭނިލަން ލިބެނީ ދެދުވަހެވެ. އެއީ މުބާރާތް އޮންނަ ޤައުމަށް ދިއުމަށްފަހު މުބާރާތުގެ ކުރިން ލިބޭ ދެދުވަހެވެ. އެކަމަކު މިއަދު އެހާލަތު ބަދަލުވުމަކީ އެހެން ފެތުންތެރިންނެކޭ އެއްގޮތަށް ހަމްނާއަށްވެސް އޮތް ބޮޑު ހިތްހަމަޖެހުމެކެވެ. އޭގެ ނަތީޖާ ހުރިހާ ފެތުންތެރިންގެ ފަރާތުން ފެންނަކަންވެސް ހަމްނާ ފާހަގަކުރިއެވެ.

ސްކޫލު ދައުރުގައި ހަމްނާއަކީ ހަމައެކަނި ފެތުންތެރިއް ނޫނެވެ. އިންޓަރސްކޫލް ކެރަމް މުބާރާތްތަކުގައިވެސް ވާދަކުރިއެވެ. އެކަމަކު ޝައުޤު ހުއްޓުނީ ޕޫލަށެވެ. ބޭނުންވަނީ ފަތައިގެން ރާއްޖެއަށް ރަންވަނަތަކެއް ހޯދއިދޭށެވެ. ހޮބީއަކީވެސް, ޕްރޮފެޝަނަކީވެސް ފެތުމެވެ. މޫދެވެ, ޕޫލެވެ. އޭނާ ބުނީ މޯޓިވޭޝަން ލެވެލްވެސް ވަރަށް މަތިކަމަށާއި, މިހާރުވެސް މަސައްކަތްކުރަނީ އަމާޒުތަކެއް ކަނޑައަޅައިގެންކަމަށެވެ.

18 އަހަރުގައި ހަމްނާ އެހޯދާ ކުރިއެރުންތަކާއި, އުއްމީދުތައް މިހާރުވެސް އެހުރީ އުހުގައެވެ. ކާމިޔާބީ ހޯދުމުގެ ފުރުޞަތު ބޮޑެވެ. ފަހިވެފައިވާ ފުރުޞަތުތަކާއެކު ހަމްނާ ކޮމަންވެލްތު ގޭމްސްގައި ވާދަކުރުމަކީ ކައިރީގައި އޮތް ފުރުޞަތެކެވެ. ހަމައެހެންމެ ބައިނަލްއަޤްވާމީ މެޑެއްޔެއް ރާއްޖެއަށް ގެނެސްދޭނެ އެތްލީޓުންގެ ތެރޭގައި ހަމްނާގެ ނަންވެސް ހިމެނެއެވެ. އޭނާއާމެދު އެއުއްމީދު އެބައޮތެވެ.